Mahabharata · Chapter 6.113

bhagadattaḥ kṛpaḥ śalyaḥ kṛtavartā tathaiva ca /
vindānuvindāvāvantyau saindhavaśca jayadrathaḥ //

citraseno vikarṇaśca tathā durmarṣaṇo yuvā /
daśaite tāvakā yodhā bhīmasenamayodhayan //

mahatyā senayā yuktā nānādeśasamutthayā /
bhīṣmasya samare rājanprārthayānā mahadyaśaḥ //

śalyastu navabhirbāṇairbhīmasenamatāḍayat /
kṛtavarmā tribhirbhāṇaiḥ kṛpaśca navabhiḥ śaraiḥ //

citraseno vikarṇaśca bhagadattaśca māriṣa /
daśabhirdaśabhirbāṇairbhīmasenamatāḍayan //

saindhavaśca tribhirbāṇairbhīmasenamaḍāyat /
vindānuvindāvāvantyau pañcabhiḥ pañcabhiḥ śaraiḥ //

durmarṣaṇastu viṃśatyā pāṇḍavaṃ niśitaiḥ śaraiḥ /
sa tānsarvānmahārāja rājamānānpṛthakpṛthak //

pravīrānsarvalokasya dhārtarāṣṭrānmahārathān /
jaghāna samare vīraḥ pāṇḍavaḥ paravīrahā //

saptabhiḥ śalyamāvidhyatkṛtavarmāṇamaṣṭabhiḥ /
kṛpasya saśaraṃ cāpaṃ madhye ciccheda bhārata //

athainaṃ cchinnadhanvānaṃ punarvivyādha saptabhiḥ /
vindānuvindau ca tathā tribhistribhiratāḍayat //

durmarṣaṇaṃ ca viṃśatyā citrasenaṃ ca pañcabhiḥ /
vikarṇaṃ daśabhirbāṇaiḥ pañcabhiśca jayadratham //

viddhvā bhīmo'nadaddhṛṣṭaḥ saindhavaṃ ca punastribhiḥ /
athānyaddhanurādāya gautamo rathināṃ varaḥ //

bhīmaṃ vivyādha saṃrabdho daśabhirniśitaiḥ śaraiḥ /
sa viddho daśabhirbāṇaistotrairiva mahādvipaḥ //

tataḥ kruddho mahārāja bhīmasenaḥ pratāpavān /
gautamaṃ tāḍayāmāsa śarairbahubhirāhave //

saindhavasya tathā'śvāṃśca sārathiṃ ca tribhiḥ śaraiḥ /
prāhiṇonmṛtyulokāya kālāntakasamadyutiḥ //

hatāśvāttu rathāttūrṇamavaplutya mahārathaḥ /
śarāṃścikṣepa niśitānbhīmasenasya saṃyuge //

tasya bhīmo dhanurmadhye dvābhyāṃ ciccheda māriṣa /
bhallābhyāṃ bharataśreṣṭha saindhavasya mahātmanaḥ //

sa cchinnadhanvā viratho hatāśvo hatasārathiḥ /
citrasenarathaṃ rājannāruroha tvarānvitaḥ //

atyadbhutaṃ raṇe karma kṛtavāṃstatra pāṇḍavaḥ /
mahārathāñśarairviddhvā vārayitvā ca māriṣa //

virathaṃ saindhavaṃ cakre sarvalokasya paśyataḥ /
tadā na mamṛṣe śalyo bhīmasesya vikramam //

sa sandhāya śarāṃstīkṣṇānkaramāraparimārjitān /
bhīmaṃ vivyādha samare tiṣṭhitiṣṭheti cābravīt //

kṛpaśca kṛtavarmāca bhagadattaśca vīryavān /
vindānuvindāvāvantyau citrasenaśca saṃyuge //

durmarṣaṇo vikarṇaśca sindhurājaśca vīryavān /
bhīmaṃ te vivyadhustūrṇaṃ śalyahetorarindamāḥ //

sa ca tānprati vivyādha pañcabhiḥ pañcabhiḥ śaraiḥka /
śalyaṃ vivyādha saptatyā punaśca daśabhiḥ śaraiḥ //

taṃ śalyo navabhirbhittvā punarvivyādha pañcabhiḥ /
sārathiṃ cāsya bhallena gāḍhaṃ vivyādha marmaṇi //

viśokaṃ prekṣya nirbhinnaṃ bhīmasenaḥ pratāpavān /
madrarājaṃ tribhirbāṇairbāhvorurusi cārpayat //

tathetarānmaheṣvāsāṃstribhistribhirajihmagaiḥ /
tājayāmāsa samare siṃhavādvinanāda ca //

te hi yattā maheṣvāsāḥ pāṇḍavaṃ yuddhakovidam /
tribhistribhirakuṇṭhāgrairbhṛśaṃ marmasvatāḍayan //

so'tividdho maheṣvāso bhīmaseno na vivyathe /
parvato vāridhārābhirvarṣamāṇairivāmbudaiḥ //

sa tu krodhasamāviṣṭaḥ pāṇḍavānāṃ mahārathaḥ /
madreśvaraṃ tribhirbāṇairbhṛśaṃ viddhvā mahāyaśāḥ //

kṛpaṃ ca navabhirbāṇairbhṛśaṃ viddhvā samantataḥ /
pragjyotiṣaṃ śatairājau rājanvivyādha sāyakaiḥ //

tatastu saśaraṃ cāpaṃ sātvatasya mahātmanaḥ /
kṣurapreṇa sutīkṣṇena ciccheda kṛtahastavat //

tathānyaddhanurādāya kṛtavarmā vṛkodaram /
ājaghāna bhruvormadhye nārācena parantapaḥ //

bhīmastu samare viddhvā śalyaṃ navabhirāyasaiḥ /
bhagadattaṃ tribhiścaiva kṛtavarmāṇamaṣṭabhiḥ //

dvābhyāṃ dvābhyāṃ tu vivyādha gautamaprabhṛtīnrathān /
te'pi taṃ samare rājanvivyadhurniśitaiḥ śaraiḥ //

sa tathā pīḍyamāno'pi sarvaśastrairmahārathaiḥ /
matvā tṛṇena tāṃstulyānvicacāra gatavyathaḥ //

te cāpi rathināṃ śreṣṭhā bhīmāya niśitāñśarān /
preṣayāmāsuravyāgrāḥ śataśo'tha sahasraśaḥ //

tasya śaktiṃ mahāvegāṃ bhagadatto mahārathaḥ /
cikṣepa samare vīraḥ svarṇadaṇḍāṃ mahamate //

tomaraṃ saindhavo rājā paṭṭasaṃ ca mahābhujaḥ /
śataghnīṃ ca kṛpo rājañcharaṃ śalyaśca saṃyuge //

athetare maheṣvāsāḥ pañca pañca śilīmukhān /
bhīmasenaṃ samuddiśya preṣayamāsurojasā //

tomaraṃ ca dvidhā cakre kṣurapreṇānilātmajaḥ /
paṭṭasaṃ ca tribhirbāṇaiściccheda tilakāṇḍavat //

sa bibheda śataghnīṃ ca navabhiḥ kaṅkapatribhiḥ /
madrarājaprayuktaṃ ca śaraṃ chittvā mahārathaḥ //

śaktiṃ ciccheda sahasā bhagadatteritāṃ raṇe /
tathetarāñśarānghorāñśaraiḥ sannataparvabhiḥ //

bhīmaseno raṇaślāghī tridhaikaikaṃ samācchinat /
tāṃśca sarvānmaheṣvāsāṃstribhistribhiratāḍayat //

tato dhanañjayastatra vartamāne mahāraṇe /
ājagāma rathenājau bhīmaṃ dṛṣṭvā mahāratham //

nighnantaṃ samare śatrūnyodhayānaṃ ca sāyakaiḥ /
tau tu tatra mahātmānau sametau vīkṣya pāṇḍavau //

na śaśaṃsurjayaṃ tatra tāvakāḥ puruṣarṣabhāḥ /
athārjuno raṇe bhīmaṃ yodhayantaṃ mahārathān //

bhīṣmasya nidhanākāṅkṣī puraskṛtya śikhaṇḍinam /
āsasāda raṇe vīrāṃstāvakāndaśa bhārata //

ye sma bhīmaṃ raṇe rājanyodhayanto vyavasthitāḥ /
bībhatsustānathāvidhyadbhīmasya priyakāmyayā //

tato duryodhano rājā suśarmāṇamacodayat /
arjunasya vadhārthāya bhīmasenasya cobhayoḥ //

suśarmangaccha śīghraṃ tvaṃ balaughaiḥ parivāritaḥ /
jahi pāṇḍusutāvetau dhanañjayavṛkodarau //

tacchrutvā vacanaṃ tasya traigartaḥ prasthalādhipaḥ /
abhidrutya raṇe bhīmamarjunaṃ caiva dhanvinau //

rathairanekasāhasraiḥ samantātparyavārayat /
tataḥ pravavṛte yuddhamarjunasya paraiḥ saha //