Mahabharata · Chapter 5.83

yā sā bālyātprabhṛtyasmānparyavardhayatābalā /
upavāsatapaḥśīlā sadā svastyayane ratā //

devatātithipūjāsu guruśuśrūṣaṇe ratā /
vatsalā priyaputrā ca mātā'smākaṃ janārdana //

suyodhanabhayādyā no trāyatāmitrakarśana /
mahato mṛtyusambādhuddustarānnaurivārṇavāt //

asmatkṛte ca satataṃ yayā duḥkhāni mādhava /
anubhūtānyaduḥkhārhāṃ tāṃ sma pṛccheranāmayam //

bhṛśamāśvāsayeścaināṃ putraśokapariplutām /
abhivādya svajethāstvaṃ pāṇḍavānparikīrtayan //

ūḍhātprabhṛti duḥkhāni śvaśurāṇāmarindama /
nirākārā'tadarhā ca paśyantī duḥkhamaśrute //

api jātu sa kālaḥ syātkṛṣṇa duḥkhaviparyayaḥ /
yadahaṃ mātaraṃ kliṣṭāṃ sukhaṃ dadyāmarindama //

pravrajanto'nudhāvantīṃ kṛpaṇāṃ putragṛddhinīm /
rudatīmapahāyaināmagacchāma vayaṃ vanam //

sā nūnaṃ mriyate duḥkhaiḥ sā cejjīvati keśava /
tathā putrādhibhirgāḍhamārtāmarcaya satkṛta //

abhivādyā'tha sā kṛṣṇa tvayā madvacavādvibho /
dhṛtarāṣṭraśca kauravyo rājānaśca vayodhikāḥ //

bhīṣmaṃ droṇaṃ kṛpaṃ caiva mahārājaṃ ca vāhlikam /
drauṇiṃ ca somadattaṃ ca sarvāṃśca bharatānpṛthak //

yathāvayo yathāsthānaṃ prapadyasva janārdana / viduraṃ ca mahāprājñaṃ kurūṇāṃ mantradhāriṇam /
agādhabuddhiṃ marmajñaṃ svajethā madhusūdana //
vaiśampāyana uvāca /

ityuktvā keśavaṃ tatra rājamadhye yudhiṣṭhiraḥ /
anujñāto nivavṛte kṛṣṇaṃ kṛtvā pradakṣiṇam //

vrajanneva tu bībhatsuḥ sakhāyaṃ puruṣarṣabham /
abravītparavīraghraṃ dāśārhamaparājitam //

yadasmākaṃ vibho vṛttaṃ purā vai mantraniścaye /
ardharājyasya govida viditaṃ sarvarājasu //

tacceddadyādakhaṅgena satkṛtyānavamatya ca /
priyaṃ me syānmahābāho mucyeranmahato bhayāt //

ataścedanyathākartā dhārtarāṣṭro'nupāyavit /
antaṃ nūnaṃ kariṣyāmi kṣatriyāṇāṃ janārdana //
vaiśampāyana uvāca /

evamukte pāṇḍavena samahṛṣyadvṛkodaraḥ /
muhurmuhuḥ krodhavaśātprāvepata ca pāṇḍavaḥ //

vepamānaśca kaunteyaḥ prākrośanmahato rajan /
dhanañjayavacaḥ śrutvā harṣotsiktamanā bhṛśam //

tasya taṃ ninadaṃ śrutvā samprāvepanta dhanvinaḥ /
vāhanāni ca sarvāmi śakṛnmūtre pramusruvuḥ //

ityuktvā keśavaṃ tatra tathā cohvā viniścayam /
anujñāto nivavṛte pariṣvajya janārdanam //

teṣu rājasu sarveṣu nivṛtteṣu janārdanaḥ /
tūrṇamabhyagamaddhṛṣṭaḥ śaibyasugrīvavāhanaḥ //

te hayā vāsudevasya dārukeṇa pracoditāḥ /
panthānamācemuriva grasamānā ivāmbaram //

athāpaśyanmahābāhurṛṣīnadhvani keśavaḥ /
brāhyā śriyā dīpyamānānsthitānubhayataḥ pathi //

so'vatīrya rathāttūrṇamabhivādya janārdanaḥ /
yathāvṛttānṛṣīnsarvānabhyabhāṣata pūjayan //

kaccillokeṣu kuśalaṃ kacciddharmaḥ svanuṣṭhitaḥ . brāhmaṇānāṃ trayo varṇāḥ kaccittiṣṭhanti śāsane /
pitṛdevātithibhyaśca kaccitpūtā svanuṣṭhitāḥ //

tebhyaḥ prayujya tāṃ pūjāṃ provāca madhusūdanaḥ /
bhagavantaḥ kva saṃsiddhāḥ ko'vadhirbhavatāmiha //

kiṃ vā kāryaṃ bhagavatāmahaṃ kiṃ karavāṇi yaḥ /
kenārthenopaptamprāptā bhagavanto mahītalam //

evamuktāḥ keśavena munayaḥ śaṃsitavratāḥ /
nāradapramukhāḥ sarve pratyanandanta keśavam //

adhaśśirāḥ sarpamālī maharṣiḥ sa hi devalaḥ . arvāvasuḥ sujānuśca maitreyaḥ śunako balī

bako dālbhyaḥ sthūlaśirāḥ kṛṣṇadvaipāyanastathā /
āpodadhaumyo dhaumyaśca āṇimāṇḍavyakauśikau //

dāmoṣṇīṣastriṣavaṇaḥ parṇādo ghaṭajānukaḥ /
mauñjāyano vāyubhakṣaḥ pārāśaryo'tha śālikaḥ //

śīlavānaśanirdhātā śūnyapālo'kṛtavraṇaḥ / śvetaketuḥ kaholaśca rāmaścaiva mahātapāḥ //

tamabravījjāmadagnya upetya madhusūdanam /
pariṣvajya ca govindaṃ surāsurapateḥ sakhā //

devarṣayaḥ puṇyakṛto brāhmaṇāśca bahuśrutāḥ /
rājarṣayaśca dāśārha mānayanti tapasvinaḥ //

daivāsurasya druṣṭāraḥ purāṇasya mahāmate / sameta pārthivaṃ kṣatraṃ didṛkṣantaśca sarvataḥ /
sabhāsadaśca rājānastvāṃ ca satyaṃ janārdanam //

etanmahatprekṣaṇīyaṃ druṣṭumicchāma keśava //

dharmārthasahitā vācaḥ śrotumicchāma mādhava /
tvayocyamānāḥ kuruṣu rājamadhye parantapa //

sabhāyāṃ madhurā vācaḥ śuśrūṣantastvayeritāḥ . kurūṇāṃ prativācaśca śrotumicchāma mādhava //

bhīṣmadroṇādayaścaiva viduraśca mahāmatiḥ /
tvaṃ ca yādavaśārdūla sabhāyāṃ vai sameṣyatha //

tava vākyāni divyāni tathā teṣāṃ ca mādhava / śrotumicchāma govinda satyāni ca hitāni ca /
āpṛṣṭo'si mahābāho punardrakṣyāmahe vayam //

yāhyavighnena vai vīra drakṣyāmastvāṃ sabhāgatam /
āsīnamāsane divye balatejaḥsamāhitam //
vaiśampāyana uvāca /

prayāntaṃ devakīputraṃ paravīrarujo daśa /
mahārathā mahābāhumanvayuḥ śastrapāṇayaḥ //

padātīnāṃ sahasraṃ ca sādināṃ ca parantapa /
bhojyaṃ ca vipulaṃ rājanpreṣyāśca śataśopare //