Mahabharata · Chapter 5.51

sarva ete mahotsāhā ye tvayā parikīrtitāḥ /
ekatastveva te sarve sametā bhīma ekataḥ //

bhīmasenāddhi me bhūyo bhayaṃ sañjāyate mahat /
kruddhādamarṣaṇāttāta vyāghrādiva mahāruroḥ //

jāgarmi rātrayaḥ sarvā dīrghamuṣṇaṃ ca niḥśvasan /
bhīto vṛkodarāttāta siṃhātpaśurivāparaḥ //

na hi tasya mahābāhoḥ śakrapratimatejasaḥ /
sainye'sminpratipaśyāmi ya enaṃ viṣahedyudhi //

amarṣaṇaśca kaunteyo dṛḍhavairaśca pāṇḍavaḥ /
anarmahāsī sonmādastiryakprekṣī mahāsvanaḥ //

mahāvego mahotsāho mahābāhurmahābalaḥ /
mandānāṃ mama putrāṇāṃ yuddhenāntaṃ kariṣyati //

urugrāhagṛhītānāṃ gadāṃ bibhradvṛkodaraḥ /
kurūṇāmṛṣabho yuddhe daṇḍapāṇirivāntakaḥ //

aṣṭāśrimāyasīṃ ghorāṃ gadāṃ kāñcanabhūṣaṇām /
manasāhaṃ prapaśyāmi brahmadaṇḍamivodyatam //

yathā mṛgāṇāṃ yūtheṣu siṃho jātabalaścaret /
māmakeṣu tathā bhīmo baleṣu vicariṣyati //

sarveṣāṃ mama putrāṇāṃ sa ekaḥ krūravikramaḥ /
bahvāśī vipratīpaśca bālyepi rabhasaḥ sadā //

udvepate me hṛdayaṃ ye me duryodhanādayaḥ /
bālye'pi tena yuddhyanto vāraṇeneva marditāḥ //

tasya vīryeṇa sankliṣṭā nityameva sutā mama /
sa eva heturbhedasya bhīmo bhīmaparākramaḥ //

grasamānamanīkāni naravāraṇavājinām /
paśyāmīvāgrato bhīmaṃ krodhamūrchitamāhave //

astre droṇārjunasamaṃ vāyuvegasamaṃ jave /
maheśvarasamaṃ krodhe ko hanyādbhīmamāhave //

sañjayācakṣva me śūraṃ bhīmasenamamarṣaṇam . 5-51-15b // ye'haṃ yattena ripughātinā /
// . sarve putrāḥ mama manasvinā //

yena bhīmabalā yakṣā rākṣasāśca purā hatāḥ /
kathaṃ tasya raṇe vegaṃ mānuṣaḥ prasahiṣyati //

na sa jātu vaśe tasthau mama bālye'pi sañjaya /
kiṃ punarmama duṣputraiḥ kliṣṭaḥ samprati pāṇḍavaḥ //

niṣṭhuro roṣaṇo'tyarthaṃ bhajyetāpi na sannamet /
tiryakprekṣīṃ saṃhatabhrūḥ kathaṃ śāmyedvṛkodaraḥ //

śūrastathā'pratibalo gaurastāla ivonnataḥ /
pramāṇato bhīmasenaḥ prādeśenādhiko'rjunāt //

javena vājino'tyeti balenāntyeti kuñjarān /
avyaktajalpī madhvakṣo madhyamaḥ pāṇḍavo balī //

iti bālye śrutaḥ pūrvaṃ mayā vyāsamukhātpurā /
rūpato vīryataścaiva yāthātathyena pāṇḍavaḥ //

āyasena sa daṇḍena rathannāgānnarānhayān /
haniṣyati raṇe kruddho raudraḥ krūraparākramaḥ //

amarṣī nityasaṃrabdho bhīmaḥ praharatāṃ varaḥ /
mayā tāta pratīpāni kurvanpūrvaṃ vimānitaḥ //

niṣkarṇāmāyasīṃ sthūlāṃ supārśvāṃ kāñcanīṃ gadām /
śataghnīṃ śatanirhādāṃ kathaṃ śakṣyanti me sutāḥ //

apāramaplavāgādhaṃ samudraṃ śaravedhanam /
bhīmasenamayaṃ durgaṃ tāta mandāstitīrṣavaḥ //

krośato me na śrṛṇvanti bālāḥ paṇḍitamāninaḥ /
viṣamaṃ na hi manyante prāpataṃ madhudarśinaḥ //

saṃyuge ye gamiṣyanti nararūpeṇa mṛtyunā /
niyataṃ coditā dhātrā siṃheneva mahāmṛgāḥ //

śaikyāṃ tāta catuṣkiṣkuṃ ṣaḍaśrimamitaujasam /
prahitāṃ duḥkhasaṃsparśāṃ kathaṃ śakṣyanti me sutāḥ //

gadāṃ bhrāmayatastasya bhindato hastimastakān /
sṛkkiṇī lelihānasya bāṣpamutsṛjato muhuḥ //

uddiśya nāgānpatataḥ kurvato bhairavānravān /
pratīpaṃ patato mattānkuñjarānprati garjataḥ //

vigāhya rathamārgeṣu varānuddiśya nighnataḥ /
agneḥ prajvalitasyeva api mucyeta me prajā //

vīthīṃ kurvanmahābāhurdrāvayanmama vāhinīm /
nṛtyanniva gadāpāṇiryugāntaṃ darśayiṣyati //

prabhinna iva mātaṅgaḥ prabhañjanpuṣpitāndrumān /
pravekṣyati raṇe senāṃ putrāṇāṃ me vṛkodaraḥ //

kurvanrathānvipuruṣānvisārathihayadhvajān /
ārujanpuruṣavyāghro rathinaḥ sādinastathā //

gaṅgāvega ivānūpāṃstīrajānvividhāndrumān /
prabhaṅkṣyati raṇe senāṃ putrāṇāṃ mama sañjaya //

vadhaṃ nūnaṃ gamiṣyanti bhīmasenabhayārditāḥ /
mama putrāśca bhṛtyāśca rājānaścaiva sañjaya //

yena rājā mahāvīryaḥ praviśyāntaḥpuraṃ purā /
vāsudevasahāyena jarāsandho nipātitaḥ //

kṛtsneyaṃ pṛthivī devī jarāsandhena dhīmatā /
māgadhendreṇa balinā vaśe kṛtvā pratāpitā //

bhīṣmapratāpātkuravo nayenāndhakavṛṣṇayaḥ /
yanna tasya vaśe jagmuḥ kevalaṃ daivameva tat //

sa gatvā pāṇḍuputreṇa tarasā bāhuśālinā /
anāyudhena vīreṇa nihataḥ kiṃ tato'dhikam //

dīrghakālasamāsaktaṃ viśamāśīviṣo yathā /
sa mokṣyati raṇe tejaḥ putreṣu mama sañjaya //

mahendra iva vajreṇa dānavāndevasattamaḥ /
bhīmaseno gadāpāṇiḥ sūdayiṣyati me sutān //

aviṣahyamanāvāryaṃ tīvravegaparākramam /
paśyāmīvātitāmrākṣamāpatantaṃ vṛkodaram //

agadasyāpyadhanuṣo virathasya vivarmaṇaḥ /
bāhubhyāṃ yudhyamānasya kastiṣṭhedagrataḥ pumān //

bhīṣmo droṇaśca vipro'yaṃ kṛpaḥ śāradvatastathā /
jāntyete yathaivahaṃ vīryajñastasya dhīmataḥ //

āryavrataṃ tu jānantaḥ saṅgarāntaṃ vidhitsavaḥ /
senāmukheṣu sthāsyanti māmakānāṃ nararṣabhāḥ //

balīyaḥ sarvato diṣṭaṃ puruṣasya viśeṣataḥ /
paśyannapi jayaṃ teṣāṃ na niyacchāmi yatsutān //

te purāṇaṃ maheṣvāsā mārgamaindraṃ samāsthitāḥ /
tyakṣyanti tumule prāṇānrakṣantaḥ pārthivaṃ yaśaḥ //

yathaiṣāṃ māmakāstāta tathaiṣāṃ pāṇḍavā api /
pautrā bhīṣmasya śiṣyāśca droṇasya ca kṛpasya ca //

ye tvasmadāśrayaṃ kiñciddattamiṣṭaṃ ca sañjaya /
tasyāpacitimāryatvātkartāraḥ sthavirāstrayaḥ //

ādadānasya śastraṃ hi kṣatradharmaṃ parīpsataḥ /
nidhanaṃ kṣatriyasyājau varamevādduruttamam //

sa vai śocāmi sarvānvai ye yuyutsanti pāṇḍavaiḥ /
vikruṣṭaṃ viduroṇādau tadetadbhayamāgatam //

na tu manye vighātāya jñānaṃ duḥkhasya sañjaya /
bhavatyatibalaṃ hyetajjñānasyāpyupaghātakam //

ṛṣayo hyapi nirmuktāḥ paśyanto lokasaṅgrahān /
sukhairbhavanti sukhinastathā duḥkhena duḥkhitāḥ //

kiṃ punarmohamāsaktastatra tatra sahasradhā /
putreṣu rājyadāreṣu pautreṣvapi ca bandhuṣu //

saṃśaye tu mahatyasminkiṃ nu me kṣamamuttaram /
vināśaṃ hyeva paśyāmi kurūṇāmanucintatayan //

dyūtapramukhamābhāti kurūṇāṃ vyasanaṃ mahat /
mandenaiśvaryakāmena lobhātpāpamidaṃ kṛtam //

manye paryāyadharmo'yaṃ kālasyātyantagāminaḥ /
cakre pradhirivāsakto nāsya śakyaṃ palāyitum //

kiṃ nu kuryāṃ kathaṃ kuryāṃ kva nu gacchāmi sañjaya /
ete naśyanti kuravo mandāḥ kālavaśaṃ gatāḥ //

avaśo'haṃ tadā tāta putrāṇāṃ nihate śate /
śroṣyāmi ninadaṃ strīṇāṃ kathaṃ māṃ maraṇaṃ spṛśet //

yathā nidāghe jvalanaḥ samaddho dahetkakṣaṃ vāyunā codyamānaḥ /
gadāhastaḥ pāṇḍavo vai tathaiva hantā madīyānsahito'rjunena //