Mahabharata · Chapter 6.15

tvadyukto'yamanupraśno mahārāja yathārhasi /
na tu duryodhane doṣamimamāsaṅktumarhasi //

ya ātmano duścaritādaśubhaṃ prāpnuyānnaraḥ /
enasā tena nānyaṃ sa upāśaṅkitumarhati //

mahārāja manuṣyeṣu nindyaṃ yaḥ sarvamācaret /
sa vadhyaḥ sarvalokasya ninditāni samācaran //

nikāro nikṛtiprajñaiḥ pāṇḍavaistvatpratīkṣayā /
anubhūtaḥ sahāmātyaiḥ kṣāntaśca suciraṃ vane //

hayānāṃ ca gajānāṃ ca rājñāṃ cāmitatejasām /
pratyakṣaṃ yanmayā dṛṣṭaṃ dṛṣṭaṃ yogabalena ca //

śṛṇu tatpṛthivīpāla mā ca śoke manaḥ kṛthāḥ /
diṣṭametatpurā nūnamidameva narādhipa //

namaskṛtvā pravakṣyāmi pārāśaryāya dhīmate /
yasya prasādāddivyaṃ tatprāptaṃ jñānamanuttamam //

dṛṣṭiścātīndriyā rājandūrācchravaṇameva ca /
paracittasya vijñānamatītānāgatasya ca //

vyutthitotpattivijñānamākāśe ca gatiḥ śubhā /
astrairasaṅgo yuddheṣu varadānānmahātmanaḥ //

śrṛṇu me vistareṇedaṃ vicitraṃ paramādbhutam /
bharatānāmabhūdyuddhaṃ yathā tadromaharṣaṇam //

teṣvanīkeṣu yatteṣu vyūḍheṣu ca vidhānataḥ /
duryodhano mahārāja duḥśāsanamathābravīt //

duḥśāsana rathāstūrṇaṃ yujyantāṃ bhīṣmarakṣiṇaḥ /
anīkāni ca sarvāṇi śīghraṃ tvamanucodaya //

ayaṃ sa māmabhiprāpto varṣapūgābhicintitaḥ /
pāṇḍavānāṃ sasainyānāṃ kurūṇāṃ ca samāgamaḥ //

nātaḥ kāryatamaṃ manye raṇe bhīṣmasya rakṣaṇāt /
hanyudgupto hyasau pārthānsomakāṃśca sasṛñjayān //

abravīcca viśuddhātmā nāhaṃ hanyāṃ śikhaṇḍinām /
śrūyate strī hyasau pūrvaṃ tasmādūrtyo raṇe mama //

tasmādbhīṣmo rakṣitavyo viśeṣeṇeti me matiḥ /
śikhaṇḍino vadhe yattāḥ sarve tiṣṭhantu māmakāḥ //

tathā prācyāḥ pratīcyāśca dākṣiṇātyottarāpathāḥ /
sarvathā'streṣu kuśalāste rakṣantu pitāmaham //

arakṣyamāṇaṃ hi vṛko hanyātsiṃhaṃ mahābalam /
mā siṃhaṃ jambukeneva ghātayāmaḥ śikhaṇḍinā //

vāmaṃ cakraṃ yudhāmanyuruttamaujāśca dakṣiṇam / goptārau phālgunaṃ prāptau phālgunopi śikhaṇḍinaḥ /

saṃrakṣyamāṇaḥ pārthena bhīṣmeṇa ca vivarjitaḥ /
yathā na hanyādgāṅgeyaṃ duḥśāsana tathā kuru //