Mahabharata · Chapter 5.67
arjuno vāsudevaśca dhanvinau paramārthitau /
kāmādanyatra sambhūtau sarvabhāvāya sammitau //
vyāmāntaraṃ samāsthaya yathāmuktaṃ manasvinaḥ /
cakraṃ tadvāsudevasya māyayā vartate vibho //
sāpahnavaṃ kauraveṣu pāṇḍavānāṃ susammatam /
sārāsārabalaṃ jñātuṃ tejaḥpuñjāvabhāsitam //
narakaṃ śambaraṃ caiva kaṃsaṃ caidyaṃ ca mādhavaḥ /
jitavānghorasaṅkāśānkrīḍanniva mahābalaḥ //
pṛthivīṃ cāntarikṣaṃ ca dyāṃ caiva puruṣottamaḥ /
manasaiva viśiṣṭātmā nayatyātmavaśaṃ vaśī //
bhūyo bhūyo hi yadrājanpṛcchase pāṇḍavānprati /
sārāsārabalaṃ jñātuṃ tatsamāsena me śṛṇu //
ekato vā jagatkṛtsnamekato vā janārdanaḥ /
sārato jagataḥ kṛtsnādatirikto janārdanaḥ //
bhasma kuryāñjagadidaṃ manasaiva janārdanaḥ /
na tu kṛtsnaṃ jagacchaktaṃ kiñcitkartuṃ janārdane //
yataḥ satyaṃ yato dharmo yato hrīrārjavaṃ yataḥ /
tato bhavati govindo yataḥ kṛṣṇastato jayaḥ //
pṛthivīṃ cāntarikṣaṃ ca divaṃ ca puruṣottamaḥ /
viceṣṭayati bhūtātmā krīḍanniva janārdanaḥ //
sa kṛtvā pāṇḍavānsatraṃ lokaṃ sammohayanniva /
adharmaniratānmūḍhāndagdhumicchati te sutān //
kālacakraṃ jagaccakraṃ yugacakraṃ ca keśavaḥ /
ātmayogena bhagavānparivartayate'niśam //
kālasya ca hi mṛtyośca jaṅgamasthāvarasya ca /
īṣṭe hi bhagavānekaḥ satyametadbravīmi te //
īśannapi mahāyogī sarvasya jagato hariḥ /
karmāṇyārabhate kartuṃ kīnāśa iva durbalaḥ //
tena vañcayate lokānmāyāyogena keśavaḥ /
ye tameva prapadyante na te muhyanti mānavāḥ //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0