Mahabharata · Chapter 5.193

prabhātāyāṃ tu śarvaryāṃ punareva sutastava /
madhye sarvasya sainyasya pitāmahamapṛcchata //
duryodhana uvāca /

pāṇḍaveyasya gāṅgeya yadetatsainyamudyatam /
prabhūtanaranāgāśvaṃ mahārathasamākulam //

bhīmārjunaprabhṛtibhirmaheṣvāsairmahābalaiḥ /
lokapālasamairguptaṃ dhṛṣṭadyumnapurogamaiḥ //

apradhṛṣyamanāvāryamuddhūtamiva sāgaram /
senāsāgaramakṣobhyamapi devārmahāhave //

kena kālena gāṅgeya kṣapayethā mahādyute /
ācāryo vā maheṣvāsaḥ kṛpo vā'śu mahābalaḥ //

karṇo vā samaraślāghī drauṇirvā dvijasattamaḥ /
divyāstraviduṣaḥ sarve bhavanto hi bale mama //

etadicchāmyahaṃ jñātuṃ paraṃ kautūhalaṃ hi me /
hṛdi nityaṃ mahābāho vaktumarhasi tanmama //
bhīṣma uvāca /

anurūpaṃ kuruśreṣṭha tvayyetatpṛthivīpate /
balābalamamitrāṇāṃ teṣāṃ yadiha pṛcchasi //

śrṛṇu rājanmama raṇe yā śaktiḥ paramā bhavet /
śastravīrye raṇe yacca bhujayośca mahābhuja //

ārjavenaiva yuddhena yoddhavya itaro janaḥ /
māyāyuddhena māyāvī ityetaddharmaniścayaḥ //

hanyāmahaṃ mahābhāga pāṇḍavānāmanīkinīm /
divase divase kṛtvā bhāgānbhāgānnijānmama //

yodhānāṃ daśasāhasraṃ kṛtvā bhāgaṃ mahādyute /
sahasraṃ rathināmekameṣa bhāgo mato mama //

anenāhaṃ vidhānena sannaddhaḥ satatotthitaḥ /
kṣapayeyaṃ mahatsainyaṃ kālenānena bhārata //

muñceyaṃ yadi vāstrāṇi mahānti samare sthitaḥ /
śatasāhasraghātīni hanyāṃ māsena bhārata //
sañjaya uvāca /

śrutvā bhīṣmasya tadvākyaṃ rājā duryodhanastataḥ /
paryapṛcchata rājendra droṇamaṅgirasāṃ varam //

ācārya kena kālena pāṇḍuputrasya sainikān /
nihanyā iti taṃ droṇaḥ pratyuvāca hasanniva //

sthaviro'smi mahābāho mandaprāṇaviceṣṭitaḥ /
śastrāgninā nirdaheyaṃ pāṇḍavānāmanīkinīm //

yathā bhīṣmaḥ śāntanavo māseneti matirmama /
eṣā me paramā śaktiretanme paramaṃ balam //

dvābhyāmeva tu māsābhyāṃ kṛpaḥ śāradvato'bravīt / drauṇistu daśarātreṇa pratijajñe balakṣayam /
karṇastu pañcarātreṇa pratijajñe mahāstravit //

tacchrutvā sūtaputrasya vākyaṃ sāgaragāsutaḥ /
jahāsa sasvanaṃ hāsaṃ vākyaṃ cedamuvāca ha //

na hi yāvadraṇe pārthaṃ bāṇaśaṅkhadhanurdharam /
vāsudevasamāyuktaṃ rathenāyāntamāhave //

samāgacchasi rādheya tenaivamabhimanyase /
śakyamevaṃ ca bhūyaśca tvayā vaktuṃ yatheṣṭataḥ //