Mahabharata · Chapter 5.46

yattacchukraṃ mahañjyotirdīpyamānaṃ mahadyaśaḥ / tadvai devā upāsate tasmātsūryo virājate /
yoginastaṃ prapaśyanti bhagavantaṃ sanātanam //

śukrādbrahma prabhavati brahma śukreṇa vardhate / tacchukaṃ jyotiṣāṃ madhye'taptaṃ tapati tāpanam /
yoginastaṃ prapaśyanti bhagavantaṃ sanātanam //

āpo'thādbhyaḥ salilasya madhye ubhau devau śiśriyāte'ntarikṣe /
atandritaḥ saviturvivasvā- nubhau bibharti pṛthivīṃ divaṃ ca // yoginastaṃ prapaśyanti bhagavantaṃ sanātanam //

ubhau ca devau pṛthivīṃ divaṃ ca diśaḥ śukro bhuvanaṃ bibharti /
tasmāddiśaḥ saritaśca sravanti tasmātsamudrā vihitā mahāntāḥ // yoginastaṃ prapaśyanti bhagavantaṃ sanātanam //

cakre rathasya tiṣṭhanto'dhruvasyāvyayakarmaṇaḥ / ketumantaṃ vahantyaśvāstaṃ divyamajaraṃ divi /
yoginastaṃ prapaśyanti bhagavantaṃ sanātanam //

na sādṛśye tiṣṭhati rūpamasya na cakṣupā paśyati kaścidenam /
manīṣayātho manasā hṛdā ca ya enaṃ viduramṛtāste bhavanti // yoginastaṃ prapaśyanti bhagavantaṃ sanātanam //

dvādaśapūgāṃ saritaṃ pibanto devarakṣitām / madhvīkṣantaśca te tasyāḥ sañcarantīha ghorām /
yoginastaṃ prapaśyanti bhagavantaṃ sanātanam //

tadardhamāsaṃ pibati sañcitaṃ bhramaro madhu / īśānaḥ sarvabhūteṣu havirbhūtamakalpayat /
yoginastaṃ prapaśyanti bhagavantaṃ sanātanam //

hiraṇyaparṇamaśvatthamabhipadya hyapakṣakāḥ / te tatra pakṣiṇo bhūtvā prapatanti yathādiśam /
yoginastaṃ prapaśyanti bhagavantaṃ sanātanam //

pūrṇātpūrṇānyuddharanti pūrṇātpūrṇāni cakrire / haranti pūrṇātpūrṇāni pūrṇamevāvaśiṣyate /
yoginastaṃ prapaśyanti bhagavantaṃ sanātanam //

tasmādvai vāyurāyātastasmiṃśca prayataḥ sadā /
tasmādagniśca somaśca tasmiṃśca prāṇa ātataḥ //

sarvameva tato vidyāttattadvaktuṃ na śaknumaḥ /
yoginastaṃ prapaśyanti bhagavantaṃ sanātanam //

apānaṃ girapi prāṇaḥ prāṇaṃ girati candramāḥ / ādityo girate candramādityaṃ girate paraḥ /
yoginastaṃ prapaśyanti bhagavantaṃ sanātanam //

ekaṃ pādaṃ notkṣipati salilāddhaṃsa uccaran / taṃ cetsantatamūrdhvāya na mṛtyurnāmṛtaṃ bhavet /
yoginastaṃ prapaśyanti bhagavantaṃ sanātanam //

aṅguṣṭhamātraḥ puruṣo'ntarātmā liṅgasya yogena sa yāti nityam /
tamīśamīḍyamanukalpamādyaṃ paśyanti mūḍhā na virājamānam // yoginastaṃ prapaśyanti bhagavantaṃ sanātanam //

asādhanā vāpi sasādhanā vā samānametaddṛśyate mānuṣeṣu /
samānametadamṛtasyetarasya muktāstatra madhva utsaṃ samāpuḥ // yoginastaṃ prapaśyanti bhagavantaṃ sanātanam //

ubhau lokau vidyayā vyāpya yāti tadā hutaṃ cāhutamagnihotram /
mā te brāhmī laghutāmādadhīta prajñānaṃ syānnāma dhīrā labhante // yoginastaṃ prapaśyanti bhagavantaṃ sanātanam //

evaṃrūpo mahātmā sa pāvakaṃ puruṣo giran / yo vai taṃ puruṣaṃ veda tasyehārtho na riṣyate /
yoginastaṃ prapaśyanti bhagavantaṃ sanātanam //

yaḥ sahasraṃ sahasrāṇāṃ pakṣānsantatya sampatet / madhyame madhya āgacchedapicetsyānmanojavaḥ /
yoginastaṃ prapaśyanti bhagavantaṃ sanātanam //

na darśane tiṣṭhati rūpamasya paśyanti cainaṃ suviśuddhasatvāḥ /
hito manīṣī manasā na tapyate ye pravrajeyuramṛtāste bhavanti // yoginastaṃ prapaśyanti bhagavantaṃ sanātanam //

gūhanti sarpā iva gahvarāṇi svaśikṣayā svena vṛttena martyāḥ /
teṣu pramuhyanti janā vimūḍhā yathādhvānaṃ mohayante bhayāya // yoginastaṃ prapaśyanti bhagavantaṃ sanātanam //

nāhaṃ sadā'satkṛtaḥ syāṃ na mṛtyu- rna cāmṛtyuramṛtaṃ me kutaḥ syāt /
satyānṛte satyasamānabandhe sataśca yoniratasataścaika eva // yoginastaṃ prapaśyanti bhagavantaṃ sanātanam //

na sādhunā nota asādhunā vā- 'samānametaddṛśyate mānuṣeṣu /
samānametadamṛtasya vidyā- devaṃ yukto madhu tadvai parīpset // yoginastaṃ prapaśyanti bhagavantaṃ sanātanam //

nāsyātivādā hṛdayaṃ tāpayanti nānadhītaṃ nāhutamagnihotram /
mano brāhmī laghutāmādadhīta prajñāṃ cāsmai nāma dhīrā labhante // yoginastaṃ prapaśyanti bhagavantaṃ sanātanam //

evaṃ yaḥ sarvabhūteṣu ātmānamanupaśyati / anyatrānyatra yukteṣu kiṃ sa śocettataḥ param /

yathodapāne mahati sarvataḥ samplutodake /
evaṃ sarveṣu vedeṣu ātmānamanujānataḥ //

aṅguṣṭhamātraḥ puruṣo mahātmā na dṛśyate'sau hṛdi sanniviṣṭaḥ /
ajaścaro divārātramatandritaśca sa taṃ matvā kavirāste prasannaḥ //

ahameva smṛto mātā pitā putro'smyahaṃ punaḥ /
ātmāhamapi sarvasya yacca nāsti yadasti ca //

pitāmaho'smi sthaviraḥ pitā putraśca bhārata /
mamaiva yūyamātmasthā na me yūyaṃ na vo hyaham //

ātmaiva sthānaṃ mama janma cātmā otaproto'hamajarapratiṣṭhaḥ /
ajaścaro divārātramatandrito'haṃ māṃ vijñāya kavirāste prasannaḥ //

aṇoraṇīyānsumanāḥ sarvabhūteṣu jāgrati /
pitaraṃ sarvabhūteṣu puṣkare nihitaṃ viduḥ //