મહાભારત · અધ્યાય 5.181

સમાગતસ્ય રામેણ પુનરેવાતિદારુણમ્ ।
અન્યેદ્યુસ્તુમુલં યુદ્ધં તદા ભરતસત્તમ ॥

તતો દિવ્યાસ્ત્રવિચ્છૂરો દિવ્યાન્યસ્ત્રાણ્યનેકશઃક ।
અયોજયત્સ ધર્માત્મા દિવસે દિવસે વિભુઃ ॥

તાન્યહં તત્પ્રતીઘાતૈરસ્ત્રૈરસ્ત્રાણિ ભારત ।
વ્યધમં તુમુલેયુદ્ધેપ્રાણાંસ્ત્યક્ત્વાસુદુસ્ત્યજાન્ ॥

અસ્ત્રૈરસ્ત્રેષુ બહુધા હતેષ્વેવ ચ ભારત ।
અક્રુધ્યત મહાતેજાસ્ત્યક્તપ્રાણઃ સ સંયુગે ॥

તતઃ શક્તિં પ્રાહિણોદ્ધોરરૂપા- મસ્ત્રે રુદ્ધે જામદગ્ન્યો મહાત્મા ।
કાલોત્સૃષ્ટાં પ્રજ્વલિતામિવોલ્કાં સન્દીપ્તાગ્રાં તેજસા વ્યાપ્ય લોકમ્ ॥

તતોઽહં તામિષુભિર્દીપ્યમાનાં સમાયાન્તીમન્તકાલાર્કદીપ્તામ્ ।
છિત્ત્વા ત્રિધા પાતયામાસ ભૂમૌ તતો વવૌ પવનઃ પુણ્યગન્ધિઃ ॥

તસ્યાં છિન્નાયાં ક્રોધદીપ્તોઽથ રામઃ શક્તીર્ઘોરાઃ પ્રાહિણોદ્્દ્વાદશાન્યાઃ ।
તાસાં રૂપં ભારત નોત શક્યં તેજસ્વિત્વાલ્લાઘવાચ્ચૈવ વક્તુમ્ ॥

કિન્ત્વેવાહં વિહ્વલઃ સમ્પ્રદૃશ્ય દિગ્ભ્યઃ સર્વાસ્તા મહોત્કા ઇવાગ્નેઃ ।
નાનારૂપાસ્તેજસોગ્રેણ દીપ્તા યથાઽદિત્યા દ્વાદશ લોકસન્ક્ષયે ॥

તતો જાલં બાણમયં વિવૃત્તં સન્દૃશ્ય ભિત્ત્વા શરજાલેન રાજન્ ।
દ્વાદશેષૂન્પ્રાહિણવં રણેઽહં તતઃ શક્તીરપ્યધમં ઘોરરૂપાઃ ॥

તતો રાજઞ્જામદગ્ન્યો મહાત્મા શક્તીર્ઘોરા વ્યાક્ષિપદ્ધેમદણ્ડાઃ ।
વિચિત્રિતાઃ કાઞ્ચનપટ્ટનન્દ્ધા યથા મહોલ્કા જ્વલિતાસ્તથા તાઃ ॥

તાશ્ચાપ્યુગ્રાશ્ચર્મણા વારયિત્વા ખઙ્ગેનાજૌ પાતયિત્વા નરેન્દ્ર ।
બાણૈર્દિવ્યૈર્જામદગ્ન્યસ્ય સઙ્ખ્યે દિવ્યાનશ્વાનભ્યવર્ષં સસૂતાન્ ॥

નિર્મિક્તાનાં પન્નગાનાં સરૂપા દૃષ્ટ્વા શક્તીર્હેમચિત્રા નિકૃત્તાઃ ।
પ્રાદુશ્ચક્રે દિવ્યમસ્ત્રં મહાત્મા ક્રોધાવિષ્ટો હૈહયેશમમાથી ॥

તતઃ શ્રેણ્યઃ શલભાનામિવોગ્રાઃ સમાપેતુર્વિશિખાનાં પ્રદીપ્તાઃ ।
સમાચિનોચ્ચાપિ ભૃશં શરીરં હયાન્સૂતં સરથં ચૈવ મહ્યમ્ ॥

રથઃ શરૈર્મે નિચિતઃ સર્વતોઽભૂ- ત્તથા વાહાઃ સારથિશ્ચૈવ રાજન્ ।
યુગં રથેષાં ચ તથૈવ ચક્રે તથૈવાક્ષઃ શરકૃત્તોઽથ ભગ્નઃ ॥

તતસ્તસ્મિન્બાણવર્ષે વ્યતીતે શરૌઘેણ પ્રત્યવર્ષં ગુરું તમ્ ।
સ વિક્ષતો માર્ગણૈર્બ્રહ્મરાશિ- ર્દેહાદસક્તં મુમુચે ભૂરિ રક્તમ્ ॥

યથા રામો બાણજાલાભિતપ્ત- સ્તથૈવાહં સુભૃશં ગાઢવિદ્ધઃ ।
તતો યુદ્ધં વ્યરમચ્ચાપરાહ્ણે ભાનાવસ્તં પ્રતિયાતે મહીધ્રમ્ ॥