Mahabharata · Chapter 5.60

sañjayasya vacaḥ śrutvā prajñācakṣurjaneśvaraḥ /
tataḥ saṅkhyātumārebhe tadvaco guṇadoṣataḥ //

prasaṅkhyāya ca saukṣmyeṇa guṇadoṣānvicakṣaṇaḥ /
yathāvanmatitattvena jayakāmaḥ sutānprati //

balābalaṃ viniścitya yāthātathyena buddhimān /
yadā tu mene bhūyiṣṭhaṃ tadvaco guṇadoṣataḥ //

punareva kurūṇāṃ ca pāṇḍavānāṃ ca buddhimān . śaktiṃ śaṅkhyātumārebhe tadā vai manujādhipaḥ //

devamānuṣayoḥ śaktyā tejasā caiva pāṇḍavān /
kurūñśaktyā'lpatarayā duryodhanamathābravīt //

duryodhaneyaṃ cintā me śaśvanna vyupaśāmyati /
satyaṃ hyetadahaṃ manye pratyakṣaṃ nānumānataḥ //

ātmajeṣu paraṃ snehaṃ sarvabhātini kurvate /
priyāmi caiṣāṃ kurvanti yathāśakti hitāni ca //

evamevopakartṝṇāṃ prāyaśo lakṣayāmahe /
icchanti bahulaṃ santaḥ pratikartuṃ mahatpriyam //

agniḥ sācivyartā syātkhāṇḍave tatkṛtaṃ smaran /
arjunasyāpi bhīme'sminkurupāṇḍusamāgame //

jātigṛddhyā'bhipannāśca pāṇ़ḍavānāmanekaśaḥ /
dharmādayaḥ sameṣyanti samāhūtā divaukasaḥ //

bhīṣmadroṇakṛpādīnāṃ bhayādaśanisannibham /
rirakṣiṣantaḥ saṃrabhyaṃ gamiṣyantīti me matiḥ //

te devaiḥ sahitāḥ pārthā na śakyāḥ prativīkṣitum /
mānuṣeṇa naravyāghrā vīryavanto'strapāragāḥ //

durāsadaṃ yasya divyaṃ gāṇḍīvaṃ dhanuruttamam /
vāruṇau cākṣayau divyau śarapūrṇau maheṣudhī //

vānaraśca dhvaje divyo niḥsaṅge dhūmavadgatiḥ /
rathaśca caturantāyāṃ yasya nāsti samaḥ kṣitau //

mahāmeghanibhaścāpi nirghoṣaḥ śrūyate janaiḥ /
mahāśanisamaḥ śabdaḥta śātravāṇāṃ bhayankaraḥ //

yaṃ cātimānuṣaṃ vīrye kṛtsno loko vyavasyati /
devānāmapi jetāraṃ yaṃ viduḥ pārthivā raṇe //

śatāni pañca caiveṣūnyo gṛhṇannaiva dṛśyate /
nimeṣāntaramātreṇa muñcandūraṃ ca pātayan //

yamāha bhīṣmo droṇaśca kṛpo drauṇistathaiva ca /
madrarājastathā śalyo madhyasthā ye ca mānavāḥ //

yuddhāyāvasthitaṃ pārthaṃ pārthivairatimānuṣaiḥ /
aśakyaṃ rathaśārdūlaṃ parājetumarindamam //

kṣipatyekena vegena pañcabāṇaśatāni yaḥ /
sadṛśaṃ bāhuvīryeṇa kārtavīryasya pāṇḍavam //

tamarjunaṃ maheṣvāsaṃ mahendropendravikramam /
nighnantamiva paśyābhi vimarde'sminmahāhave //

ityevaṃ cintayankṛtsnamahorātrāṇi bhārata /
anidro niḥsukhaścāsmi kurūṇāṃ śamacintayā //

kṣayodayo'yaṃ sumahānkurūṇāṃ pratyupasthitaḥ /
asya cetkalahanyāntaḥ śamādanyo na vidyate //

śamo me rocate nityaṃ pārthaistāta na vigrahaḥ /
kurubhyo hi sadā manye pāṇḍavāñśaktimattarān //