Mahabharata · Chapter 5.194

etacchrutvā tu kaunteyaḥ sarvānbhrātṝnupahvare /
āhūya bharataśreṣṭha idaṃ vacanamabravīt //
yudhiṣṭhira uvāca /

dhārtarāṣṭrasya sainyeṣu ye cārapuruṣā mama /
te pravṛttiṃ prayacchanti mamemāṃ vyuṣitāṃ niśām //

duryodhanaḥ kilāpṛcchadāpageyaṃ mahāvratam /
kena kālena pāṇḍūnāṃ hanyāḥ sainyamiti prabho //

māseneti ca tenokto dhārtarāṣṭraḥ sudurmatiḥ /
tāvatā cāpi kālena droṇopi pratijajñivān //

gautamo dviguṇaṃ kālamuktavāniti naḥ śrutam /
drauṇistu daśarātreṇa pratijajñe mahāstravit //

tathā divyāstravitkarṇaḥ sampṛṣṭaḥ kurusaṃsadi /
pañcabhirdivasairhantuṃ sasainyaṃ pratijajñivān //

tasmādahamapīcchāmi śrotumarjuna te vacaḥ /
kālena kiyatā śatrūnkṣapayeriti phālguna //

evamukto guḍākeśaḥ pārthivena dhanañjayaḥ /
vāsudevaṃ samīkṣyedaṃ vacanaṃ pratyabhāṣata //

sarva ete mahātmānaḥ kṛtāstrāścitrayodhinaḥ /
asaṃśayaṃ mahārāja hanyureva na saṃśayaḥ //

apaitu te manastāpo yathā satyaṃ bravīmyaham /
hanyāmekarathenaiva vāsudevasahāyavān //

sāmarānapi lokāṃstrīnsarvānsthāvarajaṅgamān /
bhūtaṃ bhavyaṃ bhaviṣyaṃ ca nimeṣāditi me matiḥ //

yāvadiccheddharirayaṃ tāvadasti na cānyathā / yattaddhoraṃ paśupatiḥ prādādastraṃ mahanmama /
kairāte dvandvayuddhe tu tadidaṃ mayi vartate //

yadyugānte paśupatiḥ sarvabhūtāni saṃharan /
prayuṅkte puruṣavyāghra tadidaṃ mayi vartate //

tanna jānāti gāṅgeyo na droṇo na ca gautamaḥ /
na ca droṇasuto rājankuta eva tu sūtajaḥ //

na tu yuktaṃ raṇe hantuṃ divyairastraiḥ pṛthagjanam /
ārjavenaiva yuddhena vijeṣyāmo vayaṃ parān //

tatheme puruṣavyāghrāḥ sahāyāstava pārthiva /
sarve divyāstravidvāṃsaḥ sarve yuddhābhikāṅkṣiṇaḥ //

vedāntāvabhṛthasnātāḥ sarva ete'parājitāḥ /
nihanyuḥ samare senāṃ devānāmapi pāṇḍava //

śikhaṇḍī yuyudhānaśca dhṛṣṭadyumnaśca pārṣataḥ /
bhīmaseno yamau cobhau yudhāmanyūttamaujasau //

virāṭadrupadau cobhau bhīṣmadroṇasamau yudhi /
śaṅkhaścaiva mahābāhurhaiḍimbaśca mahābalaḥ //

putro'syāñjanaparvā tu mahābalaparākramaḥ /
śaineyaśca mahābāhuḥ sahāyo raṇakevidaḥ //

abhimanyuśca balavāndraupadyāḥ pañca cātmajāḥ /
svayaṃ cāpi samarthosi trelokyotsādanepi ca //

krodhādyaṃ puruṣaṃ paśyestathā śakrasamadyute /
sa kṣipraṃ nabhavedvyaktamiti tvāṃ vedmi kaurava //