Scripture Library

Mahabharata · Chapter 5.89

5.89.1

prātarutthāya kṛṣṇastu kṛtavānsarvamāhnikam /
brāhmaṇairabhyanujñātaḥ prayayau nagaraṃ prati //

5.89.2

taṃ prayāntaṃ mahābāhumanujñāpya mahābalam /
paryavartanta te sarve vṛkasthalanivāsinaḥ //

5.89.3

pradadau puṇḍarīkākṣo ratnāni ca dhanāni ca / tānprasthāpya mahābāhurupāyātkurusaṃsadam //

5.89.4

dhārtarāṣṭrāstamāyāntaṃ pratyuñjagmuḥ svalaṅkṛtāḥ /
duryodhanādṛte sarve bhīṣmadroṇakṛpādayaḥ //

5.89.5

paurāśca bahulā rājanhṛṣīkeśaṃ didṛkṣavaḥ /
yānairbahuvidhairanye padbhireva tathā'pare //

5.89.6

sa vai pathi samāgamya bhīṣmeṇākliṣṭakarmaṇā /
droṇena dhārtarāṣṭraiśca tairvṛto nagaraṃ yayau //

5.89.7

kṛṣṇasammānanārthaṃ ca nagaraṃ samalaṅkṛtam /
babhūva rājamārgaśca bahuratnasamācitaḥ //

5.89.8

na ca kaścidgṛhe rājaṃstadā'sīdbharatarṣabha /
na strī na vṛddho na śiśurvāsudevadidṛkṣayā //

5.89.9

rājamārge narāstasminsaṃstuvantyavaniṃ gatāḥ /
tasminkāle mahārāja hṛṣīkeśapraveśane //

5.89.10

āvṛtāni varastrībhirgṛhāṇi sumahāntyapi /
pracalantīva bhāreṇa dṛśyantesma mahītale //

5.89.11

tathā ca gatimantaste vāsudevasya vājinaḥ /
pranaṣṭagatayo'bhūvanrājamārge narairvṛte //

5.89.12

sa gṛhaṃ dhṛtarāṣṭrasya prāviśacchatrukarśanaḥ /
pāṇḍuraiḥ puṇḍarīkākṣaḥ prāsādairupaśobhitam //

5.89.13

tisraḥ kakṣyā vyatikramya keśavo rājaveśmanaḥ /
vaicitravīryaṃ rājānamabhyagacchadarindamaḥ //

5.89.14

abhyāgacchati dāśārhe prajñācakṣurnarādhipaḥ /
tahaiva droṇabhīṣmābhyāmudatiṣṭhanmahāyaśāḥ //

5.89.15

kṛpaśca somadattaśca mahārājaśca bāhlikaḥ /
āsanebhyo'calansarve pūjayanto janārdanam //

5.89.16

tato rājānamāsādya dhṛtarāṣṭraṃ yaśasvinam /
sabhīṣmaṃ pūjayāmāsa vārṣṇeyo vāgbhirañjasā //

5.89.17

teṣu dharmānupūrvī tāṃ prayujya madhusūdanaḥ /
yathāvayaḥ samīyāya rājabhiḥ saha mādhavaḥ //

5.89.18

atha droṇaṃ sabāhlīkaṃ saputraṃ ca yaśasvinam /
kṛpaṃ ca somadattaṃ ca samīyāya janārdanaḥ //

5.89.19

tatrāsīdūrjitaṃ mṛṣṭaṃ kāñcanaṃ mahadāsanam /
śāsanāddhṛtarāṣṭrasya tatropāviśadacyutaḥ //

5.89.20

atha gāṃ madhuparkaṃ cāpyudakaṃ ca janārdane /
upajahnuryathānyāyaṃ dhṛtarāṣṭrapurohitāḥ //

5.89.21

kṛtātithyastu govindaḥ sarvānparihasankurūn /
āste sāmbandhikaṃ kurvankurubhiḥ parivāritaḥ //

5.89.22

so'rcito dhṛtarāṣṭreṇa pūjitaśca mahāyaśāḥ /
rājānaṃ samanujñāpya nirakrāmadarindamaḥ //

5.89.23

taiḥ sametya yathānyāyaṃ kurubhiḥ kurusaṃsadi /
vidurāvasathaṃ ramyamupātiṣṭhata mādhavaḥ //

5.89.24

viduraḥ sarvakalyāṇairabhigamya janārdanam /
arcayāmāsa dāśārhaṃ sarvakāmairupasthitam //

5.89.25

kṛtātithyaṃ tu govindaṃ viduraḥ sarvadharmavit /
kuśalaṃ pāṇḍuputrāṇāmapṛcchanmadhusūdanam //

5.89.26

prīyamāṇasya suhṛdo viduro buddhisattamaḥ /
dharmārthanityasya sato gatarovasya dhīmataḥ //

5.89.27

tasya sarvaṃ savistāraṃ pāṇḍavānāṃ viceṣṭitam /
kṣatturācaṣṭa dāśārhaḥ sarvaṃ pratyakṣadarśivān //

Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0