Mahabharata · Chapter 6.115

kathaṃ śāntanavo bhīṣmo daśame'hani sañjaya /
ayudhyata mahāvīryaḥ pāṇḍavaiḥ saha sṛjjayaiḥ //

kuravaśca kathaṃ yuddhe pāṇḍavānpratyavārayan /
ācakṣva me mahāyuddhaṃ bhīṣmasyāhavaśobhinaḥ //
sañjaya uvāca /

kuravaḥ pāṇḍavaiḥ sārdhaṃ yadayudhyanta bhārata /
yathā ca tadabhūdyuddhaṃ tattu vakṣyāmi sāmpratam //

gamitāḥ paralokāya paramāstraiḥ kirīṭinā /
ahanyahani samprāpte tāvakānāṃ mahārathāḥ //

yathāpratijñaṃ kauravyaḥ sa cāpi samitiñjayaḥ /
pārthānāmakarodbhīṣmaḥ satataṃ samiti kṣayam //

kurubhiḥ sahitaṃ bhīṣmaṃ yudhyamānaṃ parantapa /
arjunaṃ ca sapāñcālyaṃ dṛṣṭvā saṃśayitā janāḥ //

daśame'hani tasmiṃstu bhīṣmārjunasamāgame /
avartata mahāraudraḥ satataṃ samiti kṣayaḥ //

tasminnayutaśo rājanbhūyaśaśca parantapaḥ /
bhīṣmaḥ śāntanavo yodhāñjaghāna parāmāstravit //

yeṣāmajñātakalpāni nāmagotrāṇi pārthiva /
te hatāstatra bhīṣmeṇa śūrāḥ sarve'nivartinaḥ //

daśāhāni tathā taptvā bhīṣmaḥ pāṇḍavavāhinīm /
niravidyata dharmātmā jīvite sa parantapaḥ //

sa kṣipraṃ vadhamanvicchannātmano'bhisukhaṃ raṇe /
na hanyāṃ mānavaśreṣṭhānsangrāme'bhimukhāniti //

cintayitvā mahābāhuḥ pitā devavratastava /
abhyāśasthaṃ mahārāja pāṇḍavaṃ vākyamabravīt //
bhīṣma uvāca /

yudhiṣṭhira mahāprājña sarvaśāstraviśārada /
śṛṇuṣva vacanaṃ tāta dharmyaṃ svargyaṃ ca jalpataḥ //

nirviṣṇo'smi bhṛśaṃ tāta dehenānena bhārata /
ghnataśca me gataḥ kālaḥ subahūnprāṇino raṇe //

tasmātpārthaṃ purodhāya pāñcālānsṛjjayāṃstathā /
madvadhe kriyatāṃ yatno mama cedicchasi priyam //
sañjaya uvāca /

tasya tanmatamājñāya pāṇḍavaḥ satyadarśanaḥ /
bhīṣmaṃ prati yayau rājā sangrāme saha sṛñjayaiḥ //

dhṛṣṭadyumnastato rājanpāṇḍavaśca yudhiṣṭhiraḥ /
śrutvā bhīṣmasya tāṃ vācaṃ codayāmāsaturbalam //

abhidravadhyaṃ yuddhyadhvaṃ bhīṣmaṃ jayata saṃyuge /
rakṣitāḥ satyasandhena jiṣṇunā ripujiṣṇunā //

ayaṃ cāpi maheṣvāsaḥ pārṣato vāhinīpatiḥ /
bhīmasenaśca samare pālayiṣyati vo dhruvam //

mā vo bhīṣmādbhayaṃ kiñcidastvadya yudhi sṛñjayāḥ /
dhruvaṃ bhīṣmaṃ vijeṣyāmaḥ puraskṛtya śikhaṇḍinam //

te tathā samayaṃ kṛtvā daśame'hani pāṇḍavāḥ /
brahmalokaparā bhūtvā sañjagmuḥ krodhamūrcchitāḥ //

śikhaṇḍinaṃ puraskṛtya pāṇḍavaṃ ca dhanañjayam /
bhīṣmasya pātane yatnaṃ paramaṃ te samāsthitāḥ //

tatastva sutādiṣṭā nānājanapadeśvarāḥ /
droṇena sahaputreṇa sahasenā mahābalāḥ //

duḥśāsanaśca balavānsaha sarvaiḥ sahodaraiḥ /
bhīṣmaṃ samaramadhyasthaṃ pālayāñcakrire tadā //

tatastu tāvakāḥ śūrāḥ puraskṛtya mahāvratam /
śikhaṇḍipramukhānpārthānyodhayanti sma saṃyuge //

cedibhistu sapāñcālaiḥ sahito vānaradhvajaḥ /
yayau śāntanavaṃ bhīṣmaṃ puraskṛtya śikhaṇḍinam //

droṇaputraṃ śinernaptā dhṛṣṭaketustu pauravam /
abhimanyuḥ sahāmātyaṃ duryodhamayodhayat //

virāṭastu sahānīkaḥ sahasenaṃ jayadratham /
vṛddhakṣatrasya dāyādamāsasāda parantapa //

madrarājaṃ maheṣvāsaṃ sahasainyaṃ yudhiṣṭhiraḥ /
bhīmaseno'bhiguptastu nāgānīkamupādravat //

apradhṛṣyamanāvāryaṃ sarvaśastrabhṛtāṃ varam /
droṇaṃ prati yayau yattaḥ pāñcālyaḥ saha sodaraiḥ //

karṇikāradhvajaṃ caiva siṃhakaiturarindamaḥ /
pratyujjagāma saubhadraṃ rājaputro bṛhadbalaḥ //

śikhaṇḍinaṃ ca putrāste pāṇḍavaṃ ca dhanañjayam /
rājabhiḥ samare pārthamabhipeturjighāṃsavaḥ //

tasminnatimahābhīme senayorvai parākrame /
sampradhāvatsvanīkeṣu medinī samakampata //

tānyanīkānyanīkeṣu samayudhyanta bhārata /
tāvakānāṃ pareṣāṃ ca dṛṣṭvā śāntanavaṃ raṇe //

tatasteṣāṃ prayatatāmanyonyamabhidhāvatām /
prādurāsīnmahāśabdo dikṣu sarvāsu bhārata //

śaṅkhadundubhighoṣaśca vāraṇānāṃ ca bṛṃhitaiḥ /
siṃhanādaśca sainyānāṃ dāruṇaḥ samapadyata //

sā ca sarvanarendrāṇāṃ candrārkasadṛśī prabhā /
hārāṅgadakirīṭeṣu niṣprabhā samapadyata //

rajomeghāstu sañjajñuḥ śastravidyudbhirāvṛtāḥ /
dhanuṣāṃ cāpi nirghoṣo dāruṇaḥ samapadyata //

bāṇaśaṅkhapraṇādāśca bherīṇāṃ ca mahāsvanāḥ /
rathaghoṣaśca sañjajñe senayorubhayorapi //

prāsaśaktyṛṣṭisaṅghaiśca bāṇaughaiśca samākulam /
niṣprakāśamivākāśaṃ senayoḥ samapadyata //

anyonyaṃ rathinaḥ peturvājinaśca mahāhave /
kuñjarānkuñjarā jaghnuḥ pādātāṃśca padātayaḥ //

tatrāsītsumahadyuddhaṃ kurūṇāṃ pāṇḍavaiḥ saha /
bhīṣmahetornaravyāghra śyenayorāmiṣe yathā //

tayoḥ samāgamo ghoro babhūva yudhi bhārata /
anyonyasya vadhārthāya jigīṣūṇāṃ mahāhave //