Mahabharata · Chapter 5.58

kṣatratejā brahmacārī kaumārādapi pāṇḍavaḥ /
tena saṃyugameṣyanti mandā vilapato mama //

duryodhana nivartasva yuddhādbharatasattama /
na hi yuddhaṃ praśaṃsanti sarvāvasthamarindama //

alamardhaṃ pṛthivyāste sahāmātyasya jīvitum /
prayaccha pāṇḍuputrāṇāṃ yathocitamarindama //

etaddhi kuravaḥ sarve manyante dharmasaṃhitam /
yattvaṃ praśāntiṃ manyethāḥ pāṇḍuputrairmahātmabhiḥ //

aṅgemāṃ samavekṣasva putra svāmeva vāhinīm /
jāta eṣa tavābhāvastvaṃ tu mohānna buddhyase //

na tvahaṃ yuddhamicchāmi naitadicchati bāhlikaḥ /
na ca bhīṣmo na ca droṇo nāśvatthāmā na sañjayaḥ //

na somadatto na śalo na kṛpo yuddhamicchati /
satyavrataḥ purumitro jayo bhūriśravāstathā //

yeṣu sampratitiṣṭheyuḥ kuravaḥ pīḍitāḥ paraiḥ /
te yuddhaṃ nābhinandanti tattubhyaṃ tāta rocatām //

na tvaṃ karoṣi kāmena karṇaḥ kārayitā tava /
duḥśāsanaśca pāpātmā śakuniścāpi saubalaḥ //
duryodhana uvāca /

nāhaṃ bhavati na droṇe nāśvatthāmni na sañjaye /
na bhīṣme na kāmbhoje na kṛpe na ca bāhlike //

satyavrate purumitre bhūriśravasi vā punaḥ /
anyeṣu vā tāvakeṣu bhāraṃ kutvā samāhvayam //

ahaṃ ca tāta karṇaśca raṇayajñaṃ vitatya vai /
yudhiṣṭhiraṃ paśuṃ kṛtvā dīkṣitau bharatarṣabha //

ratho vedī sruvaḥ khaṅgo gadā sruk kavaco'jinam /
cāturhotraṃ ca dhuryā me śarā darbhā haviryaśaḥ //

ātmayajñena nṛpate iṣṭvā vaivasvataṃ raṇe /
vijitya ca sameṣyāvo hatāmitrau śriyā vṛtau //

ahaṃ ca tāta karṇaśca bhrātā duḥśāsanaśca me /
ete vayaṃ haniṣyāmaḥ pāṇḍavānsamare trayaḥ //

ahaṃ hi pāṇḍavānhatvā praśāstā pṛthivīmimām /
māṃ vā hatvā pāṇḍuputrā bhoktāraḥ pṛthivīmimāṃ //

tyaktaṃ me jīvitaṃ rājyaṃ dhanaṃ sarvaṃ ca pārthiva /
na jātu pāṇḍavaiḥ sārdhaṃ vaseyamahamacyuta //

yāvaddhi sūcyāstīkṣṇāyā vidhyedagreṇa māriṣa /
tāvadapyaparityājyaṃ bhūmernaḥ pāṇḍavānprati //
dhṛtarāṣṭra uvāca /

sarvānvastāta śocāmi tyakto duryodhano mayā /
ye mandamanuyāsyadhvaṃ yāntaṃ vaivasvatakṣayam //

rurūṇāmiva yūtheṣu vyāghrāḥ praharatāṃ varāḥ /
varānvarānhaniṣyanti sametā yudhi pāṇḍavāḥ //

pratīpamiva me bhāti yuyudhānena bhāratī /
vyastā sīmantinī grastā pramṛṣṭā dīrghabāhunā //

sampūrmaṃ pūrayanbhūyo dhanaṃ pārthasya mādhavaḥ /
śaineyaḥ samare sthātā bījavatpravapañśarān //

senāmukhe prayuddhānāṃ bhīmaseno bhaviṣyati /
taṃ sarve saṃśrayiṣyanti prākāramakutobhayam //

yadā drakṣyasi bhīmena kuñjarānvinipātitān /
viśīrṇadantāngiryābhānbhinnakumbhānsaśoṇitān //

tānabhiprekṣya saṅgrāme viśīrṇāniva parvatān /
bhīto bhīmasya saṃsparśātsmartāsi vacanasya me //

nirdagdhaṃ bhīmasenena sainyaṃ rathahayadvipam /
gatimagneriva prekṣya smartāsi vacanasya me //

mahadvo bhayamāgāmi na cecchāmyatha pāṇḍavaiḥ /
gadayā bhīmasenena hatāḥ śamamupaiṣyatha //

mahāvanamiva cchinnaṃ yadā drakṣyasi pātitam /
balaṃ kurūṇāṃ bhīmena tadā smartāsi me vacaḥ //
vaiśampāyana uvāca /

etāvaduktvā rājā tu sarvāṃstānpṛthivīpatīn /
anubhāṣya mahārāja punaḥ papraccha sañjayam //