Mahabharata · Chapter 6.14

kathaṃ kurūṇāmṛṣabho hato bhīṣmaḥ śikhaṇḍinā /
kathaṃ rathārtsa nyapatitpitā me vāsavopamaḥ //

kathamācakṣva me yodhā hīnā bhīṣmeṇa sañjaya /
balinā devakalpena gurvarthe brahmacāriṇā //

tasminhate mahāprājñe maheṣvāse mahābale /
mahāsatve naravyāghre kimu āsīnmanastava //

ārtiṃ parāmāviśati manaḥ śaṃsasi me hatam /
kurūṇāmṛṣabhaṃ vīramakampaṃ puruṣarṣabham //

ke taṃ yāntamanuprāptāḥ ke vāsyasanpurogamāḥ /
ke'tiṣṭhanke nyavartanta ke'nvavartanta sañjaya //

ke śūrā rathaśārdūlamadbhutaṃ kṣatriyarṣabham /
tathā'nīkaṃ gāhamānaṃ sahasā pṛṣṭhato'nvayuḥ //

yastamorka ivāpohanparasainyamamitrahā /
sahasraraśmipratimaḥ pareṣāṃ bhayamādadhat //

akarodduṣkaraṃ karma raṇe pāṇḍusuteṣu yaḥ /
grasamānamanīkāni ya enaṃ paryavārayan //

kṛtinaṃ taṃ durādharṣaṃ sañjayāsya tvamantike /
kathaṃ śāntanavaṃ yuddhe pāṇḍavāḥ pratyavārayan //

nikṛntantamanīkāni śaradaṃṣṭraṃ manasvinam /
cāpavyāttānanaṃ ghoramasijihvaṃ durāsadam //

anarhaṃ puruṣavyāghraṃ hrīmantamaparājitam /
pātayāmāsa kaunteyaḥ kathaṃ tamajitaṃ yudhi //

ugradhanvānamugreṣuṃ vartamānaṃ rathottame /
pareṣāmuttamāṅgāni pracinvantamatheṣubhiḥ //

pāṇḍavānāṃ mahatsainyaṃ yaṃ dṛṣṭvodyatamāhave /
kālāgnimiva durdharṣaṃ samaceṣṭata nityaśaḥ //

parikṛṣya sa senāṃ tu daśarātramanīkahā /
dagāmāstamivādityaḥ kṛtvā karma suduṣkaram //

yaḥ sa śakra ivākṣayyaṃ varṣaṃ śaramayaṃ kṣipan /
jaghāna yudhi yodhānāmarbudaṃ daśabhirdinaiḥ //

sa śete nihato bhūmau vātabhugna iva drumaḥ /
mama durmantritenājau yathā nārhati bhārataḥ //

kathaṃ śāntanavaṃ dṛṣṭvā pāṇḍavānāmanīkinī /
prahartumaśakattatra bhīṣmaṃ bhīmaparākramam //

kathaṃ bhīṣmeṇa sangrāmaṃ prākurvanpāṇḍunandanāḥ /
kathaṃ ca nājayadbhīṣmo droṇe jīvati sañjaya //

kṛpe sannihite tatra bharadvājātmaje tathā /
bhīṣmaḥ praharatāṃ śreṣṭhaḥ kathaṃ sa nidhanaṃ gataḥ //

kathaṃ cātirathastena pāñcālyena śikhaṇḍinā /
bhīṣmo vinihato yuddhe devairapi durāsadaḥ //

yaḥ spardhate raṇe nityaṃ jāmadagnyaṃ mahābalam /
ajitaṃ jāmadagnyena śakratulyaparākramam //

taṃ hataṃ samare bhīṣmaṃ mahārathakuloditam /
sañjayācakṣva me vīraṃ yena śarma na vidmahe //

māmakāḥ ke maheṣvāsā nājahuḥ sañjayācyutam /
duryodhanasamādiṣṭāḥ ke vīrāḥ paryavārayan //

yacchikhaṇḍimukhāḥ sarve pāṇḍavā bhīṣmamabhyayuḥ /
kaccitte kuravaḥ sarve nājahuḥ sañjayācyutam //

aśmasāramayaṃ nūnaṃ hṛdayaṃ mudṛḍhaṃ mama /
yacchrutvā puruṣavyāghraṃ hataṃ bhīṣmaṃ na dīryate //

yasminsatyaṃ ca medhā ca nītiśca bharatarṣabhe /
aprameyāṇi durdharṣe kathaṃ sa nihato yudhi //

maurvīghoṣastanayutnuḥ pṛṣatkapṛṣato mahān /
dhanurhrādamahāśabdo mahāmegha ivonnataḥ //

yo'bhyavarṣata kaunteyānsapāñcālānsasṛñjayān /
nighnanparathānvīro dānavāniva vajrabhṛt //

iṣvastrasāgaraṃ ghoraṃ bāṇagrahaṃ durāsadam /
kārmukormiṇamakṣayyamadvīpaṃ calamaplavam //

gadāsimakarāvāsaṃ hayāvarttaṃ gajākulam /
padātimatsyakalilaṃ śaṅkhadundubhiniḥsvanam //

hayāngajapadātīṃśca rathāṃśca tarasā bahūn /
nimañjayantaṃ samare paravīrāpahāriṇam //

vidahyamānaṃ kopena tejasā ca parantapam /
veleva makarāvāsaṃ ke vīrāḥ paryavārayan //

bhīṣmo yadakarotkarma samare sañjayārihā /
duryodhanahitārthāya ke tasyāsya puro'bhavan //

ke rakṣandakṣiṇaṃ cakraṃ bhīṣmasyāmitatejasaḥ /
pṛṣṭhataḥ ke parānvīrānapāsedhanyatavratāḥ //

ke purastādavartanta rakṣanto bhīṣmamantike /
ke rakṣannuttaraṃ cakraṃ vīrā vīrakasya yudhyataḥ //

vāme cakre vartamānāḥ ke'ghnansañjaya sṛñjayān /
agnato'gnyamanīkeṣu ke'bhyarakṣandurāsadam //

pārśvataḥ ke'bhyarakṣanta gacchanto durgamāṃ gatim /
samūhe ke parānvīrānpratyayudhyanta sañjaya //

rakṣyamāṇaḥ kathaṃ vīrairgopyamānāśca tena te /
durjayānāmanīkāni nājayaṃstarasā yudhi //

sarvalokeśvarasyeva paramasya prajāpateḥ /
kathaṃ prahartumapi te śekuḥ sañjaya pāṇḍavāḥ //

yasmindvīpe samāśvasya yudhyante kuravaḥ paraiḥ /
taṃ nimagnaṃ naravyāghraṃ bhīṣmaṃ śaṃsasi sañjaya //

yasya vīryaṃ samāśritya mama putro bṛhadbalaḥ /
na pāṇḍavānagaṇayatkathaṃ sa nihataḥ paraiḥ //

yaḥ purā vibudhaiḥ sarvaiḥ sahāye yuddhadurmadaḥ /
kāṅkṣito dānavāndhnadbhiḥ pitā mama mahāvrataḥ //

yasmijjāte mahāvīrye śāntanurlokaviśrutaḥ /
śokaṃ dainyaṃ ca duḥsvaṃ ca prājahātsa ca tatkṣaṇe //

proktaṃ parāyaṇaṃ prājñaṃ svadharmanirataṃ śucim /
vedavedāṅgatatvajñaṃ kathaṃ śaṃsasi me hatam //

sarvāstravinayopetaṃ śāntaṃ dāntaṃ manasvinam /
hataṃ śāntanavaṃ śrutvā manye śeṣaṃ hataṃ balam //

dharmādadharmo balavānsamprāpta iti me matiḥ /
yatra vṛddhaṃ guruṃ hatvā rājyamicchanti pāṇḍavāḥ //

jāmadagnyaḥ purā rāmaḥ sarvāstravidanuttamaḥ /
ambārthamudyataḥ saṅkhye bhīṣmeṇa yudhi nirjitaḥ //

tamindrasamakarmāṇaṃ kakudaṃ sarvadhanvinām /
hataṃ śaṃsasi me bhīṣmaṃ kiṃ nu duḥkhamataḥ param //

asakṛtkṣatriyavrātāḥ saṅkhye yena vinirjitāḥ . jāmadagnyena vīreṇa paravīranighātinā /
na hato yo mahābuddhiḥ sa hato'dya śikhaṇḍinā //

tasmānnūnaṃ mahāvīryādbhārgavādyuddhadurmadāt /
tejovīryabalairyūyāñśikhaṇḍī drupadātmajaḥ //

yaḥ śūraṃ kṛtinaṃ yuddhe sarvaśastraviśāradam /
paramāstravidaṃ vīraṃ jaghāna bhagtarṣabham //

ke vīrāstamamitraghnamanvayuḥ śastrasaṃsadi /
śaṃsa me tadyathā cāsīdyudbhaṃ bhīṣmasya pāṇḍavaiḥ //

yoṣeva hatavīrā me senma putrasya sañjaya /
agopamiva codbhrāntaṃ gokulaṃ tadbalaṃ mama //

pauruṣaṃ sarvalokasya paraṃ yasminmahāhave /
parāsakte ca vastasminkathamāsīnmanastadā //

jīvite'pyadya sāmarthyaṃ kimivāsmāsu sañjaya /
ghātayitvā mahāvīryaṃ pitaraṃ lokadhārmikam //

agādhe salile magnāṃ nāvaṃ dṛṣṭveva pāragāḥ /
bhīṣme hate bhṛśaṃ duḥkhānmanye śocanti putrakāḥ //

adrisāramayaṃ nūnaṃ hṛdayaṃ mama sañjaya /
yacchrutvā puruṣavyāghraṃ hataṃ bhīṣmaṃ na dīryate //

yasminnastrāṇi medhā ca nītiśca puruṣarṣabhe /
aprameyāṇi durdharṣe kathaṃ sa nihato yudhi //

na cāstreṇa na śauryeṇa tapasā medhayā na ca /
na dhṛtyā na punastyāgānmṛtyoḥ kaścidvimucyate //

kālo nūnaṃ mahāvīryaḥ sarvalokaduratyayaḥ /
yatra śāntanavaṃ bhīṣmaṃ hataṃ śaṃsasi sañjaya //

putraśokābhisantapto mahadduḥkhamacintayan /
āśaṃse'haṃ paraṃ trāṇaṃ bhīṣmācchāntanunandanāt //

yadādityamivāpaśyatpatitaṃ bhruvi sañjaya /
duryodhanaḥ śāntanavaṃ kiṃ tadā pratyapadmata //

nāhaṃ sveṣāṃ pareṣāṃ vā buddhyā sañjaya cintayan /
śeṣaṃ kiñcitprapaśyāmi pratyanīke mahīkṣitām //

dāruṇaḥ kṣatradharmo'yamṛṣibhiḥ sampradarśitaḥ /
yatra śāntanavaṃ hatvā rājyamicchanti pāṇḍavāḥ //

vayaṃ vā rājyamicchāmo ghātayitvā mahāvratam /
kṣatradharme sthitāḥ pārthā nāparādhyanti putrakāḥ //

etadāryeṇa kartavyaṃ kṛcchrāsvāpatsu sañjaya /
parākramaḥ parāśaktistattu tasminpratiṣṭhitam //

anīkāni vinighnantaṃ hrīmantamaparājitam /
kathaṃ śāntanavaṃ tātaṃ pāṇḍuputrā nyavārayan //

yathāyuktānyanīkāni kathaṃ yuddhaṃ mahātmabhiḥ /
kathaṃ vā nihato bhīṣmaḥ pitā sañjaya me paraiḥ //

duryodhanaśca karṇaśca śakuniścāpi saubalaḥ /
duḥśāsanaśca kitavo hate bhīṣme kimabruvan //

yaccharīrairupāstīrṇāṃ naravāraṇavājinām . śaraśaktimahākhaṅgatomarākṣāṃ mahābhayām /
prāviśankitavā mandāḥ sabhāṃ yuddhadurāsadām //

prāṇadyūte pratibhaye ke'dīvyanta nararṣabhāḥ . ke jīyante jitāstatra kṛtalakṣyā nipātitāḥ /
anye bhīṣmāccāntanavāttanmamācakṣva sañjaya //

na hi me śāntirastīha śrutvā devavrataṃ hatam /
pitaraṃ bhīmakarmāṇaṃ bhīṣmamāhavaśobhinam //

ārtiṃ me hṛdaye rūḍhāṃ mahatīṃ putrahānijām /
tvaṃ hi me sarpiṣevāgnimuddīpayasi sañjaya //

mahāntaṃ bhāramudyamya viśrutaṃ sārvalaukikam /
dṛṣṭvā vinihataṃ bhīṣmaṃ manye śocanti putrakāḥ //

śroṣyāmi tāni duḥkhāni duryodhanakṛtānyaham /
tasmānme sarvamācakṣva yadvṛttaṃ tatra sañjaya //

yadvṛttaṃ tatra sangrāme mandasyābuddhisambhavam /
apanītaṃ sunītaṃ yattanmamācakṣva sañjaya //

yatkṛtaṃ tatra sangrāme bhīṣmeṇa jayamicchatā /
tejoyuktaṃ kṛtāstreṇa śaṃsa taccāpyaśeṣataḥ //

yathā tadabhavadyuddhaṃ kurupāṇḍavasenayoḥ /
krameṇa yena yasmiṃśca kāle yacca yathā'bhavat //