મહાભારત · અધ્યાય 5.188

કથં શિખણ્ડી ગાઙ્ગેય કન્યાં ભૂત્વા પુરા તદા ।
પુરુષોઽભૂદ્યુધિશ્રેષ્ઠ તન્મે બ્રૂહિ પિતામહ ॥
ભીષ્મ ઉવાચ ।

ભાર્યા તુ તસ્ય રાજેન્દ્ર દ્રુપદસ્ય મહીપતેઃ ।
મહિષી દયિતા હ્યાસીદપુત્રા ચ વિશામ્પતે ॥

એતસ્મિન્નેવ કાલે તુ દ્રુપદો વૈ મહીપતિઃ ।
અપત્યાર્થે મહારાજ તોષયામાસ શઙ્કરમ્ ॥

અસ્માદ્વધાર્થં નિશ્ચિત્ય તપો ઘોરં સમાસ્થિતઃ ।
ઋતે કન્યાં મહાદેવ પુત્રો મેસ્યાદિતિ બ્રુવન્ ॥

ભગવન્પુત્રમિચ્છામિ ભીષ્મં પ્રતિચિકીર્ષયા ।
ઇત્યુક્તો દેવદેવેન સ્ત્રીપુમાંસ્તે ભવિષ્યતિ ॥

નિવર્તસ્વ મહીપાલ નૈતઞ્જાત્વન્યથા ભવેત્ ।
સ તુ ગત્વા ચ નગરં ભાર્યામિદમુવાચ હ ॥

કૃતો યત્નો મહાદેવસ્તપસાઽરાધિતો મયા ।
કન્યા ભૂત્વા પુમાન્ભાવી ઇતિ ચોક્તોસ્મિ શમ્ભુના ॥

પુનઃ પુનર્યાચ્યમાનો દિષ્ટમિત્યબ્રવીચ્છિવઃ ।
નતદન્યચ્ચ ભવિતા ભવિતવ્યં હિ તત્તથા ॥

તતઃ સા નિયતા ભૂત્વા ઋતુકાલે મનસ્વિની ।
પત્ની દ્રુપદરાજસ્ય દ્રુપદં પ્રવિવેશ હ ॥

લેભે ગર્ભં યથાકાલં વિધિદૃષ્ટેન કર્મણા ।
પાર્ષતસ્ય મહીપાલ યથા માં નારદોઽબ્રવીત્ ॥

તતો દધાર સા દેવી ગર્ભં રાજીવલોચના ।
તાં સ રાજા પ્રિયાં ભાર્યાં દ્રુપદઃ કુરુનન્દન ॥

પુત્રસ્નેહાન્મહાબાહુઃ મુખં પર્યચરત્તદા ।
સર્વાનભિપ્રાયકૃતાન્ભાર્યાઽલભત કૌરવ ॥

અપુત્રસ્ય સતો રાજ્ઞો દ્રુપદસ્ય મહીપતેઃ ।
યથાકાલં તુ સા દેવી મહિષી દ્રુપદસ્ય હ ॥

કન્યાં પ્રવરરૂપાં તુ પ્રાજાયત નરાધિપ ।
અપુત્રસ્ય તુ રાજ્ઞઃ સા દ્રુપદસ્ય મનસ્વિની ॥

ખ્યાપયામાસ રાજેન્દ્ર પુત્રો હ્યેષ મમેતિ વૈ ।
તતઃ સ રાજા દ્રુપદ પ્રચ્છન્નાયા નરાધિપ ॥

પુત્રવત્પુત્રકાર્યાણિ સર્વાણિ સમકારયત્ ।
રક્ષણં ચૈવ મન્ત્રસ્ય મહિષી દ્રુપદસ્ય સા ॥

ચકાર સર્વયત્નેન બ્રુવણા પુત્ર ઇત્યુત ।
ન ચ તાં વેદક નગરે કશ્ચિદન્યત્ર પાર્ષતાત્ ॥

શ્રદ્દધાનો હિ તદ્વાક્યં દેવસ્યાચ્યુતતેજસઃ ।
છાદયામાસ તાં કન્યાં પુમાનિતિ ચ સોબ્રવીત્ ॥

જાતકર્માણિ સર્વાણિ કારયામાસ પાર્થિવઃ ।
પુંવદ્વિધાનયુક્તાનિ શિખણ્ડીતિ ચ તાં વિદુઃ ॥

અહમેકસ્તુ ચારેણ વચનાન્નારદસ્ય ચ ।
જ્ઞાતવાન્દેવવાક્યેન અમ્બાયાસ્તપસા તથા ॥