Mahabharata · Chapter 5.65

duryodhana vijānīhi yattvāṃ vakṣyāmi putraka /
utpathaṃ manyase mārgamanabhijña ivādhvagaḥ //

pañcānāṃ pāṇḍuputrāṇāṃ yattejaḥ prajihīrṣasi /
pañcānāmiva bhūtānāṃ mahatāṃ lokadhāriṇām //

yudhiṣṭhiraṃ hi kaunteyaṃ paraṃ dharmamihāsthitam /
parāṃ gatimasampretya na tvaṃ jetumihārhasi //

bhīmasenaṃ ca kaunteyaṃ yasya nāsti samo bale /
raṇāntakaṃ tarjayase mahāvātamiva drumaḥ //

sarvaśastrabhṛtāṃ śreṣṭhaṃ meruṃ sikhariṇāmiva /
yudhi gāṇḍivadhanvānaṃ ko nu yudhyeta buddhimān //

dhṛṣṭadyumnaśca pāñcālyaḥ kamivādya na śātayet /
śatrumadhye śarānmuñcandevarāḍaśanīmiva //

sātyakiścāpi durdharṣaḥ sammato'ndhakavṛṣṇiṣu /
dhvaṃsayiṣyati te senāṃ pāṇḍaveyahite rataḥ //

yaḥ punaḥ pratimānena trīllokānatiricyate /
taṃ kṛṣṇaṃ puṇḍarīkākṣaṃ ko nu yuddhyeta buddhimān //

ekato hyasya dārāśca jñātayaśca sabāndhavāḥ /
ātmā ca pṛthivī ceyamekataśca dhanañjayaḥ //

vāsudevo'pi durdharṣo yatātmā yatra pāṇḍavaḥ /
aviṣahyaṃ pṛthivyāpi tadbalaṃ yatra keśavaḥ //

tiṣṭha tāta satāṃ vākye suhṛdāmarthavādinām /
vṛddhaṃ śāntanavaṃ bhīṣmaṃ titikṣasva pitāmaham //

māṃ ca bruvāṇaṃ śuśrūṣa kurūṇāmarthadarśinam /
droṇaṃ kṛpaṃ vikarṇaṃ ca mahārājaṃ ca bāhlikam //

ete hyapi yataivāhaṃ mantumarhasi tāṃstathā /
sarve dharmavido hyete tulyasnehāśca bhārata //

yattadvirāṭanagare saha bhrātṛbhiragrataḥ /
utsṛjya gāḥ susantrastaṃ balaṃ te samaśīryata //

yaccaiva nagare tasmiñśrūyate mahadadbhutam /
ekasya ca bahūnāṃ ca paryāptaṃ tannidarśanam //

arjunastattathākārṣītkiṃ punaḥ sarva eva te /
sa bhrātṝnabhijānīhi vṛttyā taṃ pratipādaya //