Mahabharata · Chapter 5.195

tataḥ prabhāte vimale dhārtarāṣṭreṇa coditāḥ /
duryodhanena rājānaḥ prayayuḥ pāṇḍavānprati //

āplāvya śucayaḥ sarve sragviṇaḥ śuklavāsasaḥ / gṛhītaśastrā dhvajinaḥ svasti vācya hutāgnayaḥ /

sarve brahmavidaḥ śūrāḥ sarve sucaritavratāḥ /
sarve kāmakṛtaścaiva sarve cāhavalakṣaṇāḥ //

āhaveṣu parām̐llokāñjigīṣanto mahābalāḥ /
ekāgramanasaḥ sarve śraddadhānāḥ parasparam //

vindānuvindāvāvantyau kekayā bāhlikaiḥ saha /
prayayuḥ sarva evaite bhāradvājapurogamāḥ //

aśvatthāmā śāntanavaḥ saindhavo'tha jayadrathaḥ /
dākṣiṇātyāḥ pratīcyāśca pārvatīyāśca ne nṛpāḥ //

gāndhārarājaḥ śakuniḥ prācyodīcyāśca sarvaśaḥ /
śakāḥ kirātā yavanāḥ śibayo'tha vasātayaḥ //

svaiḥ svairanīkaiḥ sahitāḥ parivārya mahāratham /
ete mahārathāḥ sarve dvitīye niryayurbale //

kṛtavārmā sahānīkastrigartaśca mahārathaḥ /
duryodhanaśca nṛpatirbhrātṛbhiḥ parivāritaḥ //

śalo bhūriśravāḥ śalyaḥ kausalyo'tha bṛhadrathaḥ /
ete paścādanugatā dhārtarāṣṭrapurogamāḥ //

te sametya yathānyāyaṃ dhārtarāṣṭrā mahābalāḥ /
kurukṣetrasya paścārdhe vyavātiṣṭhanta daṃśitāḥ //

duryodhanastu śibiraṃ kārayāmāsa bhārata /
yathaiva hāstinapuraṃ dvitīyaṃ samalankṛtam //

na viśeṣaṃ vijānanti purasya śibirasya vā /
kuśalā api rājendra narā nagaravāsinaḥ //

tādṛśānyeva durgāṇi rājñāmapi mahīpatiḥ /
kārayāmāsa kauravyaḥ śataśo'tha sahasraśaḥ //

pañcayojanamutsṛjya māṇḍalaṃ tadraṇājiram /
senāniveśāste rājannāviśañchatasaṅghaśaḥ //

tatra te pṛthivīpālā yathotsāhaṃ yathābalam /
viviśuḥ śibirāṇyatra dravyavanti sahasraśaḥ //

teṣāṃ duryodhano rājā sasainyānāṃ mahātmanām /
vyādideśa sa bāhyānāṃ bhakṣyabhojyamanuttamam //

sanāgāśvamanuṇyāṇāṃ ye ca śilpopajīvinaḥ /
ye cānye'nugatāstatra sūtamāgadhabandinaḥ //

vaṇijo gaṇikāścārā ye caiva prekṣakā janāḥ /
sarvāṃstankauravo rājā vidhivatpratyavaikṣata //