Mahabharata · Chapter 5.78

evametanmahābāho yathā vadasi pāṇḍava / pāṇḍavānāṃ kurūṇāṃ ca pratipatsye nirāmayam /
sarvaṃ tvidaṃ mamāyattaṃ bībhatso karmaṇordvayoḥ //

kṣetraṃ hi rasavacchuddhaṃ karmaṇaivopapāditam /
ṛte varṣānna kaunteya jātu nirvartayetphalam //

tatra vai pauruṣaṃ brūyurāsekaṃ yatra kāritam /
tatra cāpi dhruvaṃ paśyecchoṣaṇaṃ daivakāritam //

tadidaṃ niścittaṃ buddhyā pūrvairapi mahātmabhiḥ /
daive ca mānuṣe caiva saṃyuktaṃ lokakāraṇam //

ahaṃ hi tatkariṣyāmi paraṃ puruṣakārataḥ /
devaṃ tu na mayā śakyaṃ karma kartuṃ kathañcana //

sa hi dharmaṃ ca lokaṃ ca tyaktvā carati durmatiḥ /
na hi santapyate tena tathārūpeṇa karmaṇā //

tathāpi buddhiṃ pāpiṣṭhāṃ vardhayantyasya mantriṇaḥ /
śakuniḥ sūtaputraśca bhrātā duḥśāsanastathā //

sa hi tyāgena rājyasya na śamaṃ samupaiṣyati /
antareṇa vadhaṃ pārtha sānubandhaḥ suyodhanaḥ //

na cāpi praṇipātena tyaktumicchati dharmarāṭ /
yācyamānaśca rājyaṃ sa na prajāsyati durmatiḥ //

na tu manye sa tadvācyo yadyudhiṣṭhiraśātanam /
uktaṃ prayojanaṃ yattu dharmarājena bhārata //

tathā pāpastu tatsarvaṃ na kariṣyati kauravaḥ /
tasmiṃścākriyamāṇe'sau loke vadhyo bhaviṣyati //

mama cāpi sa vadhyo hi jagataścāpi bhārata /
tena kaumārake yūyaṃ sarve viprakṛtāḥ sadā //

vipraluptaṃ ca vo rājyaṃ nṛśaṃsena durātmanā /
na copaśāmyate pāpaḥ śriyaṃ dṛṣṭvā yudhiṣṭhire //

asakṛccāpyahaṃ tena tvatkṛte pārtha bheditaḥ /
na mayā tadgṛhītaṃ ca pāpaṃ tasya cikīrṣetam //

jānāsi hi mahābāho tvamapyasya paraṃ matam /
priyaṃ cikīrṣamāṇaṃ ca dharmarājasya māmapi //

sañjānaṃstasya cātmānaṃ mama caiva paraṃ matam /
ajānanniva māṃ kasmādarjunādyābhiśaṅkase //

yaccāpi paramaṃ divyaṃ taccāpyanugataṃ tvayā /
vidhānaṃ vihitaṃ pārtha kathaṃ śarma bhavetparaiḥ //

yattu vācā mayā śakyaṃ karmaṇā vā'pi pāṇḍava /
kariṣye tadahaṃ pārtha na tvāśaṃse śamaṃ paraiḥ //

kathaṃ goharaṇe hyukto naitaccharma tathā hitam /
yācyamāno hi bhīṣmeṇa saṃvatsaragate'dhvani //

tadaiva te parābhūtā yadā saṅkalpitāstvayā /
lavaśaḥ kṣaṇaśaścāpi na ca tuṣṭaḥ suyodhanaḥ //

sarvathā tu mayā kāryaṃ dharmarājasya śāsanam /
vibhāvyaṃ tasya bhūyaśca karma pāpaṃ durātmanaḥ //