Mahabharata · Chapter 5.66

duryodhane dhārtarāṣṭre tadvaco nābhinandati /
tūṣṇīmbhūteṣu sarveṣu samuttasthurnararṣabhāḥ //

utthiteṣu mahārāja pṛthivyāṃ sarvarājasu /
rahite sañjayaṃ rājā paripraṣṭuṃ pracakrame //

āśaṃsamāno vijayaṃ teṣāṃ putravaśānugaḥ /
ātmanaśca pareṣāṃ ca pāṇḍavānāṃ ca niścayam //
dhṛtarāṣṭra uvāca /

gāvalgaṇe brūhi naḥ sāraphalgu svesanāyaṃ yāvadihāsti kiñcit /
tvaṃ pāṇḍavānāṃ nipuṇaṃ vettha sarvaṃ kimeṣāṃ jyāyaḥ kimu teṣāṃ kanīyaḥ //

tvametayoḥ sāravitsarvadarśī dharmārthayornipuṇo niścayajñaḥ /
sa me pṛṣṭaḥ sañjaya brūhi sarvaṃ yudhyamānāḥ katare'sminna santi //
sañjaya uvāca /

na tvāṃ brūyāṃ rahite jātu kiñci- dasūyā hi tvāṃ praviśeta rājan /
ānayasva pitaraṃ mahāvrataṃ gāndhārīṃ ca mahiṣīmājamīḍha //

to te'sūyāṃ vinayetāṃ narendra dharmajñau tau nipuṇau niścayajñau /
tayostu tvāṃ sannidhau tadvadeyaṃ kṛtsnaṃ mataṃ keśavapārthayoryat //
vaiśampāyana uvāca /

ityuktena ca gāndhārī vyāsaścātrājagāmaha /
ānītau vidureṇeha sabhāṃ śīghraṃ praveśitau //

tatastanmatamājñāya sañjayasyātmajasya ca /
abhyupetya mahāprājñaḥ kṛṣṇadvaipāyano'bravīt //
vyāsa uvāca /

sampṛcchate dhṛtarāṣṭraya sañjaya ācakṣva sarvaṃ yāvadeṣo'nuyuṅkte /
sarvaṃ yāvadvettha tasminyathāva- dyāthātathyaṃ vāsudeve'rjune ca //