Mahabharata · Chapter 5.94

tathā kathayatoreva tayorbuddhimatostadā /
śivā nakṣatrasampannā sā vyatīyāya śarvarī //

dharmārthakāmayuktāśca vicitrārthapadākṣarāḥ /
śṛṇvato vividhā vāco vidurasya mahātmanaḥ //

kathābhiranurūpābhī raktasyāmitatejasaḥ /
akāmasyaiva kṛṣṇasya sā vyatīyāya śarvarī //

tatastu svarasampannā bahavaḥ sūtamāgadhāḥ //
śaṅkhadunduminirghoṣaiḥ keśavaṃ pratyabodhayan //

tata utthāya dāśārhaṛṣabhaḥ sarvasātvatām /
sarvamāvaśyakaṃ cakre prātaḥ kāryaṃ janārdanaḥ //

kṛtodakānujapyaḥ sa hutāgniḥ samalaṅkṛtaḥ /
tataścādityamudyantamupātiṣṭhata mādhavaḥ //

atha duryodhanaḥ kṛṣmaṃ śakuniścāpi saubalaḥ /
sandhyāṃ tiṣṭhantamabhyetya dāśārhamaparājitam //

ācakṣetāṃ tu kṛṣṇasya dhṛtarāṣṭraṃ sabhāgatam /
kurūśca bhīṣmapramukhānrājñaḥ sarvāṃśca pārthivān //

tvāmarthayante govinda divi śakramivāmarāḥ /
tāvabhyanandadgovindaḥ sāmnā paramavalgunā //

tato vimala āditye brāhmaṇebhyo janārdanaḥ /
dadau hiraṇyaṃ vāsāṃsi gāścāścāṃśca parantapaḥ //

visṛṣṭavantaṃ ratnāni dāśārhamaparājitam /
tiṣṭhantamupasaṅgamya vavande sārathistadā //

tasmai rathavaro yuktaḥ śuśubhe lokaviśrutaḥ /
vājibhiḥ śaibyasugrīvameghapuṣpabalāhakaiḥ //

śaibyastu śukapatrābhaḥ sugrīvaḥ kiṃśukaprabhaḥ /
meghapuṣpo meghavarṇaḥ pāṇḍarastu balāhakaḥ //

dakṣiṇaṃ cāvahacchaibyaḥ sugrīvaḥ savyato'vahat /
pṛṣṭhavāhau rathasyāstāṃ meghapuṣpabalāhakau //

viśvakarmakṛtā'pīḍā ratnajālavibhūṣitā /
āśritā vai rathe tasmindhvajayaṣṭiraśobhata //

vainateyaḥ sthitastasyāṃ prabhākaramiva spṛśan /
tasya satvavataḥ ketau bhujagāriraśobhata //

tasya kīrtimatastena bhāsvareṇa virājatā /
śuśubhe syandanaśreṣṭhaḥ patagendreṇa ketunā //

raśmijālaiḥ patākābhiḥ sauvarṇena ca ketunā /
babhūva sa rathaśreṣṭhaḥ kālasūrya ivoditaḥ //

pakṣidhvajavitānaiśca rukmajālakṛtāṅgaṇaiḥ /
daṇḍamārgavibhāgaiśca sukṛtairviśvakarmaṇā //

pravālamaṇiśobhaiśca muktāvaiḍūryaśobhanaiḥ /
kiṅkiṇīśatasaṅghaiśca vālajālakṛtāntaraiḥ //

kārtasvaramayībhiśca padminībhiralaṅkṛtaḥ /
śuśubhe syandanaśreṣṭhastāpanīyaiśca pādapaiḥ //

vyāghrasiṃhavarāhaiśca gobhiśca mṛgapakṣibhiḥ /
tārābhirbhāskaraiścāpi vāraṇaiśca hiraṇmayaiḥ //

vajrāṅkuśavimānaiśca kūbarāvṛttasandhiṣu . samucchritamahānābhiḥ stanayitnumahāsvanaḥ //

tato rathena śubhreṇa mahatā kiṅkiṇīkinā /
hayottamayujā śīghramupātiṣṭhata dārukaḥ //

tamupasthitamājñāya rathaṃ divyaṃ mahāmanāḥ /
mahābhraghananirghoṣaṃ sarvaratnavibhūṣitam //

agniṃ pradakṣiṇaṃ kṛtvā brāhmaṇāṃśca janārdanaḥ /
kaustubhaṃ maṇimābadhya śriyā paramayā jvalan //

kurubhiḥ saṃvṛtaḥ kṛṣṇo vṛṣṇibhiścābhirakṣitaḥ /
ātiṣṭhata rathaṃ śauriḥ sarvayādavanandanaḥ //

anvāruroha dāśārhaṃ viduraḥ sarvadharmavit /
sarvaprāṇabhṛtāṃ śreṣṭhaṃ sarvabuddhimatāṃ varam //

tato duryodhanaḥ kṛṣṇaṃ śakuniścāpi saubalaḥ /
dvitīyena rathenainamanvayātāṃ parantapam //

sātyakiḥ kṛtavarmā ca vṛṣṇīnāṃ cāpare rathāḥ /
pṛṣṭhato'nuyayuḥ kṛṣṇaṃ gajairaśvai rathairapi //

teṣāṃ hemapariṣkārairyuktāḥ paramavājibhiḥ /
gacchatāṃ ghoṣiṇaścitrarathā rājanvirejire //

sammṛṣṭasaṃsiktarajaḥ pratipede mahāpatham /
rājarṣicaritaṃ kāle kṛṣṇo dhīmāñśriyā jvalan //

tataḥ prayāte dāśārhe prāvādyantaikapuṣkarāḥ /
śaṅkhāśca dadhmire tatra vādyānyanyāni yāni ca //

pravīrāḥ sarvalokasya yuvānaḥ siṃhavikramāḥ /
parivārya rathaṃ śaureragacchanta parantapāḥ //

tato'nye bahusāhasrā vicitrādbhutavāsasaḥ /
asiprāsāyudhadharāḥ kṛṣṇasyāsanpuraḥsarāḥ //

gajāḥ pañcaśatāstatra rathāścāsansahasraśaḥ /
prayāntamanvayurvīraṃ dāśārhamaparājitam //

puraṃ kurūṇāṃ saṃvṛttaṃ draṣṭukāmaṃ janārdanam /
sabālavṛddhaṃ sastrīkaṃ rathyāgatamarindama //

vedikāmāśritābhiśca samākrāntānyanekaśaḥ /
pracalantīva bhāreṇa yoṣidbhirbhavanānyuta //

sa pūjyamānaḥ kurubhiḥ saṃśrṛṇvanmadhurāḥ kathāḥ /
yathārhaṃ pratisatkurvanprekṣamāṇaḥ śanairyayau //

tataḥ sabhāṃ samāsādya keśavasyānuyāyinaḥ /
saśaṅkhairveṇunirghoṣairdiśaḥ sarvā vyanādayan //

tataḥ sā samitiḥ sarvā rājñāmamitatejasām /
samprākampata harṣeṇa kṛṣṇāgamanakāṅkṣayā //

tato'bhyāśangate kṛṣṇe samahṛṣyannarādhipāḥ /
śrutvāṃ taṃ rathanirghoṣaṃ parjanyaninadopamam //

āsādya tu sabhādvāramṛṣabhaḥ sarvasātvatām /
avatīrya rathācchauriḥ kailāsaśikharopamāt //

navameghapratīkāśāṃ jvalantīmiva tejasā /
mahendrasadanaprakhyāṃ praviveśa sabhāṃ tataḥ //

pāṇau gṛhītvā viduraṃ sātyakiṃ ca mahāyaśāḥ /
jyetīṃṣyādityavadrājankurūnprācchādayacchriyā //

agrato vāsudevasya karṇaduryodhanāvubhau /
kṛṣṇayaḥ kṛtavarmā cāpyāsankṛṣṇasya pṛṣṭhataḥ //

dhṛtarāṣṭraṃ puraskṛtya bhīṣmadroṇādayastataḥ /
āsanebhyo'calansarve pūjayanto janārdanam //

abhyāgacchati dāśārhe prajñācakṣurnareśvara /
sahaiva droṇabhīṣmābhyāmudatiṣṭhanmahāyaśāḥ //

uttiṣṭhati mahārāje dhṛtarāṣṭre janeśvare /
tāni rājasahasrāṇi samuttasthuḥ samantataḥ //

āsanaṃ sarvatobhadraṃ jāmbūnadapariṣkṛtam /
kṛṣṇārthe kalpitaṃ tatra dhṛtarāṣṭrasya śāsanāt //

smayamānastu rājānaṃ bhīṣmadroṇau ca mādhavaḥ /
abhyabhāṣata dharmātmā rājñaścānyānyathāvayaḥ //

tatra keśavamānarcuḥ samyagabhyāgataṃ sabhām /
rājānaḥ pārthivāḥ sarve kuravaśca janārdanam //

tatra tiṣṭhansa dāśārho rājamadhye parantapaḥ / apaśyadantarikṣasthānṛṣīnparapurañjayaḥ /

tatastānabhisamprekṣya nāradapramukhānṛṣīn // abhyabhāṣata dāśārho bhīṣmaṃ śāntanavaṃ śanaiḥ /

pārthivīṃ samitiṃ draṣṭumṛṣayo'bhyāgatā nṛpa // nimantryantāmāsanaiśca satkāreṇa ca bhūyasā /

naiteṣvanupaviṣṭeṣu śakyaṃ kenacidāsitum // pūjā prayujyatāmāśu munīnāṃ bhāvitātmanām /
vaiśampāyana uvāca /

ṛṣīñśāntanavo dṛṣṭvā sabhādvāramupasthitān . tvaramāṇastato bhṛtyānāsanānītyacodayat /

āsanānyatha mṛṣṭāni mahānti vipulāni ca // maṇikāñcanacitrāṇi samājahrustatastataḥ /

teṣu tatropaviṣṭeṣu gṛhītārghyeṣu bhārata // niṣasādāsane kṛṣṇo rājānaśca yathāsanam /

duḥśāsanaḥ sātyakaye dadāvāsanamuttamam // viviṃśatirdadau pīṭhaṃ kāñcanaṃ kṛtavarmaṇe /

avidūre tu kṛṣṇasya karṇaduryodhanāvubhau // ekāsane mahātmānau niṣīdaturamarṣaṇau /

gāndhārarājaḥ śakunirgāndhārairabhirakṣitaḥ // niṣasādāsane rājā sahaputro viśāmpate /

viduro maṇipīṭhe tu śuklaspardhyājinottare // saṃspṛśannāsanaṃ śaurermahāmatirupāviśat /

cirasya dṛṣṭvā dāśārhaṃ rājānaḥ sarva eva te // amṛtasyeva nātṛpyanprekṣamāṇā janārdanam /

atasīpuṣpasaṅkāśaḥ pītavāsā janārdanaḥ //
vyabhrājata sabhāmadhye hemnīvopahito maṇiḥ //

tatastūṣṇīṃ sarvamāsīdgovindagatamānasam /
na tatra kaścitkiñcidvā vyājahāra pumānkvacit //