Mahabharata · Chapter 6.21

bṛhatīṃ dhārtarāṣṭrasya senāṃ dṛṣṭvā samudyatām /
viṣādamagamadrājā kuntīputro yudhiṣṭhiraḥ //

vyūhaṃ bhīṣmeṇa cābhedyaṃ kalpitaṃ prekṣya pāṇḍavaḥ /
abhedyamiva samprekṣya vivarṇo'rjunamabravīt //

dhanañjaya kathaṃ śakyamasmābhiryoddhumāhave /
dhārtarāṣṭrairmahābāho yeṣāṃ yoddhā pitāmahaḥ //

akṣobhyo'yamabhedyaśca bhīṣmeṇāmitrakarṣiṇā /
kalpitaḥ śāstradṛṣṭena vidhinā bhūrivarcasā //

te vayaṃ saṃśaynaṃ prāptāḥ sasainyāḥ śatrukarṣaṇa /
kathamasmānmahāvyūhādutthānaṃ no bhaviṣyati //

athārjuno'bravītpārthaṃ yudhiṣṭhiramamitrahā /
viṣaṇṇamiva samprekṣya tava rājannanīkinīm //

prajñayābhyadhikāñśūrānguṇayuktānbahūnapi /
jayantyalpatarā yena tannibodha viśāmpate //

tatra te kāraṇaṃ rājanpravakṣyāmyanasūyave /
nāradastamṛṣirveda bhīṣmadroṇau ca pāṇḍava //

enamevārthamāśritya yuddhe devāsure'bravīt /
pitāmahaḥ kila purā mahendrādīndivaukasaḥ //

na tathā balavīryābhyāṃ jayanti vijigīṣavaḥ /
yathā satyānṛśaṃsyābhyāṃ dharmeṇaivodyamena ca //

tvaktvā'dharmaṃ tathā sarve dharmaṃ cottamamāsthitāḥ /
yudhyadhvamatahankārā yato dharmastato jayaḥ //

evaṃ rājanvijānīhi dhruvo'smākaṃ raṇe jayaḥ /
yathā tu nāradaḥ prāha yataḥ kṛṣṇastato jayaḥ //

guṇabhūto jayaḥ kṛṣṇe pṛṣṭhato'bhyeti mādhavam /
tadyathā vijayaścāsya sannatiścāparo guṇaḥ //

anantatejā govindaḥ śatrupūgeṣu nirvyathaḥ /
puruṣaḥ sanātanamayo yataḥ kṛṣṇastato jayaḥ //

purā hyeṣa harirbhūtvā vikuṇṭho'kuṇṭhasāyakaḥ /
surāsurānavasphūrjannabravītke jayantviti //

anu kṛṣṇaṃ jayemeti yairuktaṃ tatra tairjitam /
tatprasādāddhi trailokyaṃ prāptaṃ śakrādibhiḥ suraiḥ //

tasya te na vyathāṃ kāñcidiha paśyāmi bhārata /
yasya te yajamāśāste viśvabhuk tridiveśvaraḥ //