Mahabharata · Chapter 6.110

arjunastu raṇe rājandṛṣṭvā bhīṣmasya vikramam /
śikhaṇḍinamathovāca samabhyohi pitāmaham //

na cāpi bhīstvayā kāryā bhīṣmādadya kathañcana /
ahamenaṃ śaraistīkṣṇaiḥ pātayiṣye rathottamāt //
sañjaya uvaca /

evamuktastu pārthena śikhaṇḍī bharatarṣabha /
abhyadravata gāṅgeyaṃ śrutvā pārthasya bhāṣitam //

dhṛṣṭadyumnastathā rājansaubhadraśca mahārathaḥ /
hṛṣṭāvādravatāṃ bhīṣmaṃ śrutvā pārthasya bhāṣitam //

virāṭadrupadau vṛddhau kuntibhojasya daṃśitaḥ / abhyadravata gāṅgeyaṃ putrasya tava paśyataḥ /
nakulaḥ sahadevaśca dharmarājaśca vīryavān //

tathetarāṇi sainyāni sarvāmyeva viśāmpate /
samādravanta gāṅgeyaṃ śrutvā pārthasya bhāṣitam //

pratyudyayustāvakāśca sametāṃstānmahārathān /
yathāśakti yathotsāhaṃ tanme nigadataḥ śṛṇu //

citraseno mahārāja cekitānaṃ samabhyāyāt /
bhīṣmaprepsuṃ raṇe yāntaṃ vṛṣaṃ vyāghraśiśuryathā //

dhṛṣṭadyumnaṃ mahārāja bhīṣmāntikamupāgatam /
tvaramāṇaṃ raṇe yattaṃ kṛtavarmā nyavarāyat //

bhīmasenaṃ susankruddhaṃ gāṅgeyasya vadhaiṣiṇam /
tvaramāṇo mahārāja saumadattirnyavārayat //

tathaiva nakulaṃ śūraṃ kirantaṃ sāyakānbahūn /
vikarṇo vārayāmāsa icchanbhīṣmasya jīvitam //

sahadevaṃ tathā rājanyāntaṃ bhīṣmarathaṃ prati /
vārayāmāsa sankruddhaḥ kṛpaḥ śāradvato yudhi //

rākṣasaṃ krūrakarmāṇaṃ bhaimaseniṃ mahābalam /
bhīṣmasya nidhanaprepsuṃ durmukho'bhyajravadbalī //

sātyakiṃ samare kruddhamārsyaśṛṅgivārayat . bhīṣmasya vadhamicchantaṃ pāṇḍavaprītikāmyayā

abhimanyuṃ mahārāja yāntaṃ bhīṣmarathaṃ prati /
sudakṣiṇo mahārāja kāmbhoja pratyavārayat //

virāṭadrupadau vṛddhau sametāvarimardanau /
aśvatthāmā tataḥ kruddho vārayāmāsa bhārata //

tathā pāṇḍusutaṃ jyeṣṭhaṃ bhīṣmasya vadhakāṅkṣiṇam /
bhāradvājo raṇe yatto dharmaputramavārayat //

arjunaṃ rabhasaṃ yuddhe puraskṛtya śikhaṇḍinam /
bhīṣmaprepsuṃ mahārāja bhāsayantaṃ diśo daśa //

duḥśāsano maheṣvāso vārayāmāsa saṃyuge /
anye ca tāvakā yodhāḥ pāṇḍavānāṃ mahārathān //

bhīṣmasyābhimukhānyātānvārayāmāsurāhave /
dhṛṣṭadyumnastu sainyāni prākrośaṃstu punaḥ punaḥ //

abhyadravata saṃrabdho bhīṣmamekaṃ mahārathaḥ /
eṣo'rjuno raṇe bhīṣmaṃ prayāti kurunandanaḥ //

abhyadravata mābhaiṣṭa bhīṣmo hi prāpsyate na vaḥ /
arjunaṃ samare yoddhuṃ notsahetāpi vāsavaḥ //

kimu bhīṣmo raṇe vīrā gatasatvo'lpajīvitaḥ /
iti senāpateḥ śrutvā pāṇḍavānāṃ mahārathāḥ //

abhyadravanta saṃhṛṣṭā gāṅgeyasya rathaṃ prati /
āgacchatastānsamare vāryoghānacalā iva //

avārayanta saṃhṛṣṭāstāvakāḥ puruṣarṣabhāḥ /
duḥśāsano mahārāja bhayaṃ tyaktvā mahārathaḥ //

bhīṣmasya jīvitākāṅkṣī dhanañjayamupādravat . 6-110-26btathaiva pāṇḍavāḥ śūrā gāṅgeyasya rathaṃ prati //

abhyadravanta sangrāme tava putrānmahārathāḥ /
tatrādbhutamapaśyāma citrarūpaṃ viśāmpate //

duḥśāsanarathaṃ prāpya yatpārtho nātyavartata /
yathā vārayate velā kṣubdhatoyaṃ mahārṇavam //

tathaiva pāṇḍavaṃ kruddhaṃ tava putro nyavārayat /
ubhau tau rathināṃ śreṣṭhāvubhau bhāratadurjayau //

ubhau candrārkasadṛśau kāntyā dīptyā ca bhārata /
tathā tau jātasaṃrambhāvanyonyavadhakāṅkṣiṇau //

samīyaturmahāsaṅkhye mayaśakrau yathā purā /
duḥśāsano mahārāja pāṇḍavaṃ viśikhaistribhiḥ //

vāsudevaṃ ca viṃśatyā tāḍayāmāsa saṃyuge /
tato'rjuno jātamanyurvārṣṇeyaṃ vīkṣya pīḍitam //

duḥśāsanaṃ śatenājau nārācānāṃ samārpayat /
te tasya kavacaṃ bhittvā papuḥ śoṇitamāhave //

yathaiva pannagā rājaṃstaṭākaṃ tṛṣitāstathā / duḥśāsanastribhiḥ kruddhaḥ pārthaṃ vivyādha patribhiḥ /
lalāṭe bharataśreṣṭha śaraiḥ sannataparvabhiḥ //

lalāṭasthaistu tairbāṇaiḥ śuśubhe pāṇḍavo raṇe /
yathā merurmahārāja śṛṅgairatyarthamucchritaiḥ //

so'tividdho maheṣvāsaḥ putreṇa tava dhanvinā /
vyarājata raṇe pārthaḥ kiṃśukaḥ puṣpavāniva //

duḥśāsanaṃ tataḥ kruddhaḥ pīḍayāmāsa pāṇḍavaḥ /
parvaṇīva susankruddho rāhuḥ pūrṇaṃ niśākaram //

pīḍyamāno balavatā putrastava viśāmpate /
vivyādha samare pārthaṃ kaṅkapatraiḥ śilāśitaiḥ //

tasya pārtho dhanuśchitvā rathaṃ cāsya tribhiḥ śaraiḥ /
ājaghāna tataḥ paścātputraṃ te niśitaiḥ śaraiḥ //

so'nyatkārmukamādāya bhīmasya pramukhe sthitaḥ /
arjunaṃ pañcāviṃśatyā bāhvorurasi cārpayat //

tasya kruddho mahārāja pāṇḍavaḥ śatrutāpanaḥ /
apraiṣīdviśikhānghorānyamadaṇḍopamānbahūn //

aprāptāneva tānbāṇāṃściccheda tanayastava /
yatamānasya pārthasya tadadbhutamivābhavat //

pārthaṃ ca niśitairbāṇairavidhyattanayastava /
tataḥ kruddho raṇe pārthaḥ śarānsandhāya kārmuke //

preṣayāmāsa samare svarṇapuṅkhāñchilāśitān /
nyamañjaṃste mahārāja tasya kāye mahātmanaḥ //

yathā haṃsā mahārāja taṭākaṃ prāpya bhārata /
pīḍitaścaiva putraste pāṇḍavena mahātmanā //

hitvā pārthaṃ raṇe tūrṇaṃ bhīṣmasya rathamāvrajat /
agādhe mañjatastasya dvīpo bhīṣmo'bhavattadā //

pratilabhya tataḥ sañjñāṃ putrastava viśāmpate /
avārayattataḥ śūro bhūya eva parākramī //

śaraiḥ suniśitaiḥ pārthaṃ yathā vṛtraṃ purandaraḥ /
nirbibheda mahākāyo vivyathe naiva cārjunaḥ //