Mahabharata · Chapter 5.191

tataḥ śikhaṇḍino mātā yathātattvaṃ narādhipa /
ācacakṣe mahābāho bhartra kanyāṃ śikhaṇḍinīm //

aputrayā mayā rājansapatnīnāṃ bhayādidam /
kanyā śikhaṇḍinī jātā puruṣo vai niveditā //

tvayā caiva naraśreṣṭha tanme prītyā'numoditam /
putrakarma kṛtaṃ caiva kanyāyāḥ pārthivarṣabha //

bhāryā coḍhā tvayā rājandaśārṇādhipateḥ sutā / mayā ca pratyabhihitaṃ devavākyārthadarśanāt /
kanyā bhūtvā pumānbhāvītyevaṃ caitadupekṣitam //

etacchrutvā drupado yajñasenaḥ sarvaṃ tattvaṃ mantravidbhyo nivedya /
mantraṃ rājā mantrayāmāsa rājan yathāyuktaṃ rakṣaṇe vai prajānām //

sambandhakaṃ caiva samarthya tasmin dāśārṇake vai nṛpatau narendra /
svayaṃ kṛtvā vipralambhaṃ yathāva- nmantryaikāgro niścayaṃ vai jagāma //

svabhāvaguptaṃ nagaramāpatkāle tu bhārata /
gopayāmāsa rājendra sarvataḥ samalaṅkṛtam //

ārtiṃ ca paramāṃ rājā jagāma saha bhāryayā /
daśārṇapatinā sārdhaṃ virodhe bharatarṣabha //

kathaṃ sambandhinā sārdhaṃ na me syādvigraho mahān /
iti sañcintya manasā devatāmarcayattadā //

taṃ tu dṛṣṭvā tadā rājandevī devaparaṃ tadā /
arcāṃ prayuñjānamatho bhāryā vacanamabravīt //

devānāṃ pratipattiśca satyaṃ sādhumatā satām /
kimu duḥsvārṇavaṃ prāpya tasmādarcayatāṃ gurūn //

daivatāni ca sarvāṇi pūjyanāṃ bhūridakṣiṇam /
agnayaścāpi hṛyantāṃ dāśārṇapratiṣedhane //

ayuddhena nivṛttiṃ ca manasā cintaya prabho /
devatānāṃ prasādena sarvametadbhaviṣyati //

mantribhirmantritaṃ sārdhaṃ tvayā pṛthulalocana /
purasyāsyāvināśāya yacca rājaṃstathā kuru //

daivaṃ hi mānuṣopetaṃ bhṛśaṃ siddhyati pārthiva /
paramparavirodhāddhi siddhirasti na caitayoḥ //

tasmādvidhāya nagare vidhānaṃ sacivaiḥ saha /
arcayasva yathākāmaṃ daivatāni viśāmpate //

evaṃ sambhāṣamāṇau tu dṛṣṭvā śokaparāyaṇau /
śikhaṇḍinī tadā kanyā vrīḍiteva tapasvinī //

tataḥ sā cintayāmāsa mankṛte duḥkhitāvubhau /
imāviti tataścakre matiṃ prāṇavināśane //

evaṃ sā niścayaṃ kṛtvā bhṛśaṃ śokaparāyaṇā /
nirjagāma gṛhaṃ tyaktvā gahanaṃ nirjanaṃ vanam //

yakṣeṇarddhimatā rājansthūṇākarṇena pālitam /
tadbhayādeva ca jano visarjayati tadvanam //

tatra ca sthūṇabhavanaṃ sudhāmṛttikalepanam /
lājollāpikadhūmāḍhyamuccaprākāratoraṇam //

tanpraviśya śikhaṇḍī sā drupadasyātmajā nṛpa /
anaśnānā bahutithaṃ śarīramudaśopayat //

darśayāmāsa tāṃ yakṣaḥ sthūṇo mārdavasaṃyutaḥ /
kimartho'yaṃ tavārambhaḥ kariṣye brūhi māciram //

aśakyayiti sā yakṣaṃ punaḥ punaruvāca ha /
kariṣyāmīti vai kṣipraṃ pratyuvācātha guhyakaḥ //

dhaneśvarasyānucaro varado'smi nṛpātmaje /
adeyamapi dāsyādi brūhi yatte vivakṣitam //

tataḥ śikhaṇḍī tatsarvamakhilena nyavedayat /
tasmai yakṣapradhānāya sthūṇākarṇāya bhārata //
śikhaṇḍyuvāca /

āpanno me pitā yakṣa na cirānnāśameṣyati /
abhiyāsyati sakrodho daśārṇādhipatirhi tam //

mannimittaṃ mahotsāhaḥ sahemakavaco nṛpaḥ /
tasmādrakṣasva māṃ yakṣa mātaraṃ pitaraṃ ca me //

pratijñāto hi bhavatā duḥkhapratiśamo mama /
bhaveyaṃ puruṣo yakṣa tvatprasādādaninditaḥ //

yāvadeva sa rājā vai nopayāti puraṃ mama /
tāvadeva mahāyakṣa prasādaṃ kuru guhyaka //