Mahabharata · Chapter 5.61

pituretadvacaḥ śrutvā dhārtarāṣṭro'tyamarṣaṇaḥ /
ādhāya vipulaṃ krodhaṃ punarevedamabravīt //

aśakyā devasacivāḥ pārthāḥ syuriti yadbhavān /
manyate tadbhayaṃ vyetu bhavato rājasattama //

akāmadveṣasaṃyogāllobhadrohācca bhārata /
upekṣayā ca bhāvānāṃ devā devatvamāpnuvan //

iti dvaipāyeno vyāso nāradaśca mahātapāḥ /
jāmadagnyaśca rāmo naḥ kathāmakathayatpurā //

naiva mānuṣavaddevāḥ pravartante kadācana /
kāmātkrodhāttathā lobhāddveṣācca bharatarṣabha //

yadā hyagniśca vāyuśca dharma indro'śvināvapi /
kāmayogātpravarteranna pārthā duḥkhamāpnuyuḥ //

tasmānna bhavatā cintā kāryaiṣā syātkathañcana /
daiveṣvapekṣakā hyete śaśvadbhāveṣu bhārata //

atha cetkāmasaṃyogāddveṣo lobhaśca lakṣyate /
deveṣu daivaprāmāṇyānnaiṣāṃ tadvikramiṣyati //

mayā'bhimantrataḥ śaśvañjātavedāḥ praśāmyati /
didhakṣuḥ sakalām̐llokānparikṣipya samantataḥ //

yadvā paramakaṃ tejo yena yuktā divaukasaḥ /
mamāpyanupamaṃ bhūyo devebhyo viddhi bhārata //

vidīryamāṇāṃ vasudhāṃ girīṇāṃ śikharāṇi ca /
lokasya paśyato rājansthāpayāmyabhimantraṇāt //

cetanācetanasyāsya jaṅgamasthāvarasya ca /
vināśāya samutpannamahaṃ ghoraṃ mahāsvanam //

aśmavarṣaṃ ca vāyuṃ ca śamayāmīha nityaśaḥ /
jagataḥ paśyato'bhīkṣṇaṃ bhūtānāmanukampayā //

stambhitāsvapsu gacchanti mayā rathapadātayaḥ /
devāsurāṇāṃ bhāvānāmahamekaḥ pravartitā //

akṣauhiṇībhiryāndeśānyāmi kāryeṇa kenacit /
tatrāpo me pravartante yatra yatrābhikāmaye //

bhayānakāni viṣaye vyālādīni na santi me /
mantraguptāni bhūtāni na hiṃsanti yankarāḥ //

nikāmavarṣī parjanyo rājanviṣayavāsinām /
dharmiṣṭhāśca prajāḥ sarvā ītayaśca na santi me //

aśvināvatha vāyvagnī marudbhiḥ saha vṛtrahā /
dharmaścaiva mayā dviṣṭānnotsahante'bhirakṣitum //

yadi hyete samarthāḥ syurmaddviṣastrātumañjasā /
na sma trayodaśa samāḥ pārthā duḥkhabhavāpnuyuḥ //

naiva devā na gandharvā nāsurā na ca rākṣasāḥ /
śaktāstrātuṃ mayā dviṣṭaṃ satyametadbravīmi te //

dayabhidhyāmyahaṃ śaśvacchubhaṃ vā yadi vā'śubham /
naitadvipannapūrvaṃ me mitreṣvariṣu cobhayoḥ //

bhaviṣyatīdamiti vā yadbravīmi parantapa /
nānyathā bhūtapūrvaṃ ca satyavāgiti māṃ viduḥ //

lokasākṣikametanme māhātmyaṃ dikṣu viśrutam /
āśvāsanārthaṃ bhavataḥ proktaṃ na ślāghayā nṛpa //

na hyahaṃ ślāghano rājanbhūtapūrvaḥ kadācana /
asadācaritaṃ hyetadyadātmānaṃ praśaṃsati //

pāṇḍavāṃścaiva matsyāṃśca pāñcālānkekayaiḥ saha /
sātyakiṃ vāsudevaṃ ca śrotāsi vijitānmayā //

saritaḥ sāgaraṃ prāpya yathā naśyanti sarvaśaḥ /
tathaiva te vinaṅkṣyanti māmāsādya sahānvayāḥ //

parā buddhiḥ paraṃ tejo vīryaṃ ca paramaṃ mama /
parā vidyā paro yogo mama tebhyo viśiṣyate //

pitāmahaśca droṇaśca kṛpaḥ śalyaḥ śalastathā /
astreṣu yatprajānanti sarvaṃ tanmayi vidyate //

ityukte sañjayaṃ bhūyaḥ paryapṛcchata bhārata /
jñātvā yuyutsoḥ kāryāṇi prāptakālamarindamaḥ //