Mahabharata · Chapter 5.87

rājanbahumataścāsi trailokyasyāpi sattamaḥ /
sambhāvitaśca lokasya sammataścāsi bhārata //

yattvamevangate brūyāḥ paścime vayasi sthitaḥ /
śāstrādvā supratarkādvā susthiraḥ sthaviro hyasi //

lekhā śaśinibhāḥ sūrye mahormiriva sāgare /
dharmastvayi tathā rājanniti vyavasitāḥ prajāḥ //

sadaiva bhāvito loko guṇaughaistava pārthiva /
guṇānāṃ rakṣaṇe nityaṃ prayatasva sabāndhavaḥ //

ārjavaṃ pratipadyasva mā bālyādbrahu nīnaśaḥ /
rājanputrāṃśca pautrāṃśca suhṛdaścaiva supriyān //

yattvaṃ ditsasi kṛṣṇāya rājannatithaye bahu /
etadanyacca dāśārhaḥ pṛthivīmapi cārhati //

na tu tvaṃ dharmamuddiśya tasya vā priyakāraṇāt /
etadditsasi kṛṣṇāya satyenātmānamālabhe //

māyaiṣā satyamevaitacchadmaitadbhūridakṣiṇā /
jānāmi tvanmataṃ rājangūḍhaṃ bāhyena karmaṇā //

pañca pañcaiva lipsyanti grāmakānpāṇḍavā nṛpa /
na ca ditsasi tebhyastāṃstacchamaṃ na kariṣyasi //

arthena tu mahābāhuṃ vārṣṇeyaṃ tvaṃ jihīrṣasi /
anena cāpyupāyena pāṇḍavebhyo vibhetsyasi //

na ca vittena śakyo'sau nodyamena na garhayā /
anyo dhanañjayātkartumetattattvaṃ bravīmi te //

veda kṛṣṇasya māhātmyaṃ vedāsya dṛḍhabhaktitām /
atyājyamasya jānāmi prāṇaistulyaṃ dhanañjayam //

anyatkumbhādapāmpūrṇādanyatpādāvasecanāt /
anyatkuśalasampraśnānnaivekṣyati janārdanaḥ //

yattvasya priyamātithyaṃ mānārhasya mahātmanaḥ /
tadasmai kriyatāṃ rājanmānārho'sau janārdanaḥ //

āśaṃsamānaḥ kalyāṇaṃ kurūnabhyeti keśavaḥ /
yenaiva rājannarthena tadevāsmā upākuru //

śamamicchati dāśārhastava duryodhanasya ca /
pāṇḍavānāṃ ca rājendra tadasya vacanaṃ kuru //

pitā'si rājanputrāste vṛddhastvaṃ śiśavaḥ pare /
vartasva pitṛvatteṣu vartante te hi putravat //