Mahabharata · Chapter 6.104

arjunastānnaravyāghraḥ suśarmānucarānnṛpān /
anayatpretarājasya sadanaṃ sāyakaiḥ śitaiḥ //

suśarmāpi tato bāṇaiḥ pārthaṃ vivyādha saṃyuge /
vāsudevaṃ ca saptatyā pārthaṃ ca navabhiḥ punaḥ //

taṃ nivārya śaraugheṇa sakrusūnurmahārathaḥ /
suśarmaṇo raṇe yodhānprāhiṇodyamasādanam //

te vadhyamānāḥ pārthena kāleneva yugakṣaye /
vyadravanta raṇe rājanbhaye jāte mahārathāḥ //

utsṛjya turagānkecidrathānkecicca māriṣa /
gajānanye samutsṛjya prādravanta diśo daśa //

apare tu tadādāya vājināgarathānraṇe /
tvarayā parayā yuktāḥ prādravanta viśāmpate //

pādātāścāpi śastrāṇi samutsṛjya mahāraṇe /
nirapekṣā vyadhāvanta tenatena sma bhārata //

vāryamāṇāḥ subahuśastraigartena suśarmaṇā /
tathānyaiḥ pārthivaśreṣṭhairna vyatiṣṭhanta saṃyuge //

tadbalaṃ pradrutaṃ dṛṣṭvā putro duryodhanastava /
puraskṛtya raṇe bhīṣmaṃ sarvasainyapuraskṛtaḥ //

sarvodyogena mahatā dhanañjayamupādravat /
trigartādhipaterarthe jīvitasya viśāmpate //

sa ekaḥ samare tasthau kiranbahuvidhāñśarān /
bhrātṛbhiḥ sahitaḥ sarvaiḥ śeṣā hi pradrutā narāḥ //

tathaiva pāṇḍavā rājansarvodyogena daṃśitāḥ /
prayayuḥ phalgunārthāya yatra bhīṣmo vyatiṣṭhata //

jñāyamānā raṇe vīryaṃ ghoraṃ gāṇḍīvadhanvanaḥ /
hāhākārakṛtotsāhā bhīṣmaṃ jagmuḥ samantataḥ //

tatastāladhvajaḥ śūraḥ pāṇḍavānāṃ varūthinīm /
chādayāmāsa samare śaraiḥ sannataparvabhiḥ //

ekībhūtāstataḥ sarve kuravaḥ saha pāṇḍavaiḥ /
ayudhyanta mahārāja madhyaṃ prāpte divākare //

sātyakiḥ kṛtavarmāṇaṃ viddhvā pañcabhirāśugaiḥ /
atiṣṭhadāhave śūraḥ kiranbāṇānsahasraśaḥ //

tathaiva drupado rājā droṇaṃ viddhvā śitaiḥ śaraiḥ /
punarvivyādha saptatyā sārathiṃ cāsya pañcabhiḥ //

bhīmasenastu rājānaṃ bāhlīkaṃ prapitāmaham /
viddhvā nadanmahānādaṃ śārdūla iva kānane //

ārjuniścitrasenena viddho bahubhiraśugaiḥ . atiṣṭhadāhave śūraḥ kiranbāṇānsahasraśaḥ /
citrasenaṃ tribhirbāṇairvivyādha samare bhṛśam //

samāgatau tau tu raṇe mahāmātrau vyarocatām /
yathā divi mahāghorau rājanbudhaśanaiścarau //

tasyāśvāṃścaturo hatvā sūtaṃ ca navabhiḥ śaraiḥ /
nanāda balavānnādaṃ saubhadraḥ paravīrahā //

hatāśvāttu rathāttūrṇaṃ so'vaplutya mahārathaḥ /
āruroha rathaṃ tūrṇaṃ durmukhasya viśāmpate //

droṇaśca drupadaṃ bhittvā śaraiḥ sannataparvabhiḥ /
sārathiṃ cāsya vivyādha tvaramāṇaḥ parākramī //

pīḍyamānastato rājā drupado vāhinīmukhe /
apāyājjavanairaśvaiḥ pūrvavairamanusmaran //

bhīmasenastu rājānaṃ muhūrtādiva bāhlikam /
vyaśvasūtarathaṃ cakre sarvasainyasya paśyataḥ //

sasambhramo mahārāja saṃśayaṃ paramaṃ gataḥ //

avaplutya tato vāhādbāhlīkaḥ puruṣottamaḥ /
āruraha rathaṃ tūrṇaṃ lakṣmaṇasya mahāraṇe //

sātyakiḥ kṛtavarmāṇaṃ vārayitvā mahāraṇe /
śarairbahuvidhai rājannāsasāda pitāmaham //

sa viddhvā bhārataṃ ṣaṣṭyā niśitai romavāhibhiḥ /
nṛtyanniva rathopasthe vidhunvāno mahaddhanuḥ //

tasyāyasīṃ mahāśaktiṃ cikṣepātha pitāmahaḥ /
hemacitrāṃ mahāvegāṃ nāgakanyopamāṃ śubhām //

tāmāpatantīṃ sahasā mṛtyukalpāṃ sudurjayām /
vyaṃsayāmāsa vārṣṇeyo lāghavena mahāyaśāḥ //

anāsādya tu vārṣṇeyaṃ śaktiḥ paramadāruṇā /
nyapataddharaṇīpṛṣṭhe maholkeva mahāprabhā //

vārṣṇeyastu tato rājansvāṃ śaktiṃ kanakaprabhām /
vegavadgṛhya cikṣepa pitāmaharathaṃ prati //

vārṣṇeyabhujavegena praṇunnā sā mahāhave /
abhidudrāva vegena kālarātriryathā naram //

tāmāpatantīṃ sahasā dvidhā ciccheda bhārataḥ /
kṣuraprābhyāṃ sutīkṣṇābhyāṃsā vyaśīryata medinīm //

chittvā śaktiṃ tu gāṅgayaḥ sātyakiṃ navabhiḥ śaraiḥ /
ājaghānorasi kruddhaḥ prahasañchatrukarśanaḥ //

tataḥ sarathanāgāśvāḥ pāṇḍavāḥ pāṇḍupūrvaja /
parivabrū raṇe bhīṣmaṃ mādhavatrāṇakāraṇāt //

tataḥ pravavṛte yuddhaṃ tumulaṃ romaharṣaṇam /
pāṇḍavānāṃ kurūṇāṃ ca samare vijayaiṣiṇām //