Mahabharata · Chapter 5.186

pratyakṣametallokānāṃ sarveṣāmeva bhāmini /
yathāśaktyā mayā yuddhaṃ kṛtaṃ vai pauruṣaṃ param //

na caivamapi śaknomi bhīṣmaṃ śastrabhṛtāṃ varam /
viśeṣayitumatyarthamuttamāstrāṇi darśayan //

eṣā me paramā śaktiretanme paramaṃ balam /
yatheṣṭaṃ gamyatāṃ bhadre kimanyadvā karomi te //

bhīṣmameva prapadyasva na te'nyā vidyate gatiḥ /
nirjito hyasmi bhīṣmeṇa mahāstrāṇi pramuñcatā //

evamuktvā tato rāmo viniḥśvasya mahāmanāḥ /
tūṣmīmāsīttataḥ kanakyā provāca bhṛgunandanam //

bhagavannevamevaitadyathā'ha bhagavāṃstathā /
ajeyo yudhi bhīṣmo'yamapi devairudāradhīḥ //

yathāśakti yathotsāhaṃ mama kāryaṃ kṛtaṃ tvayā /
anivāryaṃ raṇe vīryamastrāṇi vividhāni ca //

ne caiva śakyate yuddhe viśeṣayitumantataḥ /
na cāhamenaṃ yāsyāmi punarbhīṣmaṃ kathañcana //

gamiṣyāmi tu tatrāhaṃ yatra bhīṣmaṃ tapodhana /
samare pātayiṣyāmi svayameva bhṛgūdvaha //

evamuktvā yayau kanyā roṣavyākulalocanā /
tāpasye dhṛtasankalpā sā me cintayatī vadham //

tato mahendraṃ sahitairamunibhirbhṛgusattamaḥ /
yathā'gataṃ tathā so'ganmāmupāmantrya bhārata //

tato rathaṃ samāruhya stūyamāno dvijātibhiḥ /
praviśya nagaraṃ mātre satyavatyai nyavedayam //

yathāvṛttaṃ mahārāja sā ca māṃ pratyanandata /
puruṣāṃścādiśaṃ prājñānkanyāvṛttāntakarmaṇi //

divase divase hyasyā gatijalpitaceṣṭitam /
pratyāharaṃśca me yuktāḥ sthitāḥ priyahite sadā //

yadaiva hi vanaṃ prāyātsā kanyā tapase dhṛtā /
tadaiva vyathito dīno gatacetā ivābhavam //

na hi māṃ kṣatriyaḥ kaścidvīryeṇa vyajayadyudhi /
ṛte brahmavidastāta tapasā saṃśitavratāt //

api caitanmayā rājannārade'pi niveditam /
vyāse caiva tathā kāryaṃ tau cobhau māmavocatām //

na viṣādastvayā kāryo bhīṣma kāśisutāṃ prati /
daivaṃ puruṣakāreṇa ko nivartitumutsahet //

sā kanyā tu mahārāja praviśyāśramamaṇḍalam /
yamunātīramāśritya tapastepe'timānuṣam //

nirāhārā kṛśā rūkṣā jaṭilā malapaṅkinī /
ṣaṇmāsānvāyubhakṣā ca sthāṇubhūtā tapodhanā //

yamunājalamāśritya saṃvatsaramathā'param /
udavāsaṃ nirāhārā pārayāmāsa bhāminī //

śīrṇaparṇena caikena pārayāmāsa sā param /
saṃvatsaraṃ tīvrakopā pādāṅguṣṭhāgradhiṣṭhitā //

evaṃ dvādaśa varṣāṇi tāpayāmāsa rodasī /
nivartyamānāpi ca sā jñātibhirnaiva śakyate //

tato'gamadvatsabhūmiṃ siddhacāraṇasevitām /
āśramaṃ puṇyaśīlānāṃ tāpasānāṃ mahātmanām //

tatra puṇyeṣu tīrtheṣu sā'plutāṅgī divāniśam /
vyacaratkāśikanyā sā yathākāmavicāriṇī //

nandāśrame mahārāja tatholūkāśrame śubhe /
cyavanasyāśrame caiva brahmaṇaḥ sthāna eva ca //

trayāge devayajane devāraṇyeṣu caiva ha /
bhogavatyāṃ mahārāja kauśikasyāśrame tathā //

māṇḍavyasyāśrame rājandilīpasyāśrame tathā /
rāmahrade ca kauravya pailagargasya cāśrame //

eteṣu tīrtheṣu tadā kāśikanyā viśāmpate /
āplāvayata gātrāṇi vratamāsthāya duṣkaram //

tāmabravīcca kauravya mama mātā jale sthitā /
kimarthaṃ kliśyase bhadre tathyameva vadasva me //

saināmathābravīdrājankṛtāñjaliraninditā bhīṣmeṇa samare rāmo nirjitaścārulocani //

ko'nyastamutsaheñjetumudyateṣuṃ mahīpatiḥ /
sāhaṃ bhīṣmavināśāya tapastapsye sudāruṇam //

vicarāmi mahīṃ devi yathā hanyāmahaṃ nṛpam /
etadvrataphalaṃ devi paramasminyathā hi me //

tato'bravītsāgaragā jihmaṃ carasi bhāmini /
naiṣa kāmo'navadyāṅgi śakyaḥ prāptuṃ tvayā'bale //

yadi bhīṣmavināśāya kāśye carasi vai vratam /
vratasthā ca śarīraṃ tvaṃ yadi nāma vimokṣyasi //

nadī bhaviṣyasi śubhe kuṭilā vārṣikodakā /
dustīrthā na tu vijñeyā vārṣikī nāṣṭamāsikī //

bhīmagrāhavatī ghorā sarvabhūtabhayankarī /
evamuktvā tato rājankāśikanyāṃ nyavartata //

mātā mama mahābhāgā smayamāneva bhāminī . kadācidaṣṭame māsi kadāciddaśame tathā /
na prāśnītodakamapi punaḥ sā varavarṇinī //

sā vatsabhūmiṃ kauravya tīrthalobhāttatastataḥ /
patitā paridhāvantī punaḥ kāśipateḥ sutā //

sā nadī vatsabhūmyāṃ tu prathitāmbeti bhārata /
vārṣikī grāhabahulā dustīrthā kuṭilā tathā //

sā kanyā tapasā tena dehārdhena vyajāyata /
nadī ca rājanvatseṣu kanyā caivābhavattadā //