Mahabharata · Chapter 5.88

yadāha viduraḥ kṛṣṇe sarvaṃ tatsatyamacyute /
anurakto hyasaṃhāryaḥ pārthānprati janārdanaḥ //

yattatsatkārasaṃyuktaṃ deyaṃ vasu janārdane /
anekarūpaṃ rājendra na taddeyaṃ kadācana //

deśaḥ kālastathā'yukto na hi nārhati keśavaḥ /
maṃsyatyadhokṣajo rājanbhayādarcati māmiti //

avamānaśca yatra syātkṣatriyasya viśāmpate /
na tatkuryādbudhaḥ kāryamiti me niścitā matiḥ //

sa hi pūjyatamo loke kṛṣṇaḥ pṛthulalocanaḥ /
trayāṇāmapi lokānāṃ viditaṃ mama sarvathā //

na tu tasmai pradeyaṃ syāttathā kāryagatiḥ prabho /
vigrahaḥ samupārabdho na hi śāmyatyavigrahāt //
vaiśampāyana uvāca /

tasya tadvacanaṃ śrutvā bhīṣmaḥ kurupitāmahaḥ /
vaicitravīryaṃ rājānamidaṃ vacanamabravīt //

satkṛto'satkṛto vā'pi na krudhyeta janārdanaḥ . nāvamaṃsyatyavajñātṝnavajñāto'pi keśavaḥ /
nālamenamavajñātuṃ nāvajñeyo hi keśavaḥ //

yattu kāryaṃ mahābāho manasā kāryatāṃ gatam /
sarvopāyairna tacchakyaṃ kenacitkartumanyathā //

sa yadbrūyānmahābāhustatkāryamaviśaṅkayā /
vāsudevena tīrthena kṣipraṃ saṃśābhya pāṇḍavaiḥ //

dharmyamarthyaṃ ca dharmātmā dhruvaṃ vaktā janārdanaḥ /
tasminvācyāḥ priyā vāco bhavatā bāndhavaiḥ saha //
duryodhana uvāca /

na paryāptosmi yadrājañśriyaṃ niṣkevalāmaham /
taiḥ sahemāmupāśrīyāṃ yāvajjīvaṃ pitāmaha //

idaṃ tu sumahatkāryaṃ śruṇu me yatsamarthitam /
parāyaṇaṃ pāṇḍavānāṃ niyacchāmi janārdanam //

tasminbaddhe bhaviṣyanti vṛṣṇayaḥ pṛthivī tathā /
pāṇḍavāśca vidheyā me sa ca prātarihaipyati //

atropāyānyathā samyaṅna buddhyeta janārdanaḥ /
na cāpāyo bhavetkaścittadbhavānprabravītu me //
vaiśampāyana uvāca /

tasya tadvacanaṃ śrutvā ghoraṃ kṛṣṇe'bhisaṃhitam /
dhṛtarāṣṭraḥ sahāmātyo vyathito vimanābhavat //

tato duryodhanamidaṃ dhṛtarāṣṭro'bravīdvacaḥ /
maivaṃ vocaḥ prajāpāla naiṣa dharmaḥ sanātanaḥ //

dūtaśca hi hṛṣīkeśaḥ sambandhī ca priyaśca naḥ /
apāpaḥ kauraveyeṣu sa kathaṃ bandhamarhati //
bhīṣma uvāca /

parītastava putro'yaṃ dhṛtarāṣṭra sumandadhīḥ /
vṛṇotyanarthaṃ naivārthaṃ yācyamānaḥ suhṛjjanaiḥ //

imamutpathi vartantaṃ pāpaṃ pāpānubandhinam /
vākyāni suhṛdāṃ hitvā tvamapyasyānuvartase //

kṛṣṇamakliṣṭakarmāṇamāsādyāyaṃ sudurmatiḥ /
tava putraḥ sahāmātyaḥ kṣaṇena na bhaviṣyati //

pāpasyāsya nṛśaṃsasya tyaktadharmasya durmateḥ /
notsahe'narthasaṃyuktāḥ śrotuṃ vācaḥ kathañcana //

ityuktvā bharataśreṣṭho vṛddhaḥ paramamanyumān /
utthāya tasmātprātiṣṭhadbhīṣmaḥ satyaparākramaḥ //