Mahabharata · Chapter 6.118

asaṃvyūḍheṣvanīkeṣu bhūyiṣṭhamanuvartiṣu /
brahmalokaparāḥ sarve samapadyanta bhārata //

ca hyanīkamanīkeṣu samasañjata sankale /
rathā na rathibhiḥ sārdhaṃ pādātā na padātibhiḥ //

aśvā nāśvairayudhyanta gajā na gajayodhibhiḥ /
unmattavanmahārāja yudhyante tatra bhārata //

mahānvyatikaro raudraḥ senayoḥ samapadyata /
naranāgagaṇeṣvevaṃ vikīrṇeṣu ca sarvaśaḥ //

kṣaye tasminmahāraudre nirviśeṣamajāyata /
tataḥ śalyaḥ kṛpaścaiva citrasenaśca bhārata //

duḥśāsano vikarṇaśca rathānāsthāya bhāsvarān /
pāṇḍavānāṃ raṇe śūrā dhvajinīṃ samakampayan //

sā vadhyamānā samare pāṇḍusenā mahātmabhiḥ /
trātāraṃ nādhyagacchadvai mañjamāneva naurjaṃle //

yathā hi śaiśiraḥ kālo gavāṃ marmāṇi kṛntati / tathā pāṇḍusutānāṃ vai bhīṣmo marmāṇi kṛntati

tathaiva tava sainyasya pārthena ca mahātmanā /
navameghapratīkāśāḥ pātitā bahudhā gajāḥ //

mṛdyamānāśca dṛśyante pārthena narayūthapāḥ /
iṣubhistāḍyamānāśca nārācaiśca sahasraśaḥ //

peturārtasvaraṃ ghoraṃ kṛtvā tatra mahāgajāḥ /
ānaddhābharaṇaiḥ kāyairnihatānāṃ mahātmanām //

channamāyodhanaṃ reje śirobhiśca sakuṇḍalaiḥ . 6-118-12btasminneva mahārāja mahāvīravarakṣaye //

bhīṣme ca yudhi vikrānte pāṇḍave ca dhanañjaye /
te parākrāntamālokya rājanyudhi pitāmaham //

abhyavartanta te putrāḥ sarve sainyapuraskṛtāḥ /
icchanto nidhanaṃ yuddhe svargaṃ kṛtvā parāyaṇam //

pāṇḍavānabhyavartanta tasminvīravarakṣaye /
pāṇḍavāpi mahārāja smaranto vividhānbahūn //

kleśānkṛtānsaputreṇa tvayā pūrvaṃ narādhipa /
bhayaṃ tyaktvā raṇe śūrā brahmalokāya tatparāḥ //

tāvakāṃstava putrāṃśca yodhayanti prahṛṣṭavat /
senāpatistu samare prāha senāṃ mahārathaḥ //

abhidravata gāṅgeyaṃ somakāḥ sṛñjayaiḥ saha /
senāpativacaḥ śrutvā somakāḥ sṛñjayāśca te //

abhyadravanta gāṅgeyaṃ śaravṛṣṭyā samāhatāḥ /
vadhyamānastato rājanpitā śāntanavastava //

amarṣavaśamāpanno yodhayāmāsa sṛñjayān /
tasya kīrtimatastāta purā rāmeṇa dhīmatā //

sampradattā'straśikṣā vai parānīkavināśanī /
sa tāṃ vidyāmadhiṣṭhāya kurvantaparabalakṣayam //

ahanyahani pārthānāṃ vṛddhaḥ kurupitāmahaḥ /
bhīṣmo daśasahasrāṇi jaghāna paravīrahā //

tasmiṃstu daśame prāpte divase bharatarṣabha /
eko bhīṣmo hi matsyeṣu pāñcāleṣu ca saṃyuge //

gajāśvamamitaṃ hatvā hatvā sapta mahārathān /
hatvā pañcasahasrāṇi rathānāṃ pratipāmahaḥ //

narāṇāṃ ca mahāyuddhe sahasrāṇi caturdaśa /
dantināṃ ca sahasrāṇi hayānāmayutaṃ punaḥ //

śikṣabalena nyahanatpitā tava viśāmpate /
tataḥ sarvamahīpānāṃ kṣapayitvā varūthinīm //

virāṭasya priyo bhrātā śatānīko nipātitaḥ /
śatānīkaṃ ca samare hatvā bhīṣmaḥ pratāpavān //

sahasrāṇi mahārāja rājñāṃ bhallairapātayat /
udvignāḥ samare yodhā vikrośanti dhanañjayam //

ye ca kecana pārthānāmabhiyātā dhanañjayam /
rājāno bhīṣmamāsādya gatāste yamasādanam //

kirandaśa diśo bhīṣmaḥ śarajālaiḥ samantataḥ /
atītya senāṃ pārthānāmavatasthe camūmukhe //

sa kṛtvā sumahatkarma tasminvai daśame'hani /
senayorantare tiṣṭhanpragṛhītaśarāsanaḥ //

na cainaṃ pārthivāḥ kecicchaktā rājannirīkṣitum /
madhyaṃ prāptaṃ yathā grīṣme tapantaṃ bhāskaraṃ divi //

yathā daityacamūṃ śakrastāpayāmāsa saṃyuge /
tathā bhīṣmaḥ pāṇḍaveyāṃstāpayāmāsa bhārata //

tathā cainaṃ parākrāntamālokya madhusūdanaḥ /
uvāca devakīputraḥ prīyamāṇo dhanañjayam //

eṣa śāntanavo bhīṣmaḥ senayorantare sthitaḥ /
sannihatya balādenaṃ vijayaste bhaviṣyati //

balātsaṃstambhayasvainaṃ yatraiṣā bhidyate camūḥ /
na hi bhīṣmaśarānanyaḥ soḍhumutsahate vibho //

tatastasminkṣaṇe rājaṃścodito vānaradhvajaḥ /
sadhvajaṃ sarathaṃ sāśvaṃ bhīṣmamantardadhe śaraiḥ //

sa cāpi kurumukhyānāmṛṣabhaḥ pāṇḍaveritān /
saravrataiḥ śaravrātānbahudhā vidudhāva tān //

tataḥ pāñcālarājaśca dhṛṣṭaketuśca vīryavān /
pāṇḍavo bhīmasenaśca dhṛṣṭadyumnaśca pārṣataḥ //

yamau ca cekitānaśca kekayāḥ pañca caiva ha /
sātyakiśca mahābāhuḥ saubhadro'tha ghaṭotkacaḥ //

draupadeyāḥ śikhaṇḍī ca kuntibhojaśca vīryavān /
virāṭaśca mahārāja pāṇḍaveyā mahābalāḥ //

ete cānye ca bahavaḥ pīḍitā bhīṣmasāyakaiḥ /
samuddhṛtāḥ phalgunena nimagnāḥ śokasāgare //

tataḥ śikhaṇḍī vegena pragṛhya paramāyudham /
bhīṣmamevābhidudrāva rakṣyamāṇaḥ kirīṭinā //

tato'syānucarānhatvā sarvānraṇavibhāgavit /
bhīṣmamevābhidudrāva bībhatsuraparājitaḥ //

sātyakiścekitānaśca dhṛṣṭadyumnaśca pārṣataḥ /
virāṭo drupadaścaiva mādrīputrau ca pāṇḍavau //

dudruvurbhīṣmamevājau rakṣitā dṛḍhadhanvanā /
abhimanyuśca samare draupadyāḥ pañca cātmajāḥ //

dadṛśuḥ samare bhīṣmaṃ samudyatamahāyudham /
te sarve dṛḍhadhanvānaḥ saṃyugeṣvapalāyinaḥ //

bahudhā bhīṣmamānarcchurmārgaṇaiḥ kṣatamārgaṇaiḥ /
vidhūya tānbāṇagaṇānye muktāḥ pārthivottamaiḥ //

pāṇḍavānāmadīnātmā vyagāhata varūthinīm /
cakre śaravighātaṃ ca krīḍanniva pitāmahaḥ //

nābhisandhatta pāñcālye smayamāno muhurmuhuḥ /
strītvaṃ tasyānusaṃsmṛtya bhīṣmo bāṇāñśikhaṇḍine //

jaghāna drupadānīke rathānsapta mahārathaḥ /
tataḥ kilakilāśabdaḥ kṣaṇena samabhūttadā //

matsyapāñcālacedīnāṃ tamekamabhidhāvatām /
te narāśvarathavrātairmārgaṇaiśca parantapa //

tamekaṃ chādayāmāsurmeghā iva divākaram /
bhīṣmaṃ bhāgīrathīputraṃ pratapantaṃ raṇe ripūn //

tatastasya ca teṣāṃ ca yuddhe devāsuropame /
kirīṭī bhīṣmamānarccha puraskṛtya śikhaṇḍinam //