Mahabharata · Chapter 6.111

sātyakiṃ daṃśitaṃ yuddhe bhīṣmāyābhyudyataṃ raṇe /
ārśyaśṛṅgirmaheṣvāso vārayāmāsa saṃyuge //

mādhavastu susankruddho rākṣasaṃ navabhiḥ śaraiḥ /
ājaghāna raṇe rājanprahasanniva bhārata //

tathaiva rākṣaso rājanmādhavaṃ navabhiḥ śaraiḥ /
ardayāmāsa rājendra sankruddhaḥ śinipuṅgavam //

śaineyaḥ śarasaṅghaṃ tu preṣayāmāsa saṃyuge /
rākṣasāya susankruddho mādhavaḥ paravīrahā //

tato rakṣo mahābāhuṃ sātyakiṃ satyavikramam /
vivyādha viśikhaistīkṣṇaiḥ siṃhanāda nanāda ca //

mādhavastu bhṛśaṃ viddho rākṣasena raṇe tadā /
dhairyamālambya tejasvī jahāsa ca nanāda ca //

bhagadattastataḥ kruddho mādhavaṃ niśitaiḥ śaraiḥ /
tāḍayāmāsa samare totrairiva mahāgajam //

vihāya rākṣasaṃ yuddhe śaineyo rathināṃ varaḥ /
prāgjyotiṣāya cikṣepa śarānsannataparvaṇaḥ //

tasya prāgjyotiṣo rājā mādhavasya mahaddhanuḥ /
ciccheda śatadhāreṇa bhallena kṛtahastavat //

athānyaddhanurādāya vegavatparavīrahā /
bhagadattaṃ raṇe kruddhaṃ vivyādha niśitaiḥ śaraiḥ //

so'tividdho maheṣvāsaḥ sṛkkiṇī parisaṃlihan /
śaktiṃ kanakavaiḍūryabhūṣitāmāyasīṃ dṛḍhām //

yamadaṇḍopamāṃ ghorāṃ cikṣepa paramāhave /
tāmāpatantīṃ sahasā tasya bāhubaleritām //

sātyakiḥ samare rājandvidhā ciccheda sāyakaiḥ /
tataḥ papāta sahasā saholkeva hataprabhā //

śaktiṃ vinihatāṃ dṛṣṭvā putrastava viśāmpate /
mahatā rathavaṃśena vārayāmāsa mādhavam //

tathā parivṛtaṃ dṛṣṭvā vārṣṇeyānāṃ mahāratham /
duryodhano bhṛśaṃ kruddho bhrātṝnsarvānuvāca ha //

tathā kuruta kauravyā yathāḥ vaḥ sātyako yudhi /
na jīvanpratiniryāti mahato'smādrathavrajāt //

tasminhate hataṃ manye pāṇḍavānāṃ mahadbalam /
tatheti ca vacastasya parigṛhya mahārathāḥ //

śaineyaṃ yodhayāmāsarbhīṣmāyābhyudyataṃ raṇe / abhimanyuṃ tadā'yāntaṃ bhīṣmasyābhyudyataṃ vadhe /
kāmbhojarājo balavānvārayāmāsa saṃyuge //

ārjuniṃ nṛpatirviddhvā śaraiḥ sannataparvabhiḥ /
punareva catuḥṣaṣṭyā rājanvivyādha taṃ nṛpa //

sudakṣiṇastu samare punarvivyādha taṃ pañcabhiḥ /
sārathiṃ cāsya navabhiricchanbhīṣmasya jīvitam //

tadyuddhamāsītsumahattayostatra samāgame /
yadābhyadhāvadgāṅgeyaṃ śikhaṇḍī śatrukarśanaḥ //

virāṭadrupadau vṛddhau vārayanatau mahācamūm /
bhīṣmaṃ ca yudhi saṃrabdhāvādravantau mahārathau //

aśvatthāmā raṇe kruddhaḥ samiyādrathasattamaḥ /
tataḥ pravavṛte yuddhaṃ tayostasya ca bhārata //

virāṭo daśabhirbhallairājaghāna parantapa /
yatamānaṃ maheṣvāsaṃ drauṇimāhavaśobhinam //

drupadaśca tribhirbāṇairvivyādha niśitaistadā /
guruputraṃ samāsādya praharantau mahābalau //

aśvatthāmā tatastau tu vivyādha bahubhiḥ śaraiḥ /
virāṭadrupadau vīrau bhīṣmaṃ prati samudyatau //

tatrādbhutamapaśyāma vṛddhayoścaritaṃ mahat /
yaddrauṇisāyakānghorānpratyavārayatāṃ yudhi //

sahadevaṃ tathā'yāntaṃ kṛpaḥ śāradvato'bhyayāt /
yathā nāgo vane nāgaṃ matto mattamupādravat //

kṛpaśca samare śūro mādrīputraṃ mahāratham /
ājaghāna śaraistūrṇaṃ saptatyā rukmabhūṣaṇaiḥ //

tasya mādrīsutaścāpaṃ dvidhā ciccheda sāyakaiḥ /
athainaṃ chinnadhanvānaṃ vivyādha navabhiḥ śaraiḥ //

so'nyatkārmukamādāya samare bhārasādhanam /
mādrīputraṃ susaṃhṛṣṭo daśabhirniśitaiḥ śaraiḥ //

ājaghānorasi kruddha icchanbhīṣmasya jīvitam /
tathaiva pāṇḍavo rājañchāradvatamamarṣaṇam //

ājaghānorasi kruddho bhīṣmasya vadhakāṅkṣayā /
tayoryuddhaṃ samabhavaddhorarūpaṃ bhayāvaham //

nakulaṃ tu raṇe kruddho vikarṇaḥ śatrutāpanaḥ /
vivyādha sāyakaiḥ ṣaṣṭyā rakṣanbhīṣmaṃ mahābalam //

nakulo'pi bhṛśaṃ viddhastava putreṇa dhīmatā /
vikarṇaṃ saptasaptatyā nirbibheda śilīmukhaiḥ //

tatra tau naraśārdūlau bhīṣmahetoḥ parantapau /
anyonyaṃ jaghnuturvīrau goṣṭhe govṛṣabhāviva //

ghaṭotkacaṃ raṇe yāntaṃ nighnantaṃ tava vāhinīm /
durmukhaḥ samare prāyādbhīṣyahetoḥ parākramī //

haiḍimbastu raṇe rājandurmukhaṃ śatrutāpanam /
ājaghānorasi kruddhaḥ śareṇānataparvaṇā //

bhīmasenasutaṃ cāpi durmukhaḥ sumukhaiḥ śaraiḥ /
ṣaṣṭyā vīro nadanhṛṣṭo vivyādha raṇamūrdhani //

dhṛṣṭadyumnaṃ tathā'yāntaṃ bhīṣmasya vadhakāṅkṣiṇam /
hārdikyo vārayāmāsa rathaśreṣṭhaṃ mahārathaḥ //

hārdikyaḥ pārṣataṃ cāpi viddhvā pañcabhirāyasaiḥ /
punaḥ pañcāśatā tūrṇaṃ tiṣṭhatiṣṭheti cābravīt //

ājaghāna mahābāhuḥ pārṣataṃ taṃ mahāratham /
taṃ caiva pārṣato rājanhārdikyaṃ navabhiḥ śaraiḥ //

vivyādha niśitaistīkṣṇaiḥ kaṅkapatrairajihnagaiḥ /
tayoḥ samabhavadyuddhaṃ bhīṣmahetormahāhave //

anyonyātiśaye yuktaṃ yathā vṛtramahendrayoḥ /
bhīmasenaṃ tathā'yāntaṃ bhīṣmaṃ prati mahāratham //

bhūriśravābhyayāttūrṇaṃ tiṣṭhatiṣṭheti cābravīt /
saumadattiratho bhīmamājaghāna stanāntare //

nārācena sutīkṣṇena rukmapuṅkhena saṃyuge /
uraḥsthena babhau tena bhīmasenaḥ pratāpavān //

skandaśaktyā yathā krauñcaḥ purā nṛpatisattama /
tau śarānsūryasankāśānkarmāraparimārjitān //

anyonyasya raṇe kruddhau cikṣipate nararṣabhau /
bhīmo bhīṣmavadhākāṅkṣī saumadattiṃ mahāratham //

tathā bhīṣmajaye gṛdhnuḥ saumadattistū pāṇḍavam /
kṛtapratikṛte yattau yodhayāmāsatū raṇe //

yudhiṣṭhiraṃ tu kaunteyaṃ mahatyā senayā vṛttam /
bhīṣmābhimukhamāyāntaṃ bhāradvājo nyavārayat //

droṇasya rathanirghoṣaṃ parjanyaninadopamam /
śrutvā prabhadrakā rājansamakampanta māriṣa //

sā senā mahatī rājanpāṇḍuputrasya saṃyuge /
droṇena vāritā yattā na cacāla padātpadam //

cekitāna raṇe yattaṃ bhīṣmaṃ prati janeśvara /
citrasenastava sutaḥ kruddharūpamavārayat //

bhīṣmahetoḥ parākrāntaścitrasenaḥ parākramī /
cekitānaṃ paraṃ śaktyā yodhayāmāsa bhārata //

tathaiva cekitāno'pi citrasenamavārayat /
tadyuddhamāsītsumahattayostatra samāgame //

arjuno vāryamāṇastu bahuśastatra bhārata /
vimukhīkṛtya putraṃ te senāṃ tava mamarda ha //

duḥśāsano'pi parayā śaktyā pārthamavārayat /
kathaṃ bhīṣmaṃ na no hanyāditi niścitya bhārata //

sā vadhyamānā samare putrasya tava vāhinī /
loḍyate rathibhiḥ śreṣṭhaistatratatraiva bhārata //