Mahabharata · Chapter 6.112

atha vīro maheṣvāso mattavāraṇavikramaḥ /
samādāya mahaccāpaṃ mattavāraṇavāraṇam //

vidhunvāno naraśreṣṭho drāvayāṇo varūthinīm /
pṛtanāṃ pāṇḍaveyānāṃ gāhamāno mahābalaḥ //

nimittāni nimittajñaḥ sarvato vīkṣya vīryavān /
pratapantamanīkāni droṇaḥ putramabhāṣata //
droṇa uvāca /

ayaṃ hi divasastāta yatra pārtho mahābalaḥ /
jighāṃsuḥ samare bhīṣmaṃ paraṃ yatnaṃ kariṣyati //

utpatanti hi me bāṇā dhanuḥ prasphuratīva ca /
yogamastrāṇi necchanti krūraṃ me vartate manaḥ //

dikṣvaśāntāni ghorāṇi vyāharanti mṛgadvijāḥ /
nīcairgṛdhrā nilīyante bhāratānāṃ camūṃ prati //

naṣṭaprabha ivādityaḥ sarvato lohitā diśaḥ /
rasate vyathate bhūmiḥ kampatīva ca sarvaśaḥ //

kaṅkagṛdhrā balākāśca vyāharanti muhurmuhuḥ /
śivāścaivāśivā ghorā vedayantyo mahadbhayam //

papāta mahatī colkā madhyenādityamaṇḍalāt /
sakabandhaśca parigho bhānumāvṛtya tiṣṭhati //

pariveṣastathā ghoraścandrabhāskarayorabhūt /
vedayāno bhayaṃ ghoraṃ rājñāṃ dehāvakartanam //

devatāyatanasthāśca kauravendrasya devatāḥ /
kampante ca hasante ca nṛtyanti ca rudanti ca //

apasavyaṃ grahāścakruralakṣmāṇaṃ divākaram /
avākśirāśca bhagavānupātiṣṭhata candrakamāḥ //

vapūṃṣi ca narendrāṇāṃ vigatābhāni lakṣaye /
dhārtarāṣṭrasya sainyeṣu na ca bhrājanti daṃśitāḥka //

senayorubhayoścāpi samantācchrūyate mahān /
pāñcajanyasya nirghoṣo gāṇḍīvasya ca niḥsvanaḥ //

dhruvamāsthāya bībhatsuruttamāstrāṇi saṃyuge /
apāsyānyānraṇe yodhānabhyeṣyati pitāmaham //

hṛṣyanti romakūpāṇi sīdatīva ca me manaḥ /
cintayitvā mahābāho bhīṣmārjunasamāgamam //

taṃ ceha nikṛtiprajñaṃ pāñcālyaṃ pāpacetasam /
puraskṛtya raṇe pārtho bhīṣmasyāyodhanaṃ gataḥ //

abravīcca purā bhīṣmo nāhaṃ hanyāṃ śikhaṇḍinam /
strī hyeṣā vihitā dhātrā daivācca sa punaḥ pumān //

asankalpadhvajaścaiva yājñasenirmahābalaḥ /
na cāmaṅgalike tasminpraharedāpagāsutaḥ //

etadvicintayānasya prajñā sīdati me bhṛśam /
abhyudyato raṇe pārthaḥ kuruvṛddhamupādravat //

yudhiṣṭhirasya ca krodho bhīṣmaścārjunasangataḥ /
mama cāstrasamārambhaḥ prajānāmaśivaṃ dhruvam //

manasvī balavāñśūraḥ kṛtāstro'laghuvikramaḥ /
dūrapātī dṛḍheṣuśca nimittajñaśca pāṇḍavaḥ //

ajeyaḥ samare cāpi devairapi savāsavaiḥ /
balavānbuddhimāṃścaiva jitakleśo yudhāṃ varaḥ //

vijayī ca raṇe nityaṃ bhairavāstraśca pāṇḍavaḥ . 6-112-24babhyudyataṃ raṇe dṛṣṭvā bhairavāstraṃ ca pāṇḍavam /
tasya mārgaṃ pariharandrutaṃ gaccha yatavrata //

paśyādyaitanmahāghore saṃyuge vaiśasaṃ mahat /
hemacitrāṇi śūraṇāṃ mahānti ca śubhāni ca //

kavacānyavadīryante śaraiḥ sannataparvabhiḥ /
chidyante ca dhvajāgrāṇi tomarāśca dhanūṃṣi ca //

prāsāśca vimalāstīkṣṇāḥ śaktyaśca kanakojjvalāḥ /
vaijayantyaśca nāgānāṃ sankruddhena kirīṭinā //

nāyaṃ saṃrakṣituṃ kālaḥ prāṇānputropajīvibhiḥ /
yāhi svargaṃ puraskṛtya yaśase vijayāya ca //

rathanāgahayāvartāṃ mahāghorāṃ sudurgamām /
rathena sangrāmanadīṃ taratyeṣa kapidhvajaḥ //

brahmaṇyatā damo dānaṃ tapaśca caritaṃ mahat /
ihaiva dṛśyate pārthe bhrātā yasya dhanañjayaḥ //

bhīmasenaśca balavānmādrīputrau ca pāṇḍavau /
vāsudevaśca vārṣṇeyo yasya nātho vyavasthitaḥ //

tasyaiṣa manyuprabhavo dhārtarāṣṭrasya durmateḥ /
tapobhāvitadehasya kopo dahati vāhinīm //

eṣa sandṛśyate pārtho vāsudevavyapāśrayaḥ /
dārayansarvasainyāni dhārtarāṣṭrāṇi sarvaśaḥ //

etadālokyate sainyaṃ kṣobhyamāṇaṃ kirīṭinā /
mahorminaddhaṃ sumahattimineva mahājalam //

hāhākilakilāśabdāḥ śrūyante ca camūmukhe /
yāhi pāñcāladāyādamahaṃ yāsye yudhiṣṭhiram //

durgamaṃ hyantaraṃ rājño vyūhasyāmitatejasaḥ /
samudrakukṣipratimaṃ sarvato'tirathaiḥ sthitaiḥ //

sātyakiścābhimanyuśca dhṛṣṭadyumnavṛkodarau /
paryarakṣanta rājānaṃ yamau ca manujeśvaram //

upendrasadṛśaśyāmo mahāśāla ivodgataḥ /
eṣa gacchatyanīkāgre dvitīya iva phalgunaḥ //

uttamāstrāṇi cādhatsva gṛhītvā ca mahaddhanuḥ /
pārṣataṃ yāhi rājānaṃ yudhyasva ca vṛkodaram //

ko hi necchetpriyaṃ putraṃ jīvantaṃ śāśvatīḥ samāḥ /
kṣatradharmaṃ tu samprekṣya tatastvāṃ niyunajmyaham //

eṣa cātiraṇe bhīṣmo dahate vai mahācamūm /
yuddheṣu sadṛśastāta yamasya varuṇasya ca //
sañjaya uvāca /

putraṃ samanuśāsyaivaṃ bhāradvājaḥ pratāpavān /
mahāraṇe mahārāja dharmarājamayodhayat //