Mahabharata · Chapter 6.114

arjunastu raṇe śalyaṃ yatamānaṃ mahāratham /
chādayāmāsa samare śaraiḥ sannataparvabhiḥ //

suśarmāṇaṃ kṛpaṃ cava tribhīstribhiravidhyata /
prāgjyotiṣaṃ ca samare saindhavaṃ ca jayadratham //

citrasenaṃ vikarṇaṃ ca kṛtavarmāṇameva ca /
durmarṣaṇaṃ ca rājendra hyāvantyau ca mahārathau //

ekaikaṃ tribhirānarcchatkaṅkabarhiṇavājitaiḥ /
śarairatiratho yuddhe pīḍayanvāhinīṃ tava //

jayadratho raṇe pārthaṃ viddhvā bhārata sāyakaiḥ /
bhīmaṃ vivyādha tarasā citrasenarathe sthitaḥ //

śalyaśca samare jiṣṇuṃ kṛpaśca rathināṃ varaḥ //
vivyādhāte mahārāja bahudhā marmamedibhiḥ //

citrasenādayaścaiva putrāstava viśāmpate /
pañcābhiḥ pañcabhistūrṇaṃ suṃyuge niśitaiḥ śaraiḥ //

ājaghnurarjunaṃ saṅkhye bhīmasenaṃ ca māriṣa /
tau tatra rathināṃ śreṣṭhau kaunteyau bharatarṣabhau //

apīḍayetāṃ samare trigartānāṃ mahadbalam /
suśarmāṇi raṇe pārthaṃ śarairnavabhirāśugaiḥ //

nanāda balavannādaṃ trāsayāno mahadbalam /
anye ca rathinaḥ śūrā bhīmasenadhanañjayau //

vivyadhurniśitairbāṇai rukmapuṅkhairajihmagaiḥ /
teṣāṃ ca rathināṃ madhye kaunteyau bharatarṣabhau //

krīḍamānau rathodārau citrarūpau vyadṛśyatām /
āmiṣepsū gavāṃ madhye siṃhāviva madotkaṭau //

chittvā dhanūṃṣi śūrāṇāṃ śarāṃśca bahudhā raṇe /
pātayāmāsaturvīrau śirāṃsi śataśo nṛṇām //

rathāśca bahavo bhagnā hayāśca śataśo hatāḥ /
gajāśca sagajārohāḥ petururvyāṃ mahāhave //

rathinaḥ sādinaścāpi tatratatra niṣūditāḥ /
dṛśyante bahavo rājanveṣamānāḥ samantataḥ //

hatairgajapadātyoghairvājibhiśca niṣūditaiḥ /
rathaiśca bahudhā bhagnaiḥ samāstīryata medinī //

chatraiśca bahudhā cchinnairdhvajaiśca vinipātitaiḥ /
aṅkuśairapaviddhaiśca paristomaiśca bhārata //

keyūrairaṅgadairhārai rāṅkavairmṛditaistathā /
uṣṇīṣairṛṣṭibhiścaiva cāmaravyajanairapi //

tatratatrāpaviddhaiśca bāhubhiścandanokṣitaiḥ /
ūrubhiśca narendrāṇāṃ samāstīryata medinī //

tatrādbhutamapaśyāma raṇe pārthasya vikramam /
śaraiḥ saṃvārya tānvīrānyajjaghāna mahābalaḥ //

putrastu tava taṃ dṛṣṭvā bhīmārjunaparākramam /
gāṅgeyasya rathābhyāśamupajagme mahābalaḥ //

kṛpaśca kṛtavarmā ca saindhavaśca jayadrathaḥ /
vindānuvindāvāvantyau nājahuḥ saṃyugaṃ tadā //

tato bhīmo maheṣvāsaḥ phalgunaśca mahārathaḥ /
kauravāṇāṃ camūṃ ghorāṃ bhṛśaṃ dudruvatū raṇe //

tato barhiṇavājānāmayutānyarbudāni ca /
dhanañjayarathe tūrṇaṃ pātayanti sma bhūmipāḥ //

tatastañśarajālena sannivārya mahārathān /
pārthaḥ samantātsamare preṣayāmāsa mṛtyave //

śalyastu samare jiṣṇuṃ krīḍanniva mahārathaḥ /
ājaghānorasi kruddho bhallaiḥ sannataparvabhiḥ //

tasya pārtho dhanuśchittvā hastāvāpaṃ ca pañcabhiḥ /
athainaṃ sāyakaistīkṣṇairbhṛśaṃ vivyādha marmaṇi //

athānyaddhanurādāya samare bhārasādhanam /
madreśvaro raṇe jiṣṇuṃ tāḍayāmāsa roṣitaḥ //

tribhiḥ śarairmahārāja vāsudevaṃ kaca pañcabhiḥ /
bhīmasenaṃ ca navabhirbāhvorurasi cārpayat //

tato droṇo mahārāja māgadhaśca mahārathaḥ /
duryodhanasamādiṣṭau taṃ deśamupajagmatuḥ //

yatra pārtho mahārāja bhīmasenaśca pāṇḍavaḥ /
kauravyasya mahāsenāṃ jaghnutuḥ sumahārathau //

jayatsenastu samare bhīmaṃ bhīmāyudhaṃ yudhi /
vivyādha niśitairbāṇairaṣṭabhirbharatarṣabha //

taṃ bhīmo daśabhirviddhā punarvīvyādha pañcabhiḥ /
sārathiṃ cāsya bhallena rathanīḍādapātayat //

udbhrāntaisturagaiḥ so'tha dravamāṇaiḥ samantataḥ /
māgadho'pasṛto rājā sarvasainyasya paśyataḥ //

droṇaśca vivaraṃ dṛṣṭvā bhīmasenaṃ śilīmukhaiḥ /
vivyādha bāṇairniśitaiḥ pañcaṣaṣṭibhirāyasaiḥ //

taṃ bhīmaḥ samaraślāghī guruṃ pitṛsamaṃ raṇe /
vivyādha pañcabhirbhallaistathā ṣaṣṭyā ca bhārata //

arjunastu suśarmāṇaṃ viddhvā bahubhirāyasaiḥ /
vyadhamattasya tatsainyaṃ mahābhrāṇi yathā'nilaḥ //

tato bhīṣmaśca rāja ca kausalyaśca bṛhadbalaḥ /
samavartanta sankruddhā bhīmasenadhanañjayau //

tathaiva pāṇḍavāḥ śūrā dhṛṣṭadyumnaśca pārṣataḥ /
abhyadravanraṇe bhīṣmaṃ vyāditāsyamivāntakam //

śikhaṇḍī tu samāsādya bharatānāṃ pitāmaham /
abhyadravata saṃhṛṣṭo bhayaṃ tyaktvā mahārathāt //

yudhiṣṭhiramukhāḥ pārthāḥ puraskṛtya śikhaṇḍinam /
ayodhayanraṇe bhīṣmaṃ sahitāḥ sarvasṛñjayaiḥ //

tathaiva tāvakāḥ sarve puraskṛtya yatavratam /
śikhaṇḍipramukhānpārthānyodhayanti sma saṃyuge //

tataḥ pravavṛte yuddhaṃ kauravāṇāṃ bhayāvaham /
tatra pāṇḍusutaiḥ sārdhaṃ bhīṣmasya vijayaṃ prati //

tāvakānāṃ jaye bhīṣmo glaha āsīdviśāmpate /
tatra hi dyūtamāsaktaṃ vijayāyetarāya vā //

dhṛṣṭadyumnastu rājendra sarvasainyānyacodayat /
abhyadravata gāṅgeyaṃ mā bhaiṣṭa rathasattamāḥ //

senāpativacaḥ śrutvā pāṇḍavānāṃ varūthinī /
bhīṣmaṃ samabhyayāttūrṇaṃ prāṇāṃstyaktvā mahāhave //

bhīṣmo'pi rathināṃ śreṣṭhaḥ pratijagrāha tāṃ camūm /
āpatantīṃ mahārāja velāmiva mahodadhiḥ //