Mahabharata · Chapter 5.80

yadetatkathitaṃ rājñā dharma eṣa sanātanaḥ /
yathā ca yuddhameva syāttathā kāryamarindama //

yadi prasamamiccheyuḥ kuravaḥ pāṇḍavaiḥ saha /
tathāpi yuddhaṃ dāśārha yojayethāḥ sahaiva taiḥ //

kathaṃ nu dṛṣṭvā pāñcālīṃ tathā kṛṣṇa sabhāgatām /
avadhena praśāmyeta mama manyuḥ suyodhane //

yadi bhīmārjunau kṛṣṇa dharmarājaśca dhārmikaḥ /
dharmamutsṛjya tenāhaṃ yoddhumicchāmi saṃyuge //

brūhi madvacanaṃ kṛṣṇa suyodhanamapaṇḍitam /
kṛcchre vane vā vastavyaṃ pure vā nāgasāhvaye //
sātyakiruvāca /

satyamāha mahābāho sahadevo mahāmatiḥ /
duryodhanavadhe śāntistasya kopasya me bhavet //

na jānāsi yathā dṛṣṭvā cīrājinadharānvane /
tavāpi manyuruddhūto duḥkhitānprekṣya pāṇḍavān //

tasmānmādrīsutaḥ śūro yadāha raṇakarkaśaḥ /
vacanaṃ sarvayodhānāṃ tanmataṃ puruṣottama //
vaiśampāyana uvāca /

evaṃ vadi vākyaṃ tu yuyudhāne mahāmatau /
subhīmaḥ siṃhanādo'bhūdyodhānāṃ tatra sarvaśaḥ //

sarve hi sarvaśo vīrāstadvacaḥ pratyapūjayan /
sādhusādhviti śaineyaṃ harṣayanto yuyutsavaḥ //