Mahabharata · Chapter 5.82

kurūṇāmadya sarveṣāṃ bhavānsuhṛdanuttamaḥ /
sambandhī dayito nityamubhayoḥ pakṣayorapi //

pāṇḍavairdhārtarāṣṭrāṇāṃ pratipādyamanāmayam /
samarthaḥ praśamaṃ caiva kartumarhasi keśava //

tvamittaḥ puṇḍarīkākṣa suyodhanamamarṣaṇam /
śāntyarthaṃ bhrātaraṃ brūyā yattadvācyamamitrahan //

tvayā dharmārthayuktaṃ ceduktaṃ śivamanāmayam /
hitaṃ nādāsyate bālo diṣṭasya vaśameṣyati //
śrībhagavānuvāca /

dharmyamasmaddhitaṃ caiva kurūṇāṃ yadanāmayam /
eṣa yāsyāmi rājānaṃ dhṛtarāṣṭramabhīpsayā //
vaiśampāyana uvāca /

tato vyapete tamasi sūrye vimala udgate /
maitre muhūrte samprāpte madvarciṣi divākare //

kaumude māsi revatyāṃ śaradante himāgame /
sphītasasyasukhe kāle kalyaḥ satvavatāṃ varaḥ //

maṅgalyāḥ puṇyanirghoṣā vācaḥ śrṛṇvaṃśca sūnṛtāḥ /
brāhmaṇānāṃ pratītānāmṛṣīṇāmiva vāsavaḥ //

kṛtvā paurvāhṇikaṃ kṛtyaṃ snātaḥ śuciralaṅkṛtaḥ /
upatasthe vivasvantaṃ pāvakaṃ ca janārdanaḥ //

ṛṣabhaṃ pṛṣṭha ālabhya brāhmaṇānabhivādya ca /
agniṃ pradakṣiṇaṃ kṛtvā paśyankalyāṇamagrataḥ //

tatpratijñāya vacanaṃ pāṇḍavasya janārdanaḥ /
śinernaptāramāsīnamabhyabhāṣata sātyakim //

ratha āropyatāṃ śaṅkhaścakraṃ ca gadayā saha /
upāsaṅgāśca śaktyaśca sarvapraharaṇāni ca //

duryodhanaśca duṣṭātmā karṇaśca sahasaubalaḥ /
na ca śatruravajñeyo durbalo'pi balīyasā //

tatastanmatamājñāya keśavasya punaḥsarāḥ /
prasastnuryojayiṣyanto rathaṃ cakragadābhṛtaḥ //

taṃ dīptamiva kālāgnimākāśagamivāśugam /
sūryacandraprakāśābhyāṃ cakrābhyāṃ samalaṅkṛtam //

ardhacandraiśca candraiśca matsyaiḥ samṛgapakṣibhiḥ /
puṣpaiśca vividhaiścitraṃ maṇiratnaiśca sarvaśaḥ //

taruṇādityasaṅkāśaṃ bṛhantaṃ cārudarśanam /
maṇihemavicitrāṅgaṃ sudhvajaṃ supatākinam //

sūpaskaramanādhṛṣyaṃ vaiyāghraparivāraṇam /
yaśoghnaṃ pratyamitrāṇāṃ yadūnāṃ nandivardhanam //

vājibhiḥ śaibyasugrīvamedhapuṣpabalāhakaiḥ /
snātaiḥ sampādayāmāsuḥ sampannaiḥ sarvasampadā //

mahimānaṃ tu kṛṣṇasya bhūya evābhivardhayan /
sughoṣaḥ patagendreṇa dhvajena yuyuje rathaḥ //

taṃ meruśikharaprakhyaṃ meghadundubhinisvanam /
āruroha rathaṃ saurirvimānamiva kāmagam //

tataḥ sātyakimāropya prayayau puruṣottamaḥ /
pṛthivīṃ cāntarikṣaṃ ca rathaghoṣeṇa nādayan //

vyapoḍhābhrastataḥ kālaḥ kṣaṇena samapadyata /
śivaścānuvavau vāyuḥ praśāntamabhavadrajaḥ //

pradakṣiṇānulomāśca maṅgalyā mṛgapakṣiṇaḥ /
prayāṇe vāsudevasya babhūvuranuyāyinaḥ //

maṅgalyārthapradaiḥ śabdairanvavartanta sarvaśaḥ /
sārasāḥ śatapatrāśca haṃsāśca madhusūdanam //

mantrāhutimahāhomairhūyamānaśca pāvakaḥ /
pradakṣiṇaśikho bhūtvā vidhūmaḥ samapadyata //

vasiṣṭho vāmadevaśca bhūridyumno gayaḥ krathaḥ /
śukanāradavālmīkā maruttaḥ kuśiko bhṛguḥ //

devabrahmarṣayaścaiva kṛṣṇaṃ yadusukhāvaham /
pradakṣiṇamavartanta sahitā vāsavānujam //

evametairmahābhāgairmaharṣigaṇasādhubhiḥ /
pūjitaḥ prayayau kṛṣṇaḥ kurūṇāṃ sadanaṃ prati //

devatābhyo namaskṛtya brāhmaṇānsvasti vācya ca /
prayayau puṇḍarīkākṣaḥ sātyakena sahācyutaḥ //

taṃ prayāntamanuprāyātkuntīputro yudhiṣṭhiraḥ /
bhīmasenārjunau cobhau mādrīputrau ca pāṇḍavau //

cekitānaśca vikrānto dhṛṣṭaketuśca cedipaḥ /
drupadaḥ kāśirājaśca śikhaṇḍī ca mahārathaḥ //

dhṛṣṭadyumnaḥ saputraśca virāṭaḥ kekayaiḥ saha /
saṃsādhanārthaṃ prayayuḥ kṣatriyāḥ kṣatriyarṣabham //

tato'nuvrajya govindaṃ dharmarājo yudhiṣṭhiraḥ /
rājñāṃ sakāśe dyutimānuvācedaṃ vacastadā //

yo vai na kāmānna bhayānna lobhānnārthakāraṇāt /
anyāyamanuvarteta sthirabuddhiralolupaḥ //

dharmajño dhṛtimānprājñaḥ sarvabhūteṣu keśavaḥ /
īśvaraḥ sarvabhūtānāṃ devadevaḥ sanātanaḥ //

taṃ sarvaguṇasampannaṃ śrīvatsakṛtalakṣaṇam /
saṃriṣvajya kaunteyaḥ sandeṣṭumupacakrame //