Mahabharata · Chapter 5.84

kathaṃ prayāto dāśārho mahātmā madhusūdanaḥ /
kāni vā vrajatastasya nimittāni mahaujasaḥ //
vaiśampāyana uvāca /

tasya prayāṇe yānyasannimittāni mahātmanaḥ /
tāni me śrṛṇu sarvāṇi daivānyautpātikāni ca //

anabhre'śaninirghoṣaḥ savidyutsamajāyata /
anvageva ca parjanyaḥ prāvarṣadvighane bhṛśam //

pratyagūhurmahānadyaḥ prāṅmukhāḥ sindhusaptamāḥ /
viparitā diśaḥ sarvā na prājñāyata kiñcana //

prājvalannagnayo rājanpṛthivī samakampata /
udapānāśca kumbhāśca prāsiñcañśataśo jalam //

tamaḥsaṃvṛtamapyāsītsarvaṃ jagadidaṃ tathā /
na diśo nādiśo rājanprajñāyantesma reṇunā //

prādurāsīnmahāñchabdaḥ kheśarīramadṛśyata /
sarveṣu rājandeśeṣu tadadbhutamivābhavat //

prāmathnāddhāstinapuraṃ vāto dakṣiṇapaścimaḥ /
ārujangaṇaśo vṛkṣānparuṣo'śaniniḥsvanaḥ //

yatrayatra ca vārṣṇeyo vartate pathi bhārata /
tatratatra sukho vāyuḥ sarvaṃ cāsītpradakṣiṇam //

vavarṣa puṣpavarṣaṃ ca kamalāni ca bhūriśaḥ /
samaśca panthā nirduḥkho vyapetakuśakaṇṭakaḥ //

saṃstuto brāhmaṇairgīrbhistatratatra sahasraśaḥ /
arcyate madhuparkaiśca vasubhiśca vasupradaḥ //

taṃ kiranti mahātmānaṃ vanyaiḥ puṣpaiḥ sugandhibhiḥ /
striyaḥ pathi samāgamya sarvabhūtahite ratam //

sa śālibhavanaṃ ramyaṃ sarvasasyasamācitam /
sukha paramadharmiṣṭhamabhyagādbharatarṣabha //

paśyanbahupaśūngrāmānramyānhṛdayatopaṇān /
purāṇi ca vyatikāmanrāṣṭrāṇi vividhāni ca //

nityaṃ hṛṣṭāḥ sumanaso bhāratairabhirakṣitāḥ /
nodvignāḥ paracakrāṇāṃ vyasanānāmakovidāḥ //

upaplāvyādathāgamya janāḥ puranivāsinaḥ /
yathyatiṣṭhanta sahitā viṣvaksenadidṛkṣayā //

te tu sarve samāyāntamagnimiddhamiva prabhum /
arcayāmāsurarcārhaṃ deśātithimupasthitam //

vṛkasthalaṃ samāsādya keśavaḥ paravīrahā /
prakīrṇaraśmāvāditye vyomni vai lohitāyati //

tato hyanucarānsarvānuvāca madhusūdanaḥ /
yudhiṣṭhirasya kāryārthamiha vatsyāmahe vayam //

tasya tanmatamājñāya cakrurāvasathaṃ narāḥ . kṣaṇena cānnapānāni rarāvanti samārjayan //

avatīrya rathāttūrṇaṃ kṛtvā śaucaṃ yathāvidhi /
rathamocanamādiśya sandhyāmupaviveśa ha //

dāruko'pi hayānmuktvā paricarya ca śāstrataḥ /
mumoca sarvaṃ yoktādi muktvā caitānavāsṛjat //

tasmingrāme pradhānāstu ya āsanbrāhmaṇā nṛpa /
āryāḥ kulīnā hrīmanto brāhmīṃ vṛttimanuṣṭhitāḥ //

te'bhigamya mahātmānaṃ hṛṣīkeśamarindamam /
pūjāṃ cakruryathānyāyamāśīrmaṅgalasaṃyutām //

te pūjayitvā dāśārhaṃ sarvalokeṣu pūjitam /
nyavedayanta veśmāni guṇavanti mahātmane //

tānprabhuḥ kṛtamityuktā satkṛtya ca yathārhataḥ /
abhyetya caiṣāṃ veśmāni punarāyātsahaiva taiḥ //

sumṛṣṭaṃ bhojayitvā ca brāhmaṇāṃstatra keśavaḥ /
bhuktā ca saha taiḥ sarvairavasattāṃ kṣapāṃ sukham //