Mahabharata · Chapter 5.81

rājñastu vacanaṃ śrutvā dharmārthasahitaṃ hitam /
kṛṣṇā dāśārhamāsīnamabravīcchokakarśitā //

sutā drupadarājasya svasitāyatamūrdhajā /
sampūjya sahadevaṃ ca sātyakiṃ ca mahāratham //

bhīmasenaṃ ca saṃśāntaṃ dṛṣṭvā paramadurmanāḥ /
aśrupūrṇekṣaṇā vākyamuvācedaṃ manasvinī //

viditaṃ te mahābāho dharmajña madhusūdana /
yathā nikṛtimāsthāya bhraṃśitāḥ pāṇḍavāḥ sukhāt //

dhṛtarāṣṭrasya putreṇa sāmātyena janārdana /
yathā ca sañjayo rājñā mantraṃ rahasi śrāvitaḥ //

yudhiṣṭhirasya dāśārha taccāpi viditaṃ tava /
yathoktaḥ sañjayaścaiva tacca sarvaṃ śrutaṃ tvayā //

pañca nastāta dīyantāṃ grāmā iti mahādyute /
avisthalaṃ vṛkasthalaṃ mākandīṃ vāraṇāvatam //

avasānaṃ mahābāho kañcidekaṃ ca pañcamam /
iti duryodhano vācyaḥ suhṛdaścāsya keśava //

na cāpi hyakarodvākyaṃ śrutvā kṛṣṇa suyodhanaḥ /
yudhiṣṭhirasya dāśārha śrīmataḥ sandhimicchataḥ //

apradānena rājyasya yadi kṛṣṇa suyodhanaḥ /
sandhimicchenna kartavyaṃ tatra gatvā kathañcana //

śakṣyanti hi mahābāho pāṇḍavāḥ sṛñjayaiḥ saha /
dhārtarāṣṭrabalaṃ ghoraṃ kruddhaṃ pratisamāsitum //

na hi sāmnā na dānena śakyo'rthasteṣu kaścana /
tasmātteṣu na kartavyā kṛpā te madhusūdana //

sāmnā dānena vā kṛṣṇa ye na śāmyanti śatravaḥ /
yoktavyasteṣu daṇḍaḥ syājjīvitaṃ parirakṣatā //

tasmātteṣu mahādaṇḍaḥ kṣeptavyaḥ kṣipramacyuta /
tvayā caiva mahābāho pāṇḍavaiḥ saha sṛñjayaiḥ //

etatsamarthaṃ pārthānāṃ tava caiva yaśaskaram /
kriyamāṇaṃ bhavetkṛṣṇa kṣatrasya ca sukhāvaham //

kṣatriyeṇa hi hantavyaḥ kṣatriyo lobhamāsthitaḥ /
akṣatriyo vā dāśārha svadharmamanutiṣṭhatā //

anyatra brāhmaṇāttāta sarvapāpeṣvavasthitāt /
gururhi sarvavarṇānāṃ brāhmaṇaḥ prasṛtāgrabhuk //

yathā'vadhye vadhyamāne bhaveddoṣo janārdana /
sa vadhyasyāvadhe dṛṣṭa iti dharmavido viduḥ //

yathā tvāṃ na spṛśedeṣa doṣaḥ kṛṣṇa tathā kuru /
pāṇḍavaiḥ saha dāśarhaiḥ sṛñjayaiśca sasainikaiḥ //

punaruktaṃ ca vakṣyāmi viśrambheṇa janārdana /
kā tu sīmantinī mādṛkaṃ pṛthivyāmasti keśava //

sutā drupadarājasya vedimadhyātsamutthitā /
dhṛṣṭadyumnasya bhaginī tava kṛṣṇa priyā sakhī //

ājamūḍhakulaṃ prāpta snuṣā pāṇḍormahātmanaḥ /
mahiṣī pāṇḍuputrāṇāṃ pañcendrasamavarcasām //

sutā me pañcabhirvīraiḥ pañca jātā mahārathāḥ /
abhimanyuryathā kṛṣṇa tathā te tava dharmataḥ //

sā'haṃ keśagrahaṃ prāptā parikliṣṭā sabhāṃ gatā /
paśyatāṃ pāṇḍuputrāṇāṃ tvayi jīvati keśava //

jīvastu pāṇḍuputreṣu pañcāleṣvatha vṛṣṇiṣu /
dāsībhātā'smi pāpānāṃ sabhāmadhye vyavasthitā //

niramarṣeṣvaceṣṭeṣu prekṣyamāṇeṣu pāṇḍuṣu /
pāhi māmiti govinda manasā cintitosi me //

yatra māṃ bhagavānrājā śvaśuro vākyamabravīt /
varaṃ vṛṇīṣva pāñcāli varārhā'si matā mama //

adāsāḥ pāṇḍavāḥ santu sarathāḥ sāyudhā iti /
mayokte yatra nirmuktā vanavāsāya keśava //

evaṃvidhānāṃ duḥkhānāmabhijño'si janārdana /
trāyasva puṇḍarīkākṣa sabhartṛjñātibāndhavān //

nanvahaṃ kṛṣṇa bhīṣmasya dhṛtarāṣṭrasya cobhayoḥ /
śnuṣā bhavāmi dharmeṇa sā'haṃ dāsīkṛtā balāt //

dhikpārthasya dhanuṣmattāṃ bhīmasenasya dhigbalam /
yatra duryodhanaḥ kṛṣṇa muhūrtamapi jīvati //

yadi te'hamanugrāhyā yadi te'sti kṛpā mayi /
dhārtarāṣṭreṣu vai kopaḥ sarvaḥ kṛṣṇa vidhīyatām //
vaiśampāyana uvāca /

ityuktvā mṛdusaṃhāraṃ vṛjināgraṃ sudarśanam /
sunīlamasitāpāṅgī sarvagandhādivāsitam //

sarvalakṣaṇasampannaṃ mahābhujagavarcasam /
keśapakṣaṃ varārohā gṛhva vāmena pāṇinā //

padmākṣī puṇḍarīkākṣamupetya gajagāminī /
aśrupūrṇekṣaṇā kṛṣṇā kṛṣṇaṃ vacanamabravīt //

ayaṃ te puṇḍarīkākṣa duḥśāsanakaroddhṛtaḥ /
smartavyaḥ sarvakāryeṣu pareṣāṃ sandhimicchatām //

yadi bhīmārjunau kṛṣṇa kṛpaṇau sandhikāmukau /
pitā me yotsyate vṛddhaḥ saha putrairmahārathaiḥ //

pañca caiva mahāvīryāḥ putrā me madhusūdana /
abhimanyuṃ puraskṛtya yotsyante kurubhiḥ saha //

duḥśāsanabhujaṃ śyāmaṃ sañchinnaṃ pāṃsukuṇṭhitam /
yadyahaṃ tu na paśyāmi kā śāntirhṛdayasya me //

trayodaśa hi varṣāṇi pratīkṣantyā gatāni me /
vidhāya hṛdaye manyuṃ pradīptamiva pāvakam //

vidīryate me hṛdayaṃ bhīmavākśalyapīḍitam /
yo'yamadya mahābāhurdharmamevānupaśyati //

ityuktvā bāṣparuddhena kaṇṭhenāyatalocanā /
ruroda kṛṣṇā sotkampaṃ sasvaraṃ bāṣpagadgadam //

stanau pīnāyataśroṇī sahitāvabhivarṣatī /
dravībhūtamivātyuṣṇaṃ muñcantī vāri netrajam //

tāmuvāca mahābāhuḥ keśavaḥ parisāntvayan /
acirāddrakṣyase kṛṣṇe rudatīrbharatastriyaḥ //

evaṃ tā bhīru rostyanti nihatajñātibāndhavāḥ /
hatamitrā hatabalā yeṣāṃ kruddhā'si bhāminī //

ahaṃ ca tatkariṣyāmi bhīmārjunayamaiḥ saha /
yudhiṣṭhiraniyogena daivācca vidhinirmitāt //

dhārtarāṣṭrāḥ kālapakvā na cecchṛṇvanti me vacaḥ /
śeṣyante nihatā bhūmau śvasṛgālādanīkṛtāḥ //

caleddhi himavāñśailo medinī śatadhā bhavet / dyauḥ patecca sanakṣatrā na me moghaṃ vaco bhavet // 5-81-49a śuṣyettoyanidhiḥ kṛṣṇe na me moghaṃ vaco bhavet / satyaṃ te pratijānāmi kṛṣṇe bāṣpo nigṛhyatām /
hatāmitrāñśriyā yuktānacidāddrakṣyase patīn //