Mahabharata · Chapter 6.20

sūryodaye sañjaya ke nu pūrvaṃ yuyutsavo hṛṣyamāṇā ivāsan /
māmakā vā bhīṣmanetrāḥ samīpe pāṇḍavā vā bhīmanetrāstadānīm //

keṣāṃ jaghanyau samasūryau savāyū keṣāṃ senāṃ śvāpadāścābhaṣanta /
keṣāṃ yūnāṃ mukhavarṇāḥ prasannāḥ sarvaṃ hyetadbrūhi tattvaṃ yathāvat //
sañjaya uvāca /

ubhe sene tulyamivopayāte ubhe vyūhe hṛṣṭarūpe narendra /
ubhe citre vanarājiprakāśe tathaivobhe nāgarathāśvapūrṇe //

ubhe sene bṛhatyau bhīmarūpe tathaivobhe bhārata durviṣahye /
tathaivobhe svargajayāya sṛṣṭe tathaivobhe satpuruṣopajuṣṭe //

paścānmukhāḥ kuravo dhārtarāṣṭrāḥ sthitāḥ pārthāḥ prāṅmukhā yotsyamānāḥ /
daityendraseneva ca kauravāṇāṃ devendraseneva ca pāṇḍavānām //

śīto vāyuḥ pṛṣṭhataḥ pāṇḍavānāṃ dhārtarāṣṭrāñśvāpadā vyāharanta /
gajendrāṇāṃ madagandhāṃśca tīvrā- nna sehire tava putrasya nāgāḥ //

duryodhano hastinaṃ padmavarṇaṃ suvarṇakakṣaṃ jālavantaṃ prabhinnam /
samāsthito madhyagataḥ kurūṇāṃ saṃstūyamāno bandibhirmāgadhaiśca //

candraprabhaṃ śvetamathātapatraṃ sauvarṇasragbhrājati cottamāṅge /
taṃ sarvataḥ śakuniḥ pārvatīyaiḥ sārdhaṃ gāndhārairyāti gāndhārarājaḥ //

bhīṣmo'grataḥ sarvasainyasya vṛddhaḥ śvetacchatraḥ śvetadhanuḥ sakhaṅgaḥ /
śvetoṣṇīṣaḥ pāṇḍureṇa dhvajena śvetairaśvaiḥ śvetaśailaprakāśaiḥ //

tasya sainye dhārtarāṣṭrāśca sarve bāhlīkānāmekadeśaḥ śalaśca /
ye cāmbaṣṭhāḥ kṣatriyā ye ca sindho- stathā sauvīrāḥ pañcanadāśca śūrāḥ //

śoṇairhayai rukmaratho mahātmā droṇo dhanuṣpāṇiradīnasatvaḥ /
āpto guruḥ prathitaḥ sarvarājñāṃ paścāccamūmindra ivābhiyāti //

vārdhakṣatriḥ sarvasainyasya madhye bhūriśravāḥ purumitro jayaśca /
sālvā matsyāḥ kekayāśceti sarve gajānīkairbhrātaro yotsyamānāḥ //

śāradvataścottaradhūrmahātmā maheṣvāso gautamaścitrayodhī /
śakaiḥ kirātairyavanaiḥ pahlavaiśca sārdhaṃ camūmuttarato'bhiyāti //

mahārathairvaṣṇibhojaiḥ suguptaṃ surāṣṭrakairviditairāttaśastraiḥ /
bṛhadbalaṃ kṛtavarmābhiguptaṃ balaṃ tvadīyaṃ dakṣiṇenābhiyāti //

saṃśaptakānāmayutaṃ rathānāṃ mṛtyurjayo vārjunasyeti sṛṣṭāḥ /
yenārjunastena rājankṛtāstrāḥ prayātāraste trigartāśca śūrāḥ //

sāgraṃ śatasahasraṃ tu nāgānāṃ tava bhārata /
nāgenāge rathaśataṃ śatamaśvā ratherathe //

aśve'śve daśa dhānuṣkā dhānuṣke śata carmiṇaḥ /
evaṃ vyūḍhānyanīkāni bhīṣmeṇa tava bhārata //

saṃvyūhya mānuṣaṃ vyūhaṃ daivaṃ gāndharvamāsuram /
divasedivase prāpte bhīṣmaḥ śāntanavo'graṇīḥ //

mahārathaughavipulaḥ samudra iva ghoṣavān /
bhīṣmeṇa dhārtarāṣṭrāṇāṃ vyūhaḥ pratyaṅmukho yudhi //

anantarūpā dhvajinī narendra bhīmā tvadīyā na tu pāṇḍavānām /
tāṃ caiva manye bṛhatīṃ duṣpragharṣāṃ yasyā netā keśavaścārjunaśca //