Mahabharata · Chapter 6.17

yathā sa bhagavānvyāsaḥ kṛṣṇadvaipāyano'bravīt /
tathaiva sahitāḥ sarve samājagmurmahīkṣitaḥ //

maghāviṣayagaḥ somastaddinaṃ pratyapadyata /
dīpyamānāśca sampeturdivi sapta mahagrahāḥ //

dvidhābhūta ivāditya udaye pratyadṛśyata /
jvalantyā śikhayā bhūyo bhānumānudito raviḥ //

vavāśire ca dīptāyāṃ diśi gomāyuvāyasāḥ /
lipsamānāḥ śarīrāṇi māṃsaśoṇitabhojanāḥ //

ahanyahani pārthānāṃ vṛddhaḥ kurupitāmahaḥ /
bharadvājātmajaścaiva prātarutthāya saṃyatau //

jayo'stu pāṇḍuputrāṇāmityūcaturindamau /
yuyudhāte tavārthāya yathā sa samayaḥ kṛtaḥ //

sarvadharmaviśeṣajñaḥ pitā devavratastava /
samānīya mahīpālānidaṃ vacanamabravīt //

idaṃ vaḥ kṣatriyā dvāraṃ svargāyāpāvṛtaṃ mahat /
gacchadhvaṃ tena śakrasya brahmaṇaḥ sahalokatām //

eṣa vaḥ śāśvataḥ panthāḥ pūrvaiḥ pūrvataraiḥ kṛtaḥ /
sambhāvayadhvamātmānamavyagramanaso yudhi //

nābhāgo'tha yayātiśca māndhātā nahuṣo nṛgaḥ /
saṃsiddhāḥ paramaṃ sthānaṃ gatāḥ karmabhirīdṛśaiḥ //

adharmaḥ kṣatriyasyaiṣa yadvyādhimaraṇaṃ gṛhe /
yadayonidhanaṃ yāti so'sya dharmaḥ sanātanaḥ //

evamuktā mahīpālā bhīṣmeṇa bharatarṣabha /
niryayuḥ svānyanīkāni śobhayanto rathottamaiḥ //

sa tu vaikartanaḥ karṇaḥ sāmātyaḥ saha bandhubhiḥ /
nyāsitaḥ samare śastraṃ bhīṣmeṇa bharatarṣabha //

apetakarṇāḥ putrāste rājanaścaiva tāvakāḥ /
niryayuḥ siṃhanādena nādayanto diśo daśa //

śvetaiśchatraiḥ patākābhirdhvajavāraṇavājibhiḥ /
tānyanīkāni śobhante gajairatha padātibhiḥ //

bherīpaṇavaśabdaiśca dundubhīnāṃ ca niḥsvanaiḥ /
rathanemininādaiśca babhūvākulitā mahī //

kāñcanāṅgadakeyūraiḥ kārmukaiśca mahārathāḥ /
bhrājamānā vyarājanta sāgnayaḥ parvatā iva //

tālena mahatā bhīṣmaḥ pañcatāreṇa ketunā /
vimalādityasankāśastasthau kurucamūpari //

ye tvadīyā maheṣvāsā rājāno bharatarṣabha /
avartanta yathādeśaṃ rājañśāntanavasya te //

sa tu govāsanaḥ śaibyaḥ sahitaḥ sarvarājabhiḥ . yayau mātaṅgarājena rājārheṇa patākinā /
padmavarṇastvanīkānāṃ sarveṣāmagrataḥ sthitaḥ //

aśvatthāmā yayau yattaḥ siṃhalāṅgūlaketunā /
śrutāyudhaścitrasenaḥ purumitro viviṃśatiḥ //

śalyo bhūriśravāścaiva vikarṇaśca mahārathaḥ /
ete sapta maheṣvāsā droṇaputrapurogamāḥ //

syandanairvaravarmāṇo bhīṣmasyāsanpurogamāḥ /
teṣāmapi mahotsedhāḥ śobhayanto rathottamān //

bhrājamānā vyarocanta jāmbūnadamayā dhvajāḥ /
jāmbūnadamayī vedī kamaṇḍaluvibhūṣitā //

keturācāryamukhyasya droṇasya dhanuṣā saha /
anekaśatasāhasramanīkamanukarṣataḥ //

mahānduryodhanasyāsīnnāgo maṇimayo dhvajaḥ /
tasya pauravakāliṅgakāmbhojāḥ samudakṣiṇāḥ //

kṣemadhanvā ca śalyaśca tasthuḥ pramukhato rathāḥ / syandanena mahārheṇa ketunā vṛṣabheṇa ca /
prakarṣanneva senāgnaṃ māgadhasya kṛpo yayau //

tadaṅgapatināṃ guptaṃ kṛpeṇa ca manasvinā /
śāradāmbudharaprakhyaṃ prācyānāṃ sumahadbalam //

anīkapramukhe tiṣṭhanvarāheṇa mahāyaśāḥ /
śuśubhe ketumukhyena rājatena jayadrathaḥ //

śataṃ ratasahasrāṇāṃ tasyāsanvaśavartinaḥ /
aṣṭau nāgasahasrāṇi sādināmayutāni ṣaṭ //

tatsindhupatinā rājñā pālitaṃ dhvajinīmukham /
anantarathanāgāśvamaśobhata mahadbalam //

ṣaṣṭyā rathasahasraistu nāgānāmayutena ca /
patiḥ sarvakaliṅgānāṃ yayau ketumatā saha //

tasya parvatasankāśā vyarocanta mahāgajāḥ /
yantratomaratūṇīraiḥ patākābhiḥ suśobhitāḥ //

śuśubhe ketumukhyena pāvakena kaliṅgakaḥ /
śvetacchatreṇa niṣkeṇa cāmaravyajanena ca //

ketumānapi mātaṅgaṃ vicitraparamāṅkuśam /
āsthitaḥ samare rājanmeghastha iva bhānumān //

tejasā dīpyamānastu vāraṇottamamāsthitaḥ /
bhagadatto yayau rājā yathā vajradharastathā //

gajaskandhagatāvāstāṃ bhagadattena sammitau /
vindānuvindāvāvantyau ketumantamanuvratau //

sa rathānīkavānvyūho hastyaṅgo nṛpaśīrṣavān /
vājipakṣaḥ patatyugraḥ prahasansarvatomukhaḥ //

droṇena vihito rājanrājñā śāntanavena ca /
tathaivācāryaputreṇa bāhlīkena kṛpema ca //