Mahabharata · Chapter 6.16

tato rajanyāṃ vyuṣṭāyāṃ śabdaḥ samabhavanmahān /
krośatāṃ bhūmipalānāṃ yujyatāṃ yujyatāmiti //

śaṅkhadundubhighoṣaiśca siṃhanādaiśca bhārata /
hayaheṣitanādaiśca rathanemisvanaistathā //

gājānāṃ bṛhatāṃ caiva yodhānāṃ cāpi garjatām /
kṣvelitāsphoṭitotkruṣṭaistumulaṃ sarvato'bhavat //

udatiṣṭhanmahārāja sarvaṃ yuktamaśeṣataḥ /
sūryodaye mahatsainyaṃ kurupāṇḍavasenayoḥ //

rājendra tava putrāṇāṃ pāṇḍavānāṃ tathaiva ca /
duṣpradhṛṣyāṇi cāstrāṇi saśasrakavacāni ca //

tataḥ prakāśe sainyāni samadṛśyanta bhārata /
tvadīyānāṃ pareṣāṃ ca śastravanti mahānti ca //

tatra nāgā rathāścaiva jāmbūnadapariṣkṛtāḥ /
vibhrājamānā dṛśyante meghā iva savidyutaḥ //

rathānīkānyadṛśyanta nagarāṇīva bhūriśaḥ /
atīva śuśubhe tatra pitā te pūrṇacandravat //

dhanurbhirṛṣṭibhiḥ khaṅgairgadābhiḥ śaktitomaraiḥ /
yodhāḥ praharaṇaiḥ śubhraisteṣvanīkeṣvavasthitāḥ //

gajāḥ padātā rathinasturagāśca viśāmpate /
vyatiṣṭhanvāgurākārāḥ śataśo'tha sahasraśaḥ //

dhvajā bahuvidhākārā vyadṛśyanta samucchritāḥ /
sveṣāṃ caiva pareṣāṃ ca dyutimantaḥ sahasraśaḥ //

kāñcanā maṇicitrāṅgā jvalanta iva pāvakāḥ /
arciṣmanto vyarocanta gajārohāḥ sahasraśaḥ //

mahendraketavaḥ śubhrā mahendrasadaneṣviva /
sannaddhāste pravīrāśca dadṛśuryuddhakāṅkṣiṇaḥ //

udyatairāyudhaiścitrāstalabaddhāḥ kalāpinaḥ /
ṛṣabhākṣā manuṣyendrāścamūmukhagatā babhuḥ //

śakuniḥ saubalaḥ śalya āvantyo'tha jayadrathaḥ /
vindānuvindau kaikeyāḥ kāmbhojaśca sudakṣiṇaḥ //

śrutāyudhaśca kāliṅgo jayatsenaśca pārthivaḥ /
bṛhadbalaśca kauśalyaḥ kṛtavarmā ca sātvataḥ //

daśaite puruṣavyāghrāḥ śūrāḥ parighabāhavaḥ /
akṣauhiṇīnāṃ patayo yajvāno bhūridakṣiṇāḥ //

ete cānye ca bahavo duryodhanavaśānugāḥ /
rājāno rājaputrāśca nītimanto mahārathāḥ //

sannaddhāḥ samadṛśyana sveṣvanīkeṣvavasthitāḥ /
baddhakṛṣṇājināḥ sarve balino yuddhaśālinaḥ //

hṛṣṭā duryodhanasyārthe brahmalokāya dīkṣitāḥ /
samarthā daśa vāhinyaḥ parigṛhya vyavasthitāḥ //

ekādaśī dhārtarāṣṭrī kauravāṇāṃ mahācamūḥ /
agrataḥ sarvasainyānāṃ yatra śāntanavo'graṇīḥ //

śvetoṣṇīṣaṃ śvetahayaṃ śvetavarmāṇamacyutam /
apaśyāma mahārāja bhīṣmaṃ candramivoditam //

hematāladhvajaṃ bhīṣmaṃ rājate syandate sthitam /
śvetābhra iva tīkṣṇāṃśuṃ dadṛśuḥ kurupāṇḍavāḥ //

dṛṣṭvā camūmukhe bhīṣmaṃ samakampanta pāṇḍavāḥ . sṛñjayāśca maheṣvāsā dhṛṣṭadyumnapurogamāḥ /
jṛmbhamāṇaṃ mahāsiṃhaṃ dṛṣṭvā kṣudramṛgā yathā //

dhṛṣṭadyumnamukhāḥ sarve samudvivijire muhuḥ /
ekādaśaitāḥ śrījuṣṭā vāhinyastava pārthiva //

pāṇḍavānāṃ tathā sapta mahāpuruṣapālitāḥ /
unmattamakarāvartau mahāgrāhasamākulau //

yugānte samavetau dvau dṛśyete sāgarāviva . naiva nastādṛśo rājandṛṣṭapūrvo na ca śrutaḥ /
anīkānāṃ sametānāṃ kauravāṇāṃ tathāvidhaḥ //