Mahabharata · Chapter 6.105

dṛṣṭvā bhīṣmaṃ raṇe yuddhaṃ pāṇḍavairabhisaṃvṛtam /
yathā meghairmahārāja tapānte divi bhāskaram //

duryodhano mahārāja duḥśāsanamabhāṣata /
eṣa śūro maheṣvāso bhīṣmaḥ śūraniṣūdanaḥ //

chāditaḥ pāṇḍavaiḥ śūraiḥ samantādbharatarṣabha /
tasya kāryaṃ tvayā vīra rakṣaṇaṃ sumahātmanaḥ //

rakṣyamāṇo hi samare bhīṣmo'smākaṃ pitāmahaḥ /
nihanyātsamare yattānpāñcālānpāṇḍavaiḥ saha //

tatra kāryatamaṃ manye bhīṣmasyaivābhirakṣaṇam /
goptā hyeṣa maheṣvāso bhīṣmo'smākaṃ mahāvrataḥ //

sa bhavānsarvasainyena parivārya pitāmaham /
samare karma kurvāṇaṃ duṣkaraṃ parirakṣatu //
sañjaya uvāca /

sa evamuktaḥ samare putro duḥśāsanastava /
parivārya sthito bhīṣmaṃ sainyena mahatā vṛtaḥ //

tataḥ śatasahasrāṇāṃ hayānāṃ subalātmajaḥ /
vimalaprāsahastānāmṛṣṭitomaradhāriṇām //

darpitānāṃ suvegānāṃ balasthānāṃ patākinām /
śikṣitairyuddhakuśalairupetānāṃ narottamaiḥ //

nakulaṃ sahadevaṃ ca dharmarājaṃ ca pāṇḍavam /
nyavārayannaraśreṣṭhānparivārya samantataḥ //

tato duryodhano rājā śūrāṇāṃ hayasādinām /
ayutaṃ preṣayāmāsa pāṇḍavānāṃ nivāraṇe //

taiḥ praviṣṭairmahāvegairgarutmadbhirivāhave /
khurāhatā dharā rājaṃścakampe ca nanāda ca //

khuraśabdaśca sumahānvājināṃ śuśruve tadā /
mahāvaṃśavanasyeva dahyamānasya parvate //

utpatadbhiśca taistatra samuddhūtaṃ mahadrajaḥ /
divākararathaṃ prāpya cchādayāmāsa bhāskaram //

vegavadbhirhayaistaistu kṣobhitā pāṇḍavīka camūḥ /
nipatadbhirmahāvegairhaṃsairiva mahatsaraḥ //

heṣatāṃ caiva śabdena na prājñāyata kiñcana . antardadhe mahāñśabdastena śabdena mohitaḥ //

tato yudhiṣṭhiro rājā mādrīputrau ca pāṇḍavau /
pratyaghnaṃstarasā vegaṃ samare hayasādinām //

udvṛttasya mahārāja prāvṛṭkāle'tipūryataḥ /
paurṇamāsyāmambuvegaṃ yathā velā mahodadheḥ //

tataste rathino rājañśaraiḥ sannataparvabhiḥ /
nyakṛntannuttamāṅgāni śareṇa hayasādinām //

te nipeturmahārāja nihatā dṛḍhadhanvibhiḥ /
nāgairiva mahānāgā yathāvadgirigahvare //

te'pi prāsaiḥ suniśitaiḥ śaraiḥ sannataparvabhiḥ /
nyakṛntannuttamāṅgāni vicaranto diśo daśa //

abhyāhatā hayārohā ṛṣṭibhirbharatarṣabha /
atyajannuttamāṅgāni phalānīva mahādrumāḥ //

samādino hayā rājaṃstatratatra niṣūditāḥ /
patitāḥ pātyamānāśca pratyadṛśyanta sarvaśaḥ //

vadhyamānā hayāścaiva prādravanta bhayārditāḥ /
yathā siṃhaṃ samāsādya mṛgāḥ prāṇaparāyaṇāḥ //

pāṇḍavāśca mahārāja jitvā śatrūnmahāmṛdhe /
dadhmuḥ śaṅkhāṃśca bherīśca tāḍayāmāsurāhave //

tato duryodhano dīno dṛṣṭvā sainyaṃ parājitam /
abravīdrataśreṣṭha madrarājamidaṃ vacaḥ //

eṣa pāṇḍusuto jyeṣṭho yamābhyāṃ sahito raṇe /
paśyatāṃ vo mahābāho senāṃ drāvayati prabho //

taṃ vāraya mahābāho veleva makarālayam /
tvaṃ hi saṃśrūyase'tyarthamasahyabalavikramaḥ //
sañjaya uvāca /

putrasya tava tadvākyaṃ śrutvā śalyaḥ pratāpavān /
sa yayau rathavaṃśena yatra rājā yudhiṣṭhiraḥ //

tadāpatadvai sahasā śalyasya sumahadbalam /
mahaughavegaṃ samare vārayāmāsa pāṇḍavaḥ //

madrarājaṃ ca samare dharmarājo mahārathaḥ / daśabhiḥ sāyakaistūrṇamājaghāna stanāntare /
nakulaḥ sahadevaśca taṃ saptabhirajihnagaiḥ //

madrarājo'pi tānsarvānājaghāna tribhistribhiḥ /
yudhiṣṭhiraṃ punaḥ ṣaṣṭyā vivyādha niśitaiḥ śaraiḥ //

mādrīputrau ca sambhrāntau dvābhyāṃ dvābhyāmatāḍayat /
tato bhīmo mahābahurdṛṣṭvā rājanamāhave //

madrarājavaśaṃ prāptaṃ mṛtyorāsyagataṃ yathā /
abhyapadyata sangrāme yudhiṣṭhiramamitrajit //

āpatanneva bhīmastu madrarājamatāḍayat / sarvapāraśavaistīkṣṇairnārācairmarmabhedibhiḥ //

tato bhīṣmaśca droṇaśca sainyena mahatā vṛtau /
rājānamabhyapadyetāmañjasā śaravarṣiṇau //

tato yuddhaṃ mahāghoraṃ prāvartata sudāruṇam /
aparāṃ diśamāsthāya dyotamāne divākare //