Mahabharata · Chapter 5.59

brūhi sañjaya yaccheṣaṃ vāsudevādanantaram /
yajarjuna uvāca tvāṃ paraṃ kautūhalaṃ hi me //
sañjaya uvāca /

vāsudevavacaḥ śrutvā kuntīputro dhanañjayaḥ /
uvāca kāle durdharṣo vāsudevasya śṛṇvataḥ //

pitāmahaṃ śāntanavaṃ dhṛtarāṣṭraṃ ca sañjaya /
droṇaṃ kṛpaṃ ca śalyaṃ ca mahārājaṃ ca bāhlikam //

drauṇiṃ ca saumadattiṃ ca śakuniṃ cāpi saubalam /
duśśāsanaṃ śalaṃ caiva purumitraṃ viviṃśatim //

vikarṇaṃ citrasenaṃ ca jayatsenaṃ ca pārthivam /
vindānuvindāvāvantyau durmukhaṃ cāpi pauravam //

saindhavaṃ dussahaṃ caiva bhūriśravasameva ca /
bhagadattaṃ ca rājānaṃ jalasandhaṃ ca pauravam //

ye cāpyanye pārthivāstatra yoddhuṃ samāgatāḥ kauravāṇāṃ priyārtham /
mumūrṣavaḥ pāṇḍavāgnau pradīpte samānītā dhārtarāṣṭroṇa sūta //

yathānyāyaṃ kuśalaṃ vandanaṃ ca samāgatā madvacanena vācyāḥ //

idaṃ brūvāḥ sañjaya rājamadhye duryodhanaṃ pāpakṛtāṃ pradhānam /
amarṣaṇaṃ durmatiṃ rājaputraṃ pāpātmānaṃ dhārtarāṣṭraṃ sulubdham / sarvaṃ mamaitadvacanaṃ samagraṃ sahāmātyaṃ sañjaya śrāvayethāḥ //

evaṃ pariṣvajya dhanañjayo māṃ tato'rthavaddharmavaccāpi vākyam /
provācedaṃ vāsudevaṃ samīkṣya pārtho dhīmām̐llohitāntāyatākṣaḥ //

yathāśrutaṃ te vadato mahātmano yadupravīrasya vacaḥ samāhitam /
tathaiva vācyaṃ bhavatāpi madvacaḥ samāgateṣu kṣitipeṣu sarvaśaḥ //

śarāgnidhūme rathaneminādite dhanusstruveṇāstrabalāpahāriṇā /
yathā na homaḥ kriyate mahāmṛdhe tathā sametya prayatadhvamādṛtāḥ //

na cetprayacchadhvamamitraghātino yudhiṣṭhirasyārdhamabhīpsitaṃ svakam /
nayāmi vaḥ sāśvapadātikuñjarā- ndiśaṃ pitṝṇāmaśivāṃ śitaiḥ śaraiḥ //

tato'hamāmantrya caturbhujaṃ hariṃ dhanañjayaṃ caiva namasya satvaram /
javena samprāpta ihāmaradyute tavāntikaṃ prāpayituṃ vaco mahat //