Mahabharata · Chapter 5.45

śokaḥ krodhaśca lobhaśca kāmo mānaḥ parāsutā /
īrṣyā moho vivitsā ca kṛpā'sūyā jugupsutā //

dvādaśaite mahādoṣā manuṣyaprāṇanāśanāḥ / ekaikamete rājendra manuṣyānparyupāsate /
yaurāviṣṭo naraḥ pāpaṃ mūḍhasañjño vyavasyati //

spṛhayālurugraḥ paruṣo vā vadānyaḥ krodhaṃ bibhranmanasā vai vikatthī /
nṛśaṃsadharmāḥ ṣaḍime janā vai prāpyāpyarthaṃ nota sabhājayante //

sambhogasaṃvidviṣamo'timānī dattvā vikatthī kṛpaṇo durbalaśca /
bahupraśankasī vanitādviṭ sadaiva saptaivoktāḥ pāpaśīlā nṛśaṃsāḥ //

dharmaśca satyaṃ ca tapo damaśca amātsaryaṃ hrīstitikṣānasūyā /
dānaṃ śrutaṃ caiva dhṛtiḥ kṣamā ca mahāvratā dvādaśa brāhmaṇasya //

yo naitebhyaḥ pracyaveddvādaśabhyaḥ sarvāmapīmāṃ pṛthivīṃ sa śiṣyāt /
tribhirdvābhyāmekato vārthito yo nāsya svamastīti ca veditavyam //

damastyāgo'thāpramāda ityeteṣvamṛtaṃ sthitam /
etāni brahmamukhyānāṃ brāhmaṇānāṃ manīṣiṇām //

sadvā'sadvā parīvāde brāhmaṇasya na śasyate /
narakapratiṣṭhāste syurya evaṃ kurute janāḥ //

mado'ṣṭādaśadoṣaḥ sa syātpurā yo'prakīrtitaḥ /
lokadveṣyaṃ pratikūlyamabhyasūyā mṛṣāvacaḥ //

kāmakrodhau pāratantryaṃ parivādo'tha paiśunam /
arthahānirvivādaśca mātsaryaṃ prāṇipīḍanam //

īrṣyā modo'tivādaśca sañjñānāśo'bhyasūyitā /
tasmātprājño na mādyeta sadā hyetadvigarhitam //

sauhṛde vai ṣaṅguṇā veditavyaḥ priye hṛṣyantyapriye ca vyathante /
syādātmanaḥ suciraṃ yācate yo dadātyayācyamapi deyaṃ khalu syāt / iṣṭānputrānvibhavānsvāṃśca dārā- nabhyarthitaścārhati śuddhabhāvaḥ //

tyaktadravyaḥ saṃvasenneha kāmā- dbhiṅkte karmasvāśiṣaṃ bādhate ca //

dravyavānguṇavānevaṃ tyāgī bhavati sātvikaḥ /
pañcabhūtāni pañcabhyo nivartayati tādṛśaḥ //

etatsamṛddhamapyṛddhaṃ tapo bhavati kevalam /
satvātpracyavamānānāṃ saṅkalpena samāhitam //

yato yajñaḥ pravardhante matyasyaivāvarodhanāt /
manasānyasya bhavati vācyanyasyātha karmaṇā //

saṅkalpasiddhaṃ puruṣamasaṅkalpo'dhitiṣṭhati /
brāhmaṇasya viśeṣeṇa kiñcānyadapi me śrṛṇu //

adhyāpayenmahadetadyaśasyaṃ vāco vikarāḥ kavayo vadanti /
asminyoge sarvamidaṃ pratiṣṭhitaṃ ye tadviduramṛtāste bhavanti //

na karmaṇā sukṛtenaiva rājan satyaṃ jayejjuhuyādvā yajedvā /
naitena vālo'mṛtyumabhyeti rājan ratiṃ cāsau na labhatyantakāle //

tṛṣṇīmeka upāsīta ceṣṭeta manasāpi na /
tathā saṃstutinindābhyāṃ prītiroṣau vivarjayet //

atraiva tiṣṭhankṣatriya brahmāviśati paśyati /
vedeṣu cānupūrvyeṇa etadvidvanbravīmi te //