Mahabharata · Chapter 5.32

dharmarājasya vacanaṃ śrutvā pārtho dhanañjayaḥ /
uvāca sañjayaṃ tatra vāsudevasya śṛṇvataḥ //

pitāmahaṃ śāntanavaṃ dhṛtarāṣṭraṃ ca sañjaya /
droṇaṃ saputraṃ śalyaṃ ca mahārājaṃ ca bāhlikam //

vikarṇaṃ somadattaṃ ca śakuniṃ caiva saubalam . viviṃśatiṃ citrasenaṃ jayatsenaṃ ca sañjaya /
bhagadattaṃ tathā caiva śūraṃ raṇakṛtāṃ varam //

ye cāpyanye kuravastatra santi rājānaścedbhūmipālāḥ sametāḥ /
yuyutsavaḥ saindhavāḥ pārthivāśca samānītā dhārtarāṣṭreṇa sūta //

yathānyāyaṃ kuśalaṃ vandanaṃ ca samāgame madvacanena vācyāḥ /
tato brūyāḥ sañjaya rājamadhye duryodhanaṃ pāpakṛtāṃ pradhānam //

evaṃ pratiṣṭhāpya dhanañjayastaṃ tato'rthavaddharmavaccāpi pārthaḥ /
uvāca vākyaṃ skavajanapraharṣaṃ vitrāsanaṃ dhṛtarāṣṭrātmajānām //

arjunena samādiṣṭastathetsuktvā tu sañjayaḥ / pārthānāmantrayāmāsa keśavaṃ ca yaśasvinam //

anujñātaḥ pāṇḍavena prayayau sañjayastadā /
śāsanaṃ dhṛtarāṣṭrasyaka sarvaṃ kṛtvā mahātmanaḥ //

tadā tu sañjayaḥ kṣipramekāhena parantapaḥ / yāti sma hāstinapuraṃ niśākāle parantapa //

samprāpya hāstinapuraṃ śīghramaśvairmahājavaiḥ /
antaḥpuraṃ samāsthāya dvāḥsthaṃ vacanamabravīt //

ācakṣva dhṛtarāṣṭrāsya dvā'stha māṃ samupāgatam /
sakāśātpāṇḍuputrāṇāṃ sañjayaṃ māciraṃ kṛthāḥ //

// .rti cedabhivadestvaṃ hi dvāḥstha // .viśeyaṃ vidito bhūmipasya /
// .dyamatrātyayikaṃ hi me'sti // . stho'tha śrutvā nṛpatiṃ jagāda //
dvāḥstha uvāca /

sañjayo'yaṃ bhūmipate namaste didṛkṣayā dvāramupāgataste /
prāpto dūtaḥ pāṇḍavānāṃ sakāśāt praśādhi rājankimayaṃ karotu //
dhṛtarāṣṭra uvāca /

ācakṣva māṃ kuśalinaṃ kalpamasmai praveśyatāṃ svāgataṃ sañjayāya
na cāhametasya bhavāmyakalpaḥ sa me kasmāddvāri teṣṭhecca saktaḥ //
vaiśampāyana uvāca /

tataḥ praviśyānumate nṛpasya mahadveśma prājñaśūrāryaguptam /
siṃhāsanasthaṃ pārthivamāsasāda vaicitravīryaṃ prāñjaliḥ sūtaputraḥ //
sañjaya uvāca /

sañjayo'haṃ bhūmipate namaste prāpto'smi gatvā naradeva pāṇḍavān /
abhivādya tvāṃ pāṇḍuputro manasvī yudhiṣṭhiraḥ kuśalaṃ cānvapṛcchat //

sa te putrānpṛcchati prīyamāṇaḥ kaccitputraiḥ prīyase naptṛbhiśca /
tathā suhṛdbhiḥ sacivaiśca rājan ye cāpi tvāmupajīvanti taiśca //
dhṛtarāṣṭra uvāca /

abhinandya tvāṃ tāta vadāmi sañjaya ajātaśatruṃ ca sukhena pārtham /
kaccitsa rājā kuśalī saputraḥ sahāmātyaḥ sānujaḥ kauravāṇām //
sañjaya uvāca /

sahāmātya kuśalī pāṇḍuputro bubhūṣate yacca te'gre tmanā'bhūt
nirṇīktadharmārthakaro manasvī bahuśruto dṛṣṭimāñśīlavāṃśca //

paro dharmaḥ pāṇḍavasyānṛśaṃsyaṃ dharmaḥ paro vittacayānmato'sya /
sukhapriye'dharmahīne'napārthe nu rudhyate bhārata tasya buddhiḥ //

paraprayuktaḥ puraṣo viceṣṭate sūtraprotā dārumayīva yoṣā /
imaṃ dṛṣṭvā niyamaṃ pāṇḍavasya manye paraṃ karma daivaṃ manuṣyāt //

imaṃ ca dṛṣṭvā tava karma doṣaṃ pāpodarkaṃ ghoramavarṇarūpam /
yāvatparaḥ kāmayate'tivelaṃ tāvannaro'yaṃ labhate praśaṃsām //

ajātaśatrustu vihāya pāpaṃ jīrṇāṃ tvacaṃ sarpa ivāsamarthām /
virocate hyāryavṛttena vīro yudhiṣṭhirastvayi pāpaṃ visṛjya //

hantātmanaḥ karma nibodha rājan dharmārthayuktādāryavṛttādapetam /
upakrośaṃ ceha gato'si rājan bhūyaśca pāpaṃ prasajedamutra //

sa tvamarthaṃ saṃśayitaṃ vinā tai- rāśaṃsase putravaśānugo'sya /
adharmaśabdaśca mahānpṛthivyāṃ nedaṃ karma tvatsamaṃ bhāratāgrya //

hīnaprajño dauṣkuleyo nṛśaṃso dīrghaṃ vairī kṣatravidyāsvadhīraḥ /
evandharmānāpadaḥ saṃśrayeyu- rhīnavīryo yaśca bhavedaśiṣṭaḥ //

kule jāto balavānyo yaśasvī / bahuśrutaḥ sukhajīvī yatātmā /
dharmādharmau grathitau yo bibharti sa hyasya diṣṭasya vaśādupaiti //

kathaṃ hi mantrāgryadharo manīṣī dharmārthayorāpadi sampraṇetā /
evamuktaḥ sarvamantrairahīno naro nṛśaṃsaṃ karma kuryādamūḍhaḥ //

tava hyamī mantravidaḥ sametya samāsate karmasu nityayuktāḥ /
teṣāmmayaṃ balavānniścayaśca kurukṣaye niyamenodapādi //

akālikaṃ kuravo nābhaviṣyan pāpena cetpāpamajātaśatruḥ
iccheñjātu tvayi pāpaṃ visṛjya nindā ceyaṃ tava loke'bhaviṣyat //

kimanyatra viṣayādīśvarāṇāṃ yatra pārthaḥ paralokaṃ sma druṣṭum /
atyakrāmatsa tathā sammataḥ syā- nna saṃśayo nāsti manuṣyakāraḥ //

etānguṇānkarmakṛtānavekṣya bhāvābhāvau vartamānāvanityau /
balirhi rājā pāramavindamāno nānyatkālātkāraṇaṃ tatra mene //

cakṣuḥśrotre nāsikā tvak ca jihvā jñānasyaitānyāyatanāni jantoḥ /
tāni prītānyeva tṛṣṇākṣayānte tānyavyatho duḥkhahīnaḥ praṇudyāt //

natveva manye puruṣasya karma savartate suprayuktaṃ yathāvat /
mātuḥ pituḥ karmaṇābhiprasūtaḥ saṃvardhate vidhivadbhojanena //

priyāpriye sukhaduḥkhe ca rāja- nnindāpraśaṃse ca bhajanta eva /
parastvenaṃ garhayate'parādhe praśaṃsate sādhuvṛttaṃ tameva //

sa tvāṃ garhe bhāratānāṃ virodhā- danto nūnaṃ bhavitā'yaṃ prajānām /
nocedidaṃ tava karmāparādhāt kurūndahetkṛṣṇavartseva kakṣam //

tvamevaiko jātu putrasya rājan vaśaṃ gatvā sarvaloke nerandra /
kāmātmanaḥ ślāghano dyūtakāle nāgāḥ śamaṃ paśya vipākamasya //

anāptānāṃ saṅgrahāttvaṃ narendra tathā'ptānāṃ nigrahāccaiva rājan /
bhūmiṃ sphītāṃ durbalatvādanantā- maśaktastvaṃ rakṣituṃ kauraveya //

anujñāto rathavegāvadhūtaḥ śrānto'bhipadye śayanaṃ nṛsiṃha /
prātaḥ śrotāraḥ kuravaḥ sabhāyā- majātaśatrorvacanaṃ sametāḥ //
dhṛtarāṣṭra uvāca /

anujñāto'syāvasathaṃ parehi prapadyasva śayanaṃ sūtaputra /
prātaḥ śrotāraḥ kuravaḥ sabhāyā- majātaśatrorvacanaṃ tvayoktam //