Mahabharata · Chapter 6.102

kathaṃ droṇo maheṣvāsaḥ pāṇḍavaśca dhanañjayaḥ /
samīyatū raṇe yattau tāvubhau puruṣarṣabhau //

priyo hi pāṇḍavo nityaṃ bhāradvājasya dhīmataḥ /
ācāryaśca raṇe nityaṃ priyaḥ pārthasya sañjaya //

tāvubhau rathino saṅkhye hṛṣṭau siṃhāvivotkaṭau /
kathaṃ samīyaturyattau bhāradvājadhanañjayau //
sañjaya uvāca /

na droṇaḥ samare pārthaṃ jānīte priyamātmanaḥ /
kṣatradharmaṃ puraskṛtya pārtho vā gurumāhave //

na kṣatriyā raṇe rājanvarjayanti parasparam /
nirmaryādaṃ hi yudhyante pitṛbhirbhrātṛbhiḥ saha //

raṇe bhārata pārthena droṇo viddhastribhiḥ śaraiḥ /
nācintayacca tānbāṇānpārthacāpacyutānyudhi //

śaravṛṣṭyā punaḥ pārthaśchādayāmāsa taṃ raṇe /
sa prajajvāla roṣeṇa gahane'gnirivorjitaḥ //

tato'rjunaṃ raṇe droṇaḥ śaraiḥ sannataparvabhiḥ /
chādayāmāsa rājendra nacirādeva bhārata //

tato duryodhano rājā suśarmāṇamacodayat /
droṇasya samare rājanpārṣṇigrahaṇakāraṇāt //

trigartarāḍapi kruddho bhṛśamāyamya kārmukam /
chādayāmāsa samare pārthaṃ bāṇairayomukhaiḥ //

tābhyāṃ muktāḥ śarā rājannantarikṣe virejire /
haṃsā iva mahārāja śaratkāle nabhastale //

te śarāḥ prāpya kaunteyaṃ samantādviviśuḥ prabho /
phalabhāranataṃ yadvatsvāduvṛkṣaṃ vihangamāḥ //

arjunastu raṇe nādaṃ vinadya rathināṃ varaḥ /
trigartarājaṃ samare saputraṃ vivyadhe śaraiḥ //

te vadhyamānāḥ pārthena kāleneva yugakṣaye . pārthamevābhyavartanta maraṇe kṛtaniścayāḥ /
mumucuḥ śaravṛṣṭiṃ ca pāṇḍavasya rathaṃ prati //

śaravṛṣṭiṃ tatastāṃ tu śaravarṣaiḥ samantataḥ /
pratijagrāha rājendra toyavṛṣṭimivācalaḥ //

tatrādbhutamapaśyāma bībhatsorhastalāghavam /
vimuktāṃ bahubhiryodhaiḥ śastravṛṣṭiṃ durāsadām //

yadeko vārayāmāsa māruto'bhragaṇāniva /
karmaṇā tena pārthasya tutuṣurdevadānavāḥ //

atha kruddho raṇe pārthastrigartānprati bhārata /
mumocāstraṃ mahārāja vāyavyaṃ pṛtanāmukhe //

prādurāsīttato vāyuḥ kṣobhayāṇo nabhastalam /
pātayanvai tarugaṇānvinighnaṃścaiva sainikān //

tato droṇo'bhivīkṣyaiva vāyavyāstraṃ sudāruṇam /
śailamanyanmahārāja ghoramastraṃ mumoca ha //

droṇena yudhi nirmukte tasminnastre narādhipa /
praśaśāma tato vayuḥ prasannāśca diśo daśa //

tataḥ pāṇḍusuto vīrastrigartasya rathavrajān /
nirutsāhānraṇe cakre vimukhānviparākramān //

tato duryodhanaścaiva kṛpaśca rathināṃ varaḥ /
aśvatthāmā tathā śalyaḥ kāmbhojaśca sudakṣiṇaḥ //

vindānuvindāvāvantyau bāhlikaḥ saha bāhlikaiḥ /
mahatā rathavaṃśena pārthasyāvārayandiśaḥ //

tathaiva bhagadattaśca śratāyuśca mahābalaḥ /
gajānīkena bhīmasya tāvavārayatāṃ diśaḥ //

bhūriśravāḥ śalaścaiva saubalaśca viśāmpate /
śaraughairvimalaistīkṣṇairmādrīputrāvavārayan //

bhīṣmastu saṃhataḥ saṅkhye dhārtarāṣṭraiḥ sasainikaiḥ /
yudhiṣṭhiraṃ samāsādya sarvataḥ paryavārayat //

āpatantaṃ gajānīkaṃ dṛṣṭvā pārtho vṛkodaraḥ /
lolihansṛkkiṇī vīro mṛgarāḍiva kānane //

bhīmastu rathināṃ śreṣṭho gadāṃ gṛhya mahāhave /
avaplutya rathāttūrṇaṃ tava sainyānyabhīṣayat //

tamudvīkṣya gadāhastaṃ tataste gajasādinaḥ /
parivavrū raṇe yattā bhīmasenaṃ samantataḥ //

gajamadhyamanuprāptaḥ pāṇḍavaḥ sa vyarājata /
meghajālasya mahato yathā madhyagato raviḥ //

vyadhamatsa gajānīkaṃ gadayā pāṇḍavarṣabhaḥ /
mahābhrajālamatulaṃ mātariśveva santatam //

te vadhyamānā balinā bhīmasenena dantinaḥ /
ārtanādaṃ raṇe cakrurgarjanto jaladā iva //

bahudhā dāritaścaiva viṣāṇaistatra dantibhiḥ /
phullāśokanibhaḥ pārthaḥ śuśubhe raṇamūrdhani //

sādināṃ śastravṛṣṭiṃ ca vyadhamadgadayā tataḥ / vāyuvegasamāyukto vyacaratpāṇḍavo yudhi //

viṣāṇollikhitairgātraurviṣāṇābhihato bhṛśam /
viṣāṇe dantinaṃ gṛhya nirviṣāṇamathākarot //

viṣāṇena ca tenaiva kumbho'bhyāhatya dantinam /
pātayāmāsa samare daṇḍahasta ivāntakaḥ //

śoṇitāktāṃ gadāṃ bibhranmedobhañjākṛtacchaviḥ /
kṛtābhyaṅgaḥ śoṇitena rudravatpratyadṛśyata //

evaṃ ke vadhyamānāśca hataśeṣā mahāgajāḥ /
prādravanta diśo rājanvimṛdgantaḥ svakaṃ balam //

dravadbhistairmahānāgaiḥ samantādbharatarṣabha / duryodhanabalaṃ sarvaṃ punarāsītparāṅbhukham //