Mahabharata · Chapter 5.79

uktaṃ bahuvidhaṃ vākyaṃ dharmarājena mādhava /
dharmajñena vadānyena śrutaṃ caiva hi tattvayā //

matamājñāya rājñaśca bhīmasenena mādhava /
saṃśamo bāhuvīrya ca khyāpitaṃ mādhavātmanaḥ //

tathaiva phālgunenāpi yaduktaṃ tattvayā śrutam /
ātmanaśca mataṃ vīra kathitaṃ bhavatā'sakṛt //

sarvametadatikramya śrutvā paramataṃ bhavān /
yatprāptakālaṃ manyethāstatkuryāḥ puruṣottama //

tasmiṃratasminnimitte hi mataṃ bhavati keśava /
prāptakālaṃ manuṣyeṇa kṣamaṃ kāryamarindama //

anyathā cintito hyarthaḥ punarbhavati so'nyathā /
anityamatayo loke narāḥ puruṣasattama //

anyathābuddhayo hyāsannasmāsu vanavāsiṣu /
adṛśyeṣvanyathā kṛṣṇa dṛśyeṣu punaranyathā //

asmākamapi vārṣṇeya vane vicaratāṃ tadā /
na tathā praṇayo rājye yathā samprati vartate //

nivṛttavanavāsānnaḥ śrutvā vīra samāgatāḥ /
akṣauhiṇyo hi sapte māstvatprasādājjanārdana //

imānhi puruṣavyāghrānacintyabalapauruṣāt /
āttaśastrānraṇe dṛṣṭvā na vyathediha kaḥ pumān //

sa bhavānkurumadhye taṃ sāntvapūrvaṃ bhayottaram /
brūyādvākyaṃ yathā mando na vyatheta suyodhanaḥ //

yudhiṣṭhiraṃ bhīmasenaṃ bībhatsuṃ cāparācitam /
sahadevaṃ ca māṃ caiva tvāṃ ca rāmaṃ ca keśava //

sātyakiṃ ca mahāvīryaṃ virāṭaṃ ca mahātmajam /
drupadaṃ ca mahāmātyaṃ dhṛṣṭadyumnaṃ ca mādhava //

kāśirājaṃ ca vikrāntaṃ dhṛṣṭaketuṃ ca cedipam /
māṃsaśoṇitabhṛnmartyaḥ pratiyudhyeta ko yudhi //

sa bhavāngamanādeva sādhayiṣyatyasaṃśayam /
iṣṭamarthaṃ mahābāho dharmarājasya kevalam //

viduraścaiva bhīṣmaśca droṇaśca sahabāhlikaḥ /
śreyaḥ samarthā vijñātumucyamānāstvayā'nagha //

te cainamanuneṣyanti dhṛtarāṣṭraṃ janādhipam /
taṃ ca pāpasamācāraṃ sahāmātyaṃ suyodhanam //

śrotā cārthasya vidurastvaṃ ca vaktā janārdana /
kamivārthaṃ nivartantaṃ sthāpayetāṃ na vartmani //