Mahabharata · Chapter 5.180

ātmanastu tataḥ sūto hayānāṃ ca viśāmpate /
mama cāpanayāmāsa śalyānkuśalasammataḥ //

snātāpavṛttaisturagairlabdhatoyairavihvalaiḥ /
prabhāte codite sūrye tato yuddhamavartata //

dṛṣṭvā bhāṃ tūrṇamāyāntaṃ daṃśitaṃ syandane sthitam /
akarodrathamatyarthaṃ rāmaḥ sajjaṃ pratāpavān //

tato'haṃ rāmamāyāntaṃ dṛṣṭvā samarakāṅkṣiṇam /
dhanuḥśreṣṭhaṃ samitsṛjya sahasāvataraṃ rathāt //

abhivādya tathaivāhaṃ rathamāruhya bhārata /
yuyutsurjāmadagnyasya pramukhe vītabhīḥ sthitaḥ //

tato'haṃ śaravarṣeṇa mahatā samavākiram /
sa ca māṃ śaravarṣeṇa varṣantaṃ samavākiram //

sankruddho jāmadagnyastu punareva sutejitān /
sampraiṣīnme śarānghorāndīptāsyānuragāniva //

tato'haṃ niśitairbhallaiḥ śataśo'tha sahasraśaḥ /
acchidaṃ sahasā rājannantarikṣe punaḥ punaḥ //

tatastvastrāṇi divyāni jāmadagnyaḥ pratāpavān . mayi prayojayāmāsa tānyahaṃ pratyaṣedhayam /

astraireva mahābāho cikīrṣannadhikāṃ kriyām /
tato vidi mahānnādaḥ prādurāsītsamantataḥ //

tato'hamastraṃ vāyavyaṃ jāmadagnye prayuktavān /
pratyājaghne ca tadrāmo guhyakāstreṇa bhārata //

tato'hamastramāgneyamanumantrya prayuktavān /
vāruṇenaiva tadrāmo vārayāmāsa me vibhuḥ //

evamastrāṇi divyāni rāmasyāhamavārayam /
rāmaśca mama tejasvī divyāstravidarindamaḥ //

tato māṃ savyato rājanrāmaḥ kurvandvijottamaḥ /
urasyavidhyatsankruddho jāmadagnyaḥ pratāpavān //

tato'haṃ bhārataśreṣṭha sannyaṣīdaṃ rathottame /
tato māṃ kaśmalāviṣṭaṃ sūtastūrṇamudāvahat //

glāyantaṃ bharaśreṣṭha rāmabāṇaprapīḍitam /
tato māmapayātaṃ vai bhṛśaṃ viddhamacetasam //

rāmasyānucarā hṛṣṭāḥ sarve dṛṣṭvā vicukruśuḥ /
akṛtavraṇaprabhṛtayaḥ kāśikanyā ca bhārata //

tatastu labdhasañjño'haṃ jñātvā sūtamathābruvam /
yāhi sūta yato rāmaḥ sajjo'haṃ gatavedanaḥ //

tato māmavahatsūto hayaiḥ paramaśobhitaiḥ /
nṛtyadbhiriva kauravya mārutapratimairgatau //

tato'haṃ rāmamāsādya bāṇavarṣaiśca kaurava /
avākiraṃ susaṃrabdhaḥ saṃrabdhaṃ ca jigīṣayā //

tānāpatata evāsau rāmo bāṇānajihmagān /
bāṇairevācchinattūrṇamekaikaṃ tribhirāhave //

tataste sūditāḥ sarve mama bāṇāḥ susaṃśitāḥ /
rāmabāṇairdvidhā cchinnāḥ śataśo'tha sahasraśaḥ //

tataḥ punaḥ śaraṃ dīptaṃ suprabhaṃ kālasammitam /
asṛjaṃ jāmadagnyāya rāmāyāhaṃ jighāṃsayā //

tena tvabhihato gāḍhaṃ bāṇavegavaśaṃ gataḥ /
mumoha samare rāmo bhūmau ca nipapāta ha //

tato hāhākṛtaṃ kasarvaṃ rāme bhūtalamāśrite /
jagadbhārata saṃvignaṃ yathārkapatane bhavet //

tata enaṃ samudvignāḥ sarva evābhidudruvuḥ /
tapodhanāste sahasā kāśyā ca kurunandana //

tata enaṃ pariṣvajya śanairāśvāsayaṃstadā /
pāṇibhirjalaśītaiśca jayāśīrbhiśca kaurava //

tataḥ sa vihvalaṃ vākyaṃ rāma utthāya cābravīt /
tiṣṭha bhīṣma hato'sīti bāṇaṃ sandhāya kārmuke //

sa mukto nyapatattūrṇaṃ savye pārśve mahāhave /
yenāhaṃ bhṛśamudvigro vyāghūrṇita iva drumaḥ //

hatvā hayāṃstato rāmaḥ śīghrāstreṇa mahāhave /
avākiranmāṃ visrabdho bāṇaistairlomavāhibhiḥ //

tato'hamapi śīghrāstraṃ samaraprativāraṇam /
avāsṛjaṃ mahābāho tentarādhiṣṭhitāḥ śarāḥ //

rāmasya mama caivāśu vyomāvṛtya samantataḥ /
na sma sūryaḥ pratapati śarajālasamāvṛtaḥ //

mātariśvā tatastasminmegharuddha ivābhavat /
tato vāyoḥ prakampācca sūryasya ca gabhastibhiḥ //

abhighātaprabhāvācca pāvakaḥ samajāyata /
te śarāḥ svasamutthena pradīptāścitrabhānunā //

bhūmau sarve tadā rājanbhasmabhūtāḥ prapedire /
tadā śatasahasrāṇi prayutānyarbudāni ca //

ayutānyatha kharvāṇi nikharvāṇi ca kaurava /
rāmaḥ śarāṇāṃ sankruddho mayi tūrṇaṃ nyapātayat //

tato'haṃ tānapi raṇe śarairāśīviṣopamaiḥ /
sañchidya bhūmau nṛpate pātayeyaṃ nagāniva //

evaṃ tadabhavadyudvaṃ tadā bharatasattama /
sandhyākāle vyatīte tu vyapāyātsa ca me guruḥ //