મહાભારત · અધ્યાય 6.13

અથ ગાવલ્ગણિર્વિદ્વાન્સંયુગાદેત્ય ભારત ।
પ્રત્યક્ષદર્શી સર્વસ્ય ભૂતભવ્યભવિષ્યવિત્ ॥

ધ્યાયતે ધૃતરાષ્ટ્રાય સહસોત્પત્ય દુઃખિતઃ ।
આચષ્ટ નિહતં ભીષ્મં ભરતાનાં પિતામહમ્ ॥
સઞ્જય ઉવાચ ।

સઞ્જયોઽહં મહારાજ નમસ્તે ભરતર્ષભ ।
હતો ભીષ્મઃ શાન્તનવો ભરતાનાં પિતામહઃ ॥

કકુદં સર્વયોધાનાં ધામ સર્વધનુષ્મતામ્ ।
શરતલ્પગતઃ સોઽદ્ય શેતે કુરુપિતામહઃ ॥

યસ્ય વીર્યં સમાશ્રિત્ય દ્યૂતં પુત્રસ્તવાકરોત્ ।
સ શેતે નિહતો રાજન્સંખ્યે ભીષ્મઃ શિખણ્ડિના ॥

યઃ સર્વાન્પૃથિવીપાલાન્સમવેતાન્મહામૃધે ।
જિગાયૈકરથેનૈવ કાશિપુર્યાં મહારથઃ ॥

જામદગ્ન્યં રણે રામં યોઽયુધ્યદપસમ્ભ્રમઃ ।
ન હતો જામદગ્ન્યેન સ હતોઽદ્ય શિખણ્ડિના ॥

મહેન્દ્રસદૃશઃ શૌર્યે સ્થૈર્યે ચ હિમવાનિવ ।
સમુદ્ર ઇવ ગામ્ભીર્યો સહિષ્ણુત્વે ધરાસમઃ ॥

શરદંષ્ટ્રો ધનુર્વક્રઃ ખઙ્ગિજિહ્વો દુરાસદઃ ।
નરસિંહઃ પિતા તેઽદ્ય પાઞ્ચાલ્યેન નિપાતિતઃ ॥

પાણ્ડવાનાં મહાસૈન્યં યં દૃષ્ટ્વોદ્યતમાહવે ।
પ્રાવેપત ભયોદ્વિગ્નં સિંહ દૃષ્ટ્વેવ ગોગણઃ ॥

પરિરક્ષ્ય સ સેનાં તે દશરાત્રમનીકહા ।
જગામાસ્તમિવાદિત્યઃ કૃત્વા કર્મ સુદુષ્કરમ્ ॥

યઃ સ શક્ર ઇવાક્ષોભ્યો વર્ષન્બાણાન્સહસ્રશઃ ।
જઘાન યુધિ યોધાનામર્બુદં દશભિર્દિનૈઃ ॥

સ શેતે નિહતો ભૂમૌ વાતભગ્ન ઇવ દ્રુમઃ ।
તવ દુર્મન્ત્રિતે રાજન્યથા નાર્હઃ સ ભારત ॥