Mahabharata · Chapter 6.18

tato muhūrtāttumulaḥ śabdo hṛdayakampanaḥ /
aśrūyata mahārāja yodhānāṃ prayuyutsatām //

śaṅkhadundubhighoṣaiśca vāraṇānāṃ ca bṛṃhitaiḥ /
nomighoṣai rathānāṃ ca dīryatīva vasundharā //

hayānāṃ heṣamāṇānāṃ yodhānāṃ caiva garjatām /
kṣaṇenaiva nabho bhūmiḥ śabdenāpūritaṃ tadā //

putrāṇāṃ tava durdharṣa pāṇḍavānāṃ tathaiva ca /
samakampanta sainyāni parasparasamāgame //

tatra nāgā rathāścaiva jāmbūnadavibhūṣitāḥ /
bhrājamānā vyadṛśyanta meghā iva savidyutaḥ //

dhvajā bahuvidhākārāstāvakānāṃ narādhipa /
kāñcanāṅgadino rejurjvalitā iva pāvakāḥ //

sveṣāṃ caiva pareṣāṃ ca samadṛśyanta bhārata /
mahendraketavaḥ śubhrā mahendrasadaneṣviva //

kāñcanaiḥ kavacairvīrā jvalanārkasamaprabhaiḥ /
sannaddhāḥ samadṛśyanta jvalanārkasamaprabhāḥ //

kuruyodhavarā rājanvicitrāyudhakārmukāḥ /
udyatairāyuthaiścitraistalabaddhāḥ patākinaḥ //

ṛṣabhākṣā maheṣvāsāścamūmukhagatā babhuḥ . pṛṣṭhagopāstu bhīṣmasya putrāstava narādhipa /
duḥśāsano durviṣaho durmukho duḥsahastathā //

viviṃśatiścitraseno vikarṇaśca mahārathaḥ /
satyavrataḥ purumitro jayo bhūriśravāḥ śalaḥ //

rathā viṃśatisāhasrāstathaiṣāmanuyāyinaḥ /
abhīṣāhāḥ śūrasenāḥ śibayo'tha vasātayaḥ //

śālvā matsyāstathāmbaṣṭhāstraigartāḥ kekayāstathā /
sauvīrāḥ kaitavāḥ prācyāḥ pratīcyedīcyavāsinaḥ //

dvādaśaite janapadāḥ sarve śūrāstanutyajaḥ /
mahatā rathavaṃśena te rarakṣuḥ pitāmaham //

anīkaṃ daśasāhasraṃ kuñjarāṇāṃ tarasvinām /
māgadho yatra nṛpatistadrathānīkamanvayāt //

rathānāṃ cakrarakṣāśca pādarakṣāśca dantinām /
abhavanvāhinīmadhye śatānāmayutāni ṣaṭ //

pādātāścāgrato gacchandhanuścarmāsipāṇayaḥ /
anekaśatasāhasrā nakharaprāsayodhinaḥ //

akṣauhiṇyo daśaikā ca tava putrasya bhārata /
adṛśyata mahārāja gaṅgeva yamunāntarā //