Mahabharata · Chapter 5.93

vidurasya vacaḥ śrutvā praśritaṃ puruṣottamaḥ . idaṃ hovāca vacanaṃ madhuraṃ madhusūdanaḥ //
śrībhagavānuvāca /

yathā vrūyānmahāprājño yathā brūyādvicakṣaṇaḥ /
sathā vācyastvadvidhena bhavatā madvidhaḥ suhṛt //

dharmārthayuktaṃ tathyaṃ ca yathā tvayyupapadyate /
tathā vacanamukto'sti tvayaitatpitṛmātṛvat //

satyaṃ prāptaṃ ca yuktaṃ vā'pyevameva yathā'ttha mām /
śrṛṇuṣvāgamane hetuṃ vidurāvahito mama //

daurātmyaṃ dhārtarāṣṭrasya kṣatriyāṇāṃ ca vairitām /
sarvametadahaṃ jānankṣattaḥ prāpto'dya kauravān //

paryastāṃ pṛthivīṃ sarvāṃ sāśvāṃ sarathakuñjarām /
yo mocayenmṛtyupāśātprāpnuyāddharmamuttamam //

dharmakāryaṃ yatañśaktyā no cetprāpnoti mānavaḥ /
prāpto bhavati tatpuṇyamatra me nāsti saṃśayaḥ //

manasā cintayanpāpaṃ karmaṇā nātirocayan /
na prāpnoti phalaṃ tasyetyevaṃ dharmavido viduḥ //

so'haṃ yatiṣye praśamaṃ kṣattaḥ kartumamāyayā /
kurūṇāṃ sṛñjayānāṃ ca saṅgrāne vinaśiṣyatām //

seyamāpanmahāghorā kuruṣveva samutthitā /
karṇaduryodhanakṛtā sarve hyete tadanvayāḥ //

vyasane kliśyamānaṃ hi yo mitraṃ nābhipadyate /
anunīya yathāśakti taṃ nṛśaṃsaṃ vidurbudhāḥ //

ākeśagrahaṇānmitramakāryātsannivartayan /
avācyaḥ kasyacidbhavati kṛtayatno yathābalam //

tatsamarthaṃ śubhaṃ vākyaṃ dharmārthasahitaṃ hitam /
dhārtarāṣṭraḥ sahāmātyo grahītuṃ vidurārhati //

hitaṃ hi dhārtarāṣṭrāṇāṃ pāṇḍavānāṃ tathaiva ca /
pṛthivyāṃ kṣatriyāṇāṃ ca yatiṣye'hamamāyayā //

hite prayatamānaṃ māṃ śaṅkedduryodhano yadi /
hṛdayasya ca me prītirānṛṇyaṃ ca bhaviṣyati //

jñātīnāṃ hi mitho bhede yanmitraṃ nābhipadyate /
sarvayatnena mādhyasthyaṃ na tanmitraṃ vidurbudhāḥ //

na māṃ brūyuradharmiṣṭhā mūḍhā hyasuhṛdastathā /
śakto nāvārayatkṛṣṇaḥ saṃrabdhānkurupāṇḍavān //

ubhayoḥ sādhayannarthamahāmāgata ityuta /
tatra yatnamahaṃ kṛtvā gaccheyaṃ nṛṣvavācyatām //

mama dharmārthayuktaṃ hi śrutvā vākyamanāmayam /
na cedādāsyate bālo diṣṭasya vaśameṣyati //

ahāpayanpāṇḍavārthaṃ yathāva- cchamaṃ kurūṇāṃ yadi cācareyam /
puṇyaṃ ca me syāccaritaṃ mahātma- nmucyeraṃśca kuravo mṛtyupāśāt //

api vācaṃ bhāṣamāṇasya kāvyāṃ dharmarāmāmarthavatīmahiṃsrām /
avekṣerandhārtarāṣṭrāḥ śamārthaṃ māṃ ca prāptaṃ kuravaḥ pūjayeyuḥ //

na cāpi mama paryāptāḥ sahitāḥ sarvapārthivāḥ /
kruddhasya pramukhe sthātuṃ siṃhasyevetare mṛgāḥ //
vaiśampāyana uvāca /

ityevamuktvā vacanaṃ vṛṣṇīnāmṛṣabhastadā /
śayane sukhasaṃsparśe śiśye yadusukhāvahaḥ //