Mahabharata · Chapter 6.13

atha gāvalgaṇirvidvānsaṃyugādetya bhārata /
pratyakṣadarśī sarvasya bhūtabhavyabhaviṣyavit //

dhyāyate dhṛtarāṣṭrāya sahasotpatya duḥkhitaḥ /
ācaṣṭa nihataṃ bhīṣmaṃ bharatānāṃ pitāmaham //
sañjaya uvāca /

sañjayo'haṃ mahārāja namaste bharatarṣabha /
hato bhīṣmaḥ śāntanavo bharatānāṃ pitāmahaḥ //

kakudaṃ sarvayodhānāṃ dhāma sarvadhanuṣmatām /
śaratalpagataḥ so'dya śete kurupitāmahaḥ //

yasya vīryaṃ samāśritya dyūtaṃ putrastavākarot /
sa śete nihato rājansaṃkhye bhīṣmaḥ śikhaṇḍinā //

yaḥ sarvānpṛthivīpālānsamavetānmahāmṛdhe /
jigāyaikarathenaiva kāśipuryāṃ mahārathaḥ //

jāmadagnyaṃ raṇe rāmaṃ yo'yudhyadapasambhramaḥ /
na hato jāmadagnyena sa hato'dya śikhaṇḍinā //

mahendrasadṛśaḥ śaurye sthairye ca himavāniva /
samudra iva gāmbhīryo sahiṣṇutve dharāsamaḥ //

śaradaṃṣṭro dhanurvakraḥ khaṅgijihvo durāsadaḥ /
narasiṃhaḥ pitā te'dya pāñcālyena nipātitaḥ //

pāṇḍavānāṃ mahāsainyaṃ yaṃ dṛṣṭvodyatamāhave /
prāvepata bhayodvignaṃ siṃha dṛṣṭveva gogaṇaḥ //

parirakṣya sa senāṃ te daśarātramanīkahā /
jagāmāstamivādityaḥ kṛtvā karma suduṣkaram //

yaḥ sa śakra ivākṣobhyo varṣanbāṇānsahasraśaḥ /
jaghāna yudhi yodhānāmarbudaṃ daśabhirdinaiḥ //

sa śete nihato bhūmau vātabhagna iva drumaḥ /
tava durmantrite rājanyathā nārhaḥ sa bhārata //